1 Rəbb Allahee itxhınne çolune həyvanaaşina, gırgınçile hiyləgarna xoçeniy vob. Xoçeyn zəiyfayk'le uvhiyn:

– Hək'edane, Allahee şok'le bağeene yivaaşina nençinacab meyva umooxhan uvhu?

2 Zəiyfee xoçeyk'le eyhen:

– Bağeene yivaaşin meyvabı oxhanas əxə. 3 Saccu bağıne yı'q'neene yivene meyvabışde hək'ee Allahee uvhu: «Mançike umoyxhan, mançik sumoot'a, deşxhee, hapt'asınbı!»

4 Xoçeyn zəiyfayk'le uvhiyn:

– De'eş, nəxübcab hapt'as deş. 5 Allahık'le ats'an, mane yivena meyva opxhuniyng'a, vuşun ats'al geed qixhes, yuguniy pisın ats'axhxha, Allah xhinne qeepxhes.

6 Zəiyfayk'le g'ecen, mane yiven meyvabı oxhanasıd kara'ə vod, ulesqadıd yugda vod qöö, ats'al ıkkanang'usud ıkkanəxdıd. Mançil-allab məng'ee mana meyva qopxu, opxhanna. Qiyğab k'ane ulyorzulyne adamiys meyva hoole, mang'veeyib ooxhanna. 7 Mane gahıl q'öng'ussana ats'al qadayle, ts'eleb vuxhay ats'axhxhen. Məxüd ıxha manbışe inciliyne t'eleyke cos tanalqanbı ha'a.

8 Manbışik'le yiğıne serınne gahıl bağee iykaran Rəbb Allahın nıq' g'iyxhe. Manbı heepxı bağeene yivaaşine yı'q'nee dyuguleebaxhe. 9 Rəbb Allahee Aadamılqa onu'u, qiyghanan:

– Ğu nyaane?

10 Mang'vee eyhen:

– Bağeead yiğın nıq' g'ayxhı, ts'eler ıxhal-alla qərq'ı'n, dyugulyxhana.

11 Rəbb Allahee eyhen:

– Şavaane vak'le ğu ts'eler ıxhay uvhu? Deşxhee, vas oxhanas q'adağa hav'uyne yivena meyvane opxhun?

12 Aadamee eyhen:

– Zaka sacigee yixhecenva, Ğu hiyvuyne xhunaşşee mane yivene meyvayke zas huvu, zınab opxhunna.

13 Rəbb Allahee zəiyfayk'le eyhen:

– Ğu hı'iyn hucoon?

Zəiyfee eyhen:

– Xoçeyn zı yəqqı'le qığeyhı, zınab opxhunna.

14 Rəbb Allahee xoçeyk'le uvhiyn:

– Ğu in hı'il-alla,

gırgıne çavra-vəq'əyne, çolane həyvanaaşine yı'q'nee bed-düə alyapt'ı:

ı'mı'rvolle vuxhnel habğı nyaq'v ooxhanas.

15 Zı, yiğneyiy zəiyfayne əreeqa,

vuşde kulyfatbışde əreeqa duşmaniyvalla abçes.

Şeng'une kulyfatın yiğne vuk'les ı'xəs,

ğunab mang'une mı'q'les üvxəs.

16 Qiyğa Rəbb Allahee zəiyfayk'le eyhen:

– Vas vuxhnenang'a geeb xəppa əziyyat hevles,

uşaxar əziyyatıka vuxas.

Adamee valqa k'ırı gyaqqı vas ıkkiykanas,

Meeb mang'veecab xəbvalla vas haa'as.

17 Qiyğa Rəbb Allahee Aadamık'leme uvhiyn:

– Ğu xhunaşşeyl k'ırı alixhxhı,

umooxhan uvhuna meyva opxhun.

Həşdeb val-alla nyaq'v bed-düə hav'u.

I'mı'rvolle əziyyatıka ğu vasın g'ık nyuq'vnel ha'as.

18 Mançin vas zazaayiy ğı'ç'iy aleylya'as,

ğunad, ğu ezuyne ç'iyel hucooyiy alyadı man oxhanas.

19 Nyuq'vnelqa sak'alasmee,

ligayne şinıka hı'iyn g'ık oxhanas.

Ğu nyaq'v vorna,

mançike alyart'uva,

ğu nyuq'vnelqar sak'alasda.

20 Aadamee xhunaşşeyn do Həva (ı'mı'r) giyxhe. Mana ç'iyeyne aq'val vuxhaynbışda gırgıng'una yed yeexhe. 21 Manke Rəbb Allahee Aadamılqayiy xhunaşşeylqa g'ekvayke tanalinbı hı'ı, alya'anbı.

22 Qiyğa Rəbb Allahee uvhiyn:

– Haane, insanık'le yuguniy pisın hucoo ıxhay ats'axhxha, yişda sa xhinne qexhe. Hasre ı'mrene yivena meyva qopxu umooxhancen, gırgıne gahbışisır ımaxvacen!

23 Vuc alyart'uyne nyuq'vnel işlemişxhecenva, Rəbb Allahee insan Edenne bağeençe g'e'eşşena. 24 Mang'vee Eden bağıne şargılqa g'oramişa'an malaaikariy gırgıne suralqa iliyk'aran ts'ayıkan gılınc giyxhe ı'mrene yivelqa əəna yəq avqecenva.