Arrependimento

17 Kulawa mhela wula Yesu nakaluka kudamla yolonga, "Mumgalamchile Nguluwi, kwa vila undewa wa kilanga wa habehi!"

8 Mlajile kwa madito kota namumgalamchila Nguluwi.

13 Lelo mkelanguse ulonzi awu, ‘Ndangugana isungu, haiwele nhambiko.’ Heni suyile kuwachema wanhu wala watanganiche, leka wawele na gehile."

15 Nakalonga, "Mhela naufika. Undewa wa Nguluwi wa habehi! Mweng’ha mumgalamchile Nguluwi, muikunde Mbuli Inojile na muibochele."

3 Hebu! Ndanguwalonjelani, wone namwe hamlonjile gehile ga hemwe kwa Nguluwi, modumigwa kota hewo.

32 Suyile kuwachema wanhu wala wanojile, ila wala wawele na gehile leka wamgalamchile Nguluwi."

38 Petili nakedichila, "Mleche gehile ga hemwe na chila yumwe wa hemwe yabatizigwe kwa itagwa lya Yesu Kilistu leka mpate kulechelwa gehile ga hemwe na kubochela ilagano lya Muhe Yelile.

19 Lelo, mleche gehile ga hemwe na mumgalamchile Nguluwi leka yawosele gehile ga hemwe.

30 Katali Nguluwi nakedita kota halingona, ila sambi kanguwagana wanhu weng’ha chila honhu wamgalamchile.

19 Heni ndo mbele kumng’hanuchila na kumgaza yoneche yondilingumgana. Ahyo wikangaze kwa kumgalamchila Nguluwi.

9 Mkulu halingukawa kweneza gala goyalagane kota wanhu wanji vyowalingijesa kota kokawila. Ila heye kangwimilila kwa chiwalo cha hemwe, mina, halingugana ne yumwe wa hemwe yajilile, ila kanguwakwega weng’ha wamgalamchile Nguluwi.

14 wone wanhu wa heni wawele nawachemigwa kwa itagwa lya heni, wochinyenyeteza kwa heni na kulanda na kumhala heni na kuzileka nzila za hewo zihile, lelo ndowahulichiza kulawa kilanga na kuwalechela gehile ga hewo na ndoidita isi ya hewo ilutilile goya kahi.

Hesekiya kangiwika goya kwa chiwalo cha mnvina ya Pasaka

1 Mndewa Hesekiya nakawahilichila usenga wanhu weng’ha wa Isilaeli na wa Yuda, kahi nakawandichila baluwa wenyeng’haye wa Efulaimu na Manase, yowalalika weng’ha woye kuli ng’handa ya Mkulu Nguluwi ako Yelusalemu, leka wehanze hamwe kuli mnvina ya Pasaka kwa chiwalo cha Mkulu Nguluwi, Nguluwi wa Isilaeli. 2 Mndewa na vilongozi wa heye na wanhu weng’ha wa muji wa Yelusalemu nawamula kuidita mnvina ayo ya Pasaka kuli mwezi wa keli, 3 honhu ha mwezi wa mwaluko kota vyowawele wodita aho hamwande, kwa vila watambika wawele nawali naweyeliza nawali wachefu na wanhu nawali wang’hali kikungajiza ako Yelusalemu. 4 Mbuli ayi nayoneka kota ya goya kwa mndewa hamwe na wanhu weng’ha wawele nawali wekungajize hala. 5 Chila munhu kulawa Beeli-sheba ubanzi wa kusini mbaka Dani ubanzi wa kasikazini nawalalikwa kuya kuli mnvina ayo ya Pasaka ya Mkulu Nguluwi, Nguluwi wa Isilaeli. Wanhu wenji hali hewo hawanawahika kuidita mnvina kota ayo kwa kiwhana na gala malajizo vyogandichigwe. 6 Kwa malajizo ga mndewa, wasenga nawaluta kuli isi ya Isilaeli na Yuda wawele na baluwa kulawa kwa mndewa na kulawa kwa vilongozi wa heye. Baluwa azo nazilonga hino, "Hemwe wanhu wa Isilaeli, mumhiluchile Mkulu Nguluwi, Nguluwi wa Abulahamu na Isaka na Yakubu, leka naye yawahiluchile hemwe msigale, muwele namsulupuka kulawa mmoko mwa wandewa wa Ashulu. 7 Mleche kuwa kota wasekulu wa hemwe na wang’holozenu, wawele hawawele wa kukundigwa kwa Mkulu Nguluwi, Nguluwi wa wasekulu wa hewo, ahyo nakawagaza kwa kuwadita wawe chinhu cha kuzudiza kota vyomlingona. 8 Mleche kuwa na nhumbula zigagadale kota wasekulu wa hemwe, ila mumhulichize Mkulu Nguluwi. Mlute kuli ng’handa ya Nguluwi iwele nakayeliza mazuwa gose, mumfugamile Mkulu Nguluwi, Nguluwi wa hemwe, leka yaleche kuwazudila. 9 Wone mumhiluchile Mkulu Nguluwi, wala wang’holozenu na wana wa hemwe wawele nawaholigwa leka wawe wapogozi, wokonelwa isungu na wala wawele nawawahola, nawo wowalechela leka wahiluche kuli isi ayi, kwa vila Mkulu Nguluwi, Nguluwi wa hemwe, kanoga na kana isungu, naye kowabochela wone momhiluchila."

10 Lelo wasenga awo nawaluta kuli muji umwe mbaka uyage kuli nhanzi za Efulaimu na Manase, nawafika mbaka kuli nhanzi ya Sebuluni, ila wanhu nawawaseka na kuwabeza. 11 Ila, wanhu wachefu hali nhanzi za Asheli na Manase na Sebuluni nawanyenyetela, nawaluta Yelusalemu. 12 Ludali lwa Nguluwi nalwali lukola mijito kuli isi ya Yuda, kuwakangaza nhumbula wanhu wa Yuda leka kuhulichiza malajizo ga mndewa na wakulu wa heye, kota ulonzi wa Mkulu Nguluwi vyoulajize.

Mnvina ya Pasaka yanguditigwa

13 Wanhu wenji lukami nawaluta kuli muji wa Yelusalemu kuli mwezi wa keli, leka kusangalala hamwe kuli mnvina ya mibumunda jilihela usaso. 14 Nawaluka mijito ja kusa honhu ha kulavila nhambiko heng’ha ha milungu hawele Yelusalemu na honhu hanji heng’ha howawele wofunyhizila ubani, nawavihola vinhu vyake na kuluta kuvitoza kuli Ibindi lya Kidiloni. 15 Zuwa lya kumi na zine lya mwezi awo, nawalidumula singo ing’holo lya Pasaka. Watambika na Walawi nawona soni, ahyo naweyeliza na kigala nhambiko za kulakazwa kuli ng’handa ya Mkulu Nguluwi. 16 Nawaluka mijito ja hewo kuli ng’handa ya Nguluwi kota vyogalonjigwe kuli malajizo ga Musa, munhu wa Nguluwi. Walawi nawawapa watambika danda ya nhambiko, nawo nawamizila hali honhu ha kulavila nhambiko. 17 Kwa vila wanhu wenji wawele nawekungajiza hala nawali wang’hali kiyeliza, naiwalapa Walawi kujidumula singo ming’holo jinji ja Pasaka kwa chiwalo cha wala wanhu wawele hawawele welile, leka kujiwika chiuyeng’ha hali Mkulu Nguluwi. 18 Wanhu wenji hali wala wawele nawalawa Efulaimu na Manase na Isakali na Sebuluni, nawali wang’hali kiyeliza, ila nawalya hamwe mnvina ya Pasaka, hanga nayali haiganigwe. Ahyo mndewa Hesekiya nakawalandila yolonga, "Mkulu Nguluwi uwele unojile, umlechele chila yumwe 19 yawele kokupala hegwe Mkulu Nguluwi, Nguluwi wa wasekulu wa heye, kwa nhumbula ya heye yeng’ha, hanga hawele yelile kota vyogalingugana malajizo ga honhu helile." 20 Mkulu Nguluwi, nakakunda kulanda kwa Hesekiya, nakawalechela wanhu awo. 21 Waisilaeli wawele nawali kuli muji wa Yelusalemu, nawadita mnvina ya mibumunda jilihela usaso kwa mhela wa mazuwa saba. Walawi na watambika nawali wokwimba chila zuwa wawele na vinhu vya kwimbila vya kumtogola Mkulu Nguluwi. 22 Mndewa Hesekiya nakalonga na kuwakangaza nhumbula Walawi weng’ha, wawele nawamkolela mijito Mkulu Nguluwi kwa uwanzi ng’hatu. Ahyo wanhu nawalya chilyo cha mnvina kwa mhela wa mazuwa saba na kulavya nhambiko za kikala goya na kulonga malumbo kwa Mkulu Nguluwi, Nguluwi wa wasekulu wa hewo. 23 Hamba nhing’hano yeng’ha naikunda kulutilila na mnvina kwa mhela wa mazuwa saba mzidi, ahyo kwa mazuwa saba ganji nawalutilila kuidita mnvina ayo kwa kusangalala. 24 Mndewa Hesekiya wa Yuda, nakalavya mibuguma elufu imwe (1,000) na ming’holo na mhene elufu saba (7,000) kwa chiwalo cha wala wanhu wawele nawali wekungajize. Vilongozi nawo nawalavya mibuguma elufu imwe (1,000) na ming’holo na mhene elufu kumi (10,000). Watambika wenji nawali weyelize. 25 Wanhu weng’ha kulawa Yuda na Isilaeli na watambika na Walawi na wajenzi walingikala Yuda na Isilaeli, nawasangalala. 26 Nakwali na usangalalo ng’hatu kuli Yelusalemu, kwa vila kulawa mhela wa ulongozi wa mndewa Solomoni, mwana wa Daudi, mndewa wa Isilaeli, mbuli kota yino hainalawila kuli Yelusalemu. 27 Hamba, watambika na Walawi nawema na kuwatambichiza wanhu, Nguluwi nakawahulika kwa vila kulanda kwa hewo nakufika mbaka kilanga, haluga ha heye helile.

13 Mleche kudadula mivalo ja hemwe kulajila masinzo

ila mumhiluchile kwa nhumbula ya kulonga gehile.

Mumhiluchile Mkulu Nguluwi, Nguluwi wa hemwe,

kwa vila heye ndo yalingulechela na yamemile isungu,

halinguzudila himahima na yamemile igano lya kwimilila,

kangonaga isungu na kuleka kugala magazo.

Nguluwi kanguwachema wanhu wa heye wamhiluchile

1 Kuli mwezi wa nane wa mwaka wa keli wa ulongozi wa Mndewa Daliyo wa Pelisiya, ulonzi wa Mkulu Nguluwi naumuyila mloli Sekaliya, mwana wa Belekiya, mzukulu wa Ido na kulonga, 2 "Heni Mkulu Nguluwi nanzudizwa ng’hatu na wasekulu wa hemwe wa katali. 3 Ahyo muwalonjele wanhu kota heni Mkulu Nguluwi Mbele na Mong’ho ndangulonga kota mnyhiluchile, nani ndowahiluchila hemwe. 4 Mleche kuwa kota wasekulu wa hemwe, wawele waloli walongole nawawalonjela kota Mkulu Nguluwi Yawele na Mong’ho kangulonga, ‘Mzileche nzila za hemwe zihile na madito ga hemwe gehile.’ Ila hewo hawanyhulichize ne kuwinza ulonzi wa heni. 5 Lelo, wakohi wasekulu wa hemwe? Ndaze, nawo waloli wangikala mazuwa gose? 6 Ndaze, wasekulu wa hemwe hawafichigwe na magazo kwa chiwalo cha kugalema malajizo ga heni na mizilo jondiwapele kwa kukolela vitumagwa wa heni waloli? Mhela awo, nawamula kuleka gehile ga hewo na kulonga kota heni Mkulu Nguluwi Mbele na Mong’ho, nanuwila kuwaditila kwa kiwhana na nzila za hewo na madito ga hewo. Ndikomya, nani ndo vyondiwaditile."

Kulota kulinguwala falasi na wakwina falasi

7 Kuli zuwa lya makumi meli na gane ga mwezi wa kumi na umwe, uwele ndo mwezi ulinguchemigwa Shebati, kuli mwaka wa keli wa ulongozi wa Mndewa Daliyo, ulonzi wa Mkulu Nguluwi naumuyila mloli Sekaliya, mwana wa Belekiya, mzukulu wa Ido. 8 Mhela wa nechilo nandota, nandimona mhilisi yakwinile falasi mdung’hu, yawele hagati ha migodi ja mihadasi, kuli ibalalika. Kumbele kwa heye nakwali na falasi wanji wa lanji ndung’hu na wa lanji ya mivu na wa lanji nzelu. 9 Lelo, nandimuuza, "Mkulu, falasi awo wana mana yachi?" Mhilisi ayo yawele nayali yolongasa na heni nakandonjela, "Ndokulajila falasi wano wana mana yachi." 10 Hamba yula mhilisi wa mwaluko yawele nayali hagati ha migodi nakalonga, "Falasi wano ndo wala wawele Mkulu Nguluwi nakawalajiza walute kuli isi yeng’ha." 11 Falasi awo nawamlonjela ayo mhilisi wa Mkulu Nguluwi, "Natuipugajiza isi yeng’ha, twangukomya, isi naisindamala."

12 Mhilisi wa Mkulu Nguluwi nakalonga, "Gwa Mkulu Nguluwi Uwele na Mong’ho, kwa mhela wachi kolutilila kuwa ulihela isungu kwa Yelusalemu na miji ja Yuda, jiwele nakujizudila kwa mhela wa miyaka makumi saba?" 13 Ahyo Mkulu Nguluwi nakalonga ulonzi wa uliholile na wa isungu kwa mhilisi yawele nayali yolongasa na heni. 14 Hamba ayo mhilisi nakandonjela, "Kwanguganigwa kulonga kwa lizi kota Mkulu Nguluwi Yawele na Mong’ho kangulonga hino, ‘Ndina fihi ng’hatu kwa chiwalo cha muji wa Yelusalemu na Siyoni. 15 Ila nanzudizwa ng’hatu na wanhu wa isi walingijesa kota wa kuli kikala goya. Ndikomya, nandiwazudila Waisilaeli hado hela, ila wanhu wa isi azo nawawonjezela magazo. 16 Ahyo, heni Mkulu Nguluwi ndangulonga kota, ndanguuhiluchila muji wa Yelusalemu kwa isungu, amo yozenjigwa ng’handa ya heni na muji wokwaluka kuzenjigwa kahi. Heni Mkulu Nguluwi Mbele na Mong’ho nandonga.’ " 17 Hamba mhilisi ayo nakandonjela ndonje mbuli ayi yinji, "Mkulu Nguluwi Yawele na Mong’ho, kangulonga hino, ‘Miji ja heni jomema kahi nyhule. Ndouhembuliza kahi muji wa Yelusalemu na kuuhagula muji awo leka uwe wa heni.’ "

Kulota kulinguwala mbalati

18 Hamba nandola kuchanya na nandizona mbalati zine. 19 Nani nandimuuza yula mhilisi yawele nayali yolongasa na heni, "Mbalati azi zina mana yachi?" Naye nakanyidichila, "Mbalati azi zanguwala wala wanhu wa isi wawele nawawasambalula wanhu wa Yuda na wa Isilaeli na wa Yelusalemu." 20 Hamba Mkulu Nguluwi nakandajila wazidahe kuponda chuma wane. 21 Nambuza, "Wazidahe wano wanguya kudita choni?" Naye nakanyidichila, "Wanhu awa nawoya kuwakabusa na kuwadumya wala wanhu wa isi wawele na mong’ho, wawele nawawatowa na kuwasambalula wanhu wa isi ya Yuda."

13 Yalinguvisa nongwa za heye, mbuli za heye haziweza kuluta goya,

ila yalingulonga gehile ga heye na kugaleka, kolechelwa.

23 Mhulichize makanyo ga heni,

ndowajidila majesa ga heni,

ndowazelesa ulonzi wa heni.

9 Ila hotukunda kota tudita wihe, lelo, Nguluwi ndo wa kitumbila yalingudita ganojile, heye kotusila gehile ga hetwe na kutuhovuga wihe weng’ha wotuditile.

7 Ndangukulonjelani, kowa na kusangalala ng’hatu kilanga kwa chwalo cha yalingudita gehile yumwe kumgalamchila Nguluwi kusinda wanhu watanganiche makumi tisa na tisa wohambe waganigwe kusilwa gehile.

10 Hihyo du ndangukulonjela, hana usangalalo hali wahilisi wa Nguluwi kwa chiwalo cha yawele na gehile yumwe yalingulonga gehile ga heye kwa Nguluwi."

8 Mhejeleleni Nguluwi, naye kowahejelela hemwe. Muhovuje moko ga hemwe mwihile na kuhovuga nhumbula za hemwe, hemwe muwele na majesa meli.