1 Awu ndo ulonzi woyapegwe Isaya mwana wa Amosi, kuwala isi ya Yuda na muji wa Yelusalemu.

2 Mhela wokuya,

uwele chidunda cha ng'handa ya Mkulu Nguluwi,

chowa chikulu kusinda vidunda vyeng'ha,

ena, chotogoligwa hali vidunda vyeng'ha,

wanhu wa isi zeng'ha woluta ako.

3 Wanhu wa isi nyinji wokuya na kulonga,

"Tuche, tulute kuchanya kuli chidunda cha Mkulu Nguluwi,

kuli ng'handa ya Nguluwi wa Isilaeli,

leka yatulanguse nzila za heye,

natwe tuwinze vyoyodita heye.

Kwa vila malajizo golawa ako Siyoni,

ulonzi wa Mkulu Nguluwi ako Yelusalemu."

4 Kowadita wanhu wa isi nyinji wehanyise,

na kwamula kitwanza kwa wanhu wa isi zinji.

Wogongomanya mipanga ja hewo jiwe mihuka,

na migoha ja hewo jiwe sengo za kutemela nhagala.

Wanhu wa isi imwe hawochitowa na wanhu wa isi iyage,

ne kilangusa ngondo kahi.

5 Muye, hemwe ivyazi lya Yakobo,

tujende hali lumuli lwa Mkulu Nguluwi.

6 Gwa Nguluwi, nakuwaleka wanhu wa hegwe, ivyazi lya Yakobo.

Nawamema uhawi ulingulawa kolilawilaga isanya,

wangulagula kota Wafilisti,

wangiyamba moko na wohambe wakuzele.

7 Isi ya hewo naimema sendi na zahabu,

ng'hano ya hewo ndo ng'hulu ng'hatu.

Isi ya hewo naimema falasi,

mituka ja hewo ja kukwejigwa ndo minji lukami.

8 Isi ya hewo naimema jimalukolo ja milungu,

wangufugamila mijito ja moko ga hewo,

vinhu viwele navigongomanyigwa na hewo wawo.

9 Ahyo, chila munhu kobasigwa soni na kudeuzwa.

Gwa Mkulu Nguluwi, uleche kuwalechela ne hado!

10 Mwinjile kuli mhalika,

mivise kuli misimo ja kuli misanga,

leka kiwika kutali na ng'halazi ya Mkulu Nguluwi,

kutali na ukulu wa undewa wa heye.

11 Zuwa lyanguya na ujuvi wa wanhu woduliswa,

kidaya kwa chila munhu kodumigwa,

Mkulu Nguluwi yaliyeka ndo kotogoligwa kuli zuwa alyo.

12 Mkulu Nguluwi Yawele na Mong'ho,

kanalyo zuwa lyoyaliwichile,

kwa chiwalo cha weng'ha walingidaya na wajuvi,

kowadulisa weng'ha.

13 Kojidumya mielezi jeng'ha ja Lebanoni,

jiwele ng'wemang'wema lukami,

na mialoni jeng'ha ja Bashani,

14 na vidunda vyeng'ha viwele ng'wemang'wema,

na vidunda vidodo vyeng'ha.

15 Kojiwifya milingo jiwele ng'wemang'wema ng'hatu,

na chila ng'hanzi ziwele na ngome,

16 na meli zeng'ha za Talishishi,

na chila meli inojile iwele kuli bahali.

17,18 Kidaya kwa chila munhu kodumigwa,

na ujuvi wa wanhu woduliswa,

jimalukolo jeng'ha ja milungu jokwajilila ng'hatu.

Mkulu Nguluwi yaliyeka ndo kokwinuligwa kuli zuwa alyo.

19 Wanhu wobilimila kuli mhalika mgati mwa mitalawe,

kuli mikulubila kuli misanga,

leka kiwika kutali na ng'halazi ya Mkulu Nguluwi,

na ukulu wa undewa wa heye,

hoyokuya kuikabusa isi.

20 Zuwa alyo, wanhu wojitajila migule na mipalabutwa,

jimalukolo ja hewo ja sendi na zahabu,

jowajigongomanye leka wajifugamile.

21 Wokwinjila kuli mhalika za kuli mitalawe,

na kuli misimo ja mitalawe,

leka kiwika kutali na ng'halazi ya Mkulu Nguluwi,

na ukulu wa undewa wa heye,

hoyokuya kuikabusa isi.

22 Mleche kitumbila kwa munhu,

kwa vila howeza kuwatanza hemwe,

heye ndo ng'hochele na kobagama kuli mhela uchefu hela.