Gênesis 44

Avguna kasa

1 Yusufee cun xav vuk’lek ıkkekang’ulqa əmr haa’a:

– İne insanaaşin balagbı cosse qıkkes əxəsdemeene otxhuniyka gyatsts’e’e. Co adıyn nuk’rad conecad balagbışde ghaleeqa gixhxhe. 2 Yizda nuk’rayna kasamee k’ıning’une balageeqa vucee sukuke quvuyne nuk’rayka sacigee gyuvxhe.

Şeng’vee gırgın Yusufee uvhiyn xhinne ha’a.

3 Miç’eed qıxhayng’a, in insanar cone əməleeşika sacigee yəqqı’lyaa’anbı. 4 Manbı şaharılee geeb əq’əna qepxha deşdiy, Yusufee xav vuk’lek ıkkekang’uk’le eyheng’a:

– Ek’ra oza qıxha, mane insanaaşiqa qihna hoora, avarq’ılymee manbışik’le eyhe: «Nişil-allane şu yugvalis pisvalla hav’u? 5 Nişil-allane yizde xərıng’una nuk’rayna kasa qöpqü? Mang’vee mançe ulyoğan, falıqa ilyakka. Şu qotkuda hı’ı deş!»

6 Xav vuk’lek ıkkekana manbışiqa avarq’ıl cuk’le uvhiyn manbışilqa hixhara’an. 7 Çocaaşe mang’uk’le eyhen:

– Nişil-allane yişde xərıng’vee məxdun cuvab eyhe? Şasse g’ulaaşisse məxdun kar ha’as əxəye! 8 Şak’le balagbışee aveykıyn nuk’rad Kana’annee cigabışeençe sak’alı’ı vas qadı. Nişil-allane şi xərıng’une xaançe k’ınəəğəyiy nuk’ra qöqəs? 9 Hasre man kar şavusneyiy aveykı, mana insan gik’ecen, avxuynbıb xərıng’us nukarar vuxhecen.

10 Mang’vee eyhen:

– Şu yugda uvheeyid, hasre inəxüd ixhecen: man kar şavusneyiy aveykı, mana yizda nukar ixhecen, mansanbışil bınah aaxvas deş.

11 Çocaaşe zarada balagbı gyaqqı, çin ghalybı aaqa. 12 Xav vuk’lek ıkkekang’vee xərıng’ule girğıl k’ıning’ulqamee t’abala’ana, kasa Benyaminne balagee iveeke. 13 Çocaaşe cok qitxhuyne divanıke tanalinbı qıt’axxa’a. Qiyğa əməleeşilqa karıd alixhxhı, siviyk’alanbı şahareeqa.

14 Yahud çocaaşika sacigee Yusufne xaaqa qarayle. Mane gahıl Yusuf xaa eyxhe. Manbı Yusufne ögee ç’iyelqamee k’yoozaranbı. 15 Yusufee manbışik’le eyhen:

– Şu hı’iyn hucoone? Şok’le ats’a dişdiy, zına xhinnena insan falıqa ilyakkımee, gırgın g’ecen?

16 Yahudee eyhen:

– Şi xərıng’uk’le hucoovane, nenvane eyhes? Nəxübne şi qopkuynbı xhinne haagvas? Allahee şi hav’una bınah haagva. Həşde şinab, kasa neng’usneyiy avaykı manar, yişde xərıng’un g’ular vooxhe.

17 Yusufee eyhen:

– Zı məxdın kar ha’as deş. Kasa şavusneyiy aveykı mana yizda g’ul ixhes, mansanbıb qı’dəpq’ı’n dekkısqa savk’le.

18 Manke Yahud mang’usqa qıxha eyhen:

– Yizda xərna hucoone ixhes, yiğne g’ulus xərıng’uk’le cuvab eyhes hasre. Ğu firon xhinnena insan ixheeyir, ğu yiğne g’ululqa qəllamışmexhe. 19 Şenke xərıng’vee g’ulaaşike qiyghıninniy: «Şoka dek, çoc vornane?» 20 Şi manke xərıng’uk’le uvhiynniy: «Şaqa sa q’əsda dek vorna, cuqar q’əsvalee ıxhana sa k’ınna dix vor. Mang’una çoc qik’una, cune yedine dixbışike mana sa axu, dekkısır mana geer ıkkan».

21 Manke ğu yiğne g’ulaaşik’le uvhiynniy: «Mana zasqa ayre, zak’le g’aces». 22 Şinad xərıng’uk’le uvhiynniy: «Gadeysse dek g’alerçes əxə deş, g’alerçveeyir, dek qik’asda». 23 Ğumee yiğne g’ulaaşik’le şak’le uvhiynniy: «K’ınna çoc ittyareene, sayib yizde ulesqa qımaale».

24 Yiğne g’ulusqa, yişde dekkısqa sapk’ılıyng’a, yişde xərıng’vee uvhiyn mang’us yuşanı’iyn. 25 Yişde dekkee uvhiyn: «Meeb havak’ne şas sık’ınin otxhuniy alişşu alle». 26 Şimee uvhiyn: «Vüqqəs vəəxəs deş. Saccu yişda k’ınna çoc şaka ı’qqəxhee, şasseb maqa vüqqəs vəəxə. Şasse şeng’usqa qeepxhes vəəxəs deş, k’ınna çoc şaka dexheene».

27 Yiğne g’ulee, yişde dekkee, şak’le uvhiyn: «Şok’le ats’an yizde xhunaşşee Raahilee zas q’öyre dix uxu. 28 Sa dix yizde k’anençe ark’ın sak’ı deş, zınad uvhiyn: hək’erar mana sa bahalne həyvanın qodu-sodu ixhes. Həşdilqamee zak’le mana dix g’acur deş. 29 Şu inasa dixır alyart’vee, mang’uned vuk’lelqa sa kar qadeene, ahaleeqa şu yizda cagvarana vuk’ul uts’uruka quvkees».

30 Həşde şassee yiğne g’ulusqa yişde dekkısqa savaak’alas vəəxəs deş. Mana mang’us geerxhe ıkkiykanna. 31 Mana gade şaka g’ıdecveene, yik' qotxu qik’asda. Manke yiğne g’ulaaşe dekkına cagvarana uts’urun gyavts’una vuk’ul ahaleeqa quvkees.

32 Yiğna g’ul eyxhene zımee, dekkıs cuvab huvu uvhiyn: «Zı mana vasqa sak’alde’eene, yiğne ögil qik’asmee vuk’ul avqa ixhes». 33 Hucoone ixhes, hasre gadeyne cigee xərıng’us g’ul xhinne zı axvas, gader çocaaşika sark’ıl hooracen. 34 Mana dena, nəxürne zı dekkısqa əlyhəəs? Havaasre zak’le dekkına vuk’ul uts’uruka g’umoocecen!