1 Whaani ayu yalinguya kulawa kuli ngondo kula Edomu,

kulawa Bosila na mivalo jiwele na usalagwa udung'hu?

Whaani ayo yavalile mivalo ja sendi nyinji,

yalingujenda kwa ukulu wa mong'ho wa heye?

"Ndo heni Mkulu Nguluwi

ndilinguwikula kusumya kwa heni,

mbele na mong'ho wa kulohola."

2 Lekachoni ivalo lya hegwe naliwa lidung'hu,

kota munhu yalingukama zabibu?

3 "Ena, nang'hama zabibu ndiliyeka,

kulawa kwa wanhu wa isi, haduhu munhu yawele nayali hamwe na heni.

Nandiwabiga wanhu wa isi kwa ng'halazi ya heni,

nandiwahondanga kwa ng'halazi ya heni.

Mivalo ja heni najimema usalagwa wa danda ya hewo,

danda ya hewo naiwika wavu kuli nguwo za heni.

4 Kwa vila zuwa lya kuhilula chibida nalyali mnhumbula mwa heni,

mhela wa kuwagombola wanhu wa heni naufika.

5 Nandola ila hakuwele na munhu wa kunhanza,

nambubuwala kwa vila hakuwele na wakunhanza,

ila moko wa heni nausumya,

ng'halazi ya heni ndo inditile ndiwe nzinzili.

6 Kwa ng'halazi ya heni nandiwabiga wanhu wa isi,

kwa kuzudila kwa heni nandiwadita wagale,

danda ya hewo nandiibohola kuli misanga."

7 Ndowalonjela wanhu kuwala igano lya kwimilila lya Mkulu Nguluwi.

Ndolonga madito ga heye geng'ha galinguganigwa kutogoligwa,

kwa chiwalo cha geng'ha goyatuditile,

kunoga kukulu kwa heye koyawapele Waisilaeli kwa isungu lya heye,

kwa kiwhana na winji wa igano lya kwimilila lya heye.

8 Nakalonga hali hewo,

"Ndikomya, wano ndo wanhu wa heni,

wana wa heni wawele hawondeteleza".

Lelo, heye nakawa mlohozi wa hewo.

9 Kuli magazo ga hewo geng'ha naye nakagazika na hewo,

hamlajize msenga yunji kuwatanza,

ila heye yuye nakoya kuwalohola.

Kwa igano na isungu lya heye nakawagombola,

kulawa katali nakawahola na kuwalolela.

10 Ila hewo nawabelenhuka,

nawamdita muhe yelile wa heye yawe na masinzo.

Ahyo, Nguluwi nakagalamka, nakawa mng'honyo wa hewo,

heye yuye naketowa na hewo.

11 Hamba wanhu wa heye nawagakumbuchila mazuwa ga katali,

mhela wa Musa chitumagwa wa Mkulu Nguluwi na wanhu wa heye.

Nawauza, "Lelo kakohi Mkulu Nguluwi,

yawele nakachilohola chilundo cha wanhu wa heye hamwe na wadimi wa hewo kuli bahali?

Kakohi yula yauwichile muhe wa heye yelile hali hewo,

12 yawele kwa moko wa heye uwele na mong'ho

nakadita vinduzanduza kwa kukolela Musa,

nakaigawanula bahali na kuwalongoza wanhu wa heye,

na kipatila itagwa lya mazuwa gose?

13 Whaani yawele nakawalongoza hagati ha mazi menji ga bahali,

mbaka nawakola amo himahima kota falasi ne kikwang'hwala?

14 Kota vila misenga vyojilinguhilikwa kuli ibindi, honhu ha kudila migongolo,

ndo muhe wa Nguluwi vyouwaditile wanhu wa heye wesele.

Gwa Mkulu Nguluwi, ahyo ndo vyouwalongoze wanhu wa hegwe,

nagwe nakipatila itagwa lyelile."

15 Utulole kulawa kilanga

Gwa Nguluwi, ulole,

utulole kulawa haluga ha hegwe helile.

Vyakohi fihi ya hegwe na mong'ho wa hegwe?

Ulutilile kutulajila igano lya kwimilila lya hegwe.

16 Kwa vila hegwe ndo mhaza wa hetwe,

hanga Abulahamu, sekulu wa hetwe hatuzelele,

naye Isilaeli halingutuzela,

ila hegwe, gwa Mkulu Nguluwi, ndo mhaza wa hetwe,

mgombozi wa hetwe kulawa katali ng'hatu ndo itagwa lya hegwe.

17 Gwa Mkulu Nguluwi, lekachoni kwangutuleka tulute kutali na nzila za hegwe,

na kuzidita nhumbula za hetwe ziwe zigagadale mbaka hatulingukuhulichiza?

Gwa Mkulu Nguluwi, uhiluche kwa chiwalo cha vitumagwa wa hegwe,

nhanzi ziwele ndo uhalizi wa hegwe.

18 Kwa mhela uchefu hela, hetwe wanhu wa hegwe welile natuhahola honhu ha hegwe helile,

ila wang'honyo wa hetwe nawoya na kuhawifya haluga ha hegwe.

19 Natuwa kota wanhu wawele hawalongozigwe na hegwe,

kota wanhu wawele hawazeleche kwa itagwa lya hegwe.