1 Nguluwi wa hemwe kangulonga,

"Muwakangaze nhumbula wanhu wa heni,

muwahembulize.

2 Mlonje na wenyeng'haye wa Yelusalemu kwa uliholile,

muwalonjele kota magazo ga hewo nagamala,

nawalechelwa wihe wa hewo.

Mkulu Nguluwi nakawagaza ng'hatu,

kwa chiwalo cha gehile geng'ha ga hewo."

3 Lizi lya munhu lyanguchemeleza kulawa kuchiwala,

"Muiwiche goya nzila ya Mkulu Nguluwi,

mgongomanye nzila ng'hulu kuchiwala kwa chiwalo cha Nguluwi wa hetwe.

4 Chila ibindi lyotiligwa,

chila chidunda choselegwa,

vigongo vyowa ibalalika,

honhu hawele vibi hoditigwa hawe goya.

5 Hamba ukulu wa Mkulu Nguluwi wogubuligwa,

wanhu weng'ha wowona kwa mhela umwe.

Mkulu Nguluwi nakalonga ago."

6 Lizi lyangulonga, "Uwikule usenga!"

Nani nambuza, "Ndiwikule usenga wachi?"

Naye nakalonga, "Uwikule usenga,

kwa kulonga kota wanhu weng'ha ndo kota misolo,

kota uluwa wa kisolo uwele wangikala kwa mhela uchefu.

7 Misolo janguswinha na uluwa wanguswinha,

mhela uwele mbeho ya ivuche kulawa kwa Mkulu Nguluwi yanguputa mchanya mwa vinhu avyo.

Ndikomya, wanhu ndo kota misolo.

8 Misolo janguswinha na uluwa lwanguswinha,

ila ulonzi wa Nguluwi wa hetwe wangikala mazuwa gose."

9 Hegwe ulingigala mbuli inojile Siyoni,

ulute mchanya mwa chidunda chiwele ng'wemang'wema.

Hegwe ulingigala mbuli inojile Yelusalemu,

ulandule lizi lya hegwe kwa mong'ho,

ulandule lizi, uleche kudumba,

jilonjele miji ja Yuda,

"Nguluwi wa hemwe ka hano."

10 Mkulu Nguluwi kanguya na mong'ho,

kwa moko wa heye uwele na mong'ho kangusumya.

Kanguwegalaga wanhu kota ndolendole,

wawele nawagomboligwa wangumlongola.

11 Kochidima chilundo cha heye, kota mdimi wa migongolo,

kojikungajiza ming'holo myana kuli moko ga heye,

na kujiwika kuli mhambaga ya heye,

kojilongoza mholemhole jila jilingonyeza.

12 Whaani yalinguweza kupima mazi ga bahali,

kwa chiganza cha heye,

ama kupima ulanga kwa moko wa heye?

Whaani yalinguweza kuwika misanga jeng'ha ja isi kuli chizombe,

ama kuvipima vidunda

na vigongo kuli chipimilo cha mizani?

13 Whaani yalingugazela majesa ga Mkulu Nguluwi,

ama kumlangusa?

14 Mkulu Nguluwi nakagana kulanguswa ama kutanzigwa na whaani?

Whaani yamlanguse nzila itanganiche?

Whaani yamlanguse kuwa na kuvizela,

ama kumlajila vyoilinguganigwa kuwa na nyhala?

15 Kwa heye wanhu wa isi ndo kota idovu lya mazi kuli ndoo,

ndo kota nhimbwisi mchanya mwa mzani.

Kwa heye vihilwa ndo kota nhimbwisi.

16 Ngodi zeng'ha za Lebanoni na migongolo jake

jeng'ha haviweza kuhega kwa nhambiko ya kulakazwa hali heye.

17 Wanhu wa isi zeng'ha, hawawele chinhu hali heye,

kwa heye ndo wa hihi hela, hawalingutanza chinhu.

18 Momuwhaniza Nguluwi na choni,

ama na chinhu chachi?

19 Ndaze, kangiwhana na limalukolo?

Alyo, munhu kangulihongolaga,

yalinguponda zahabu kangulibakalizaga zahabu,

na kuligongomanyila migasi ja sendi!

20 Munhu yawele mzunwa ng'hatu,

yohambe yaweze kulavya nhambiko kota ayi,

kanguhagulaga igodi lyohambe lyole.

Kangumpalaga yalinguhongola vinhu yazidahe ng'hatu,

leka yamhongolele limalukolo liwele nzinzili!

21 Ndaze, hemwe mng'hali kuvizela?

Ndaze, hamhuliche?

Ndaze, hamlonjelwe kulawa mwaluko?

Ndaze, hamvizele kulawa mwaluko wa isi?

22 Mkulu Nguluwi ndo yekalise mchanya mwa duala ya isi yeng'ha,

na wanhu walingikala mgati mwake ndo wadodo kota nzije.

Kangwanzanza ulanga kota ipaziya,

na kuugolola kota ihema lya kikala.

23 Yuye kanguwadulisaga wakulu wawele na mong'ho,

vilongozi wa isi kanguwaditaga kuwa walihela utanzi.

24 Hala du howonyaligwa,

hala du howotiligwa kuli misanga,

hala howowika mizabi ja hewo kuli misanga,

ndo Mkulu Nguluwi hoyowaputila, nawo woswinha,

nacho chivuluvumbi,

chowawembelusa kota mhumba.

25 Nguluwi Yelile kanguuza hino,

"Mowhaniza heni na whaani?

Ndaze, hana munhu yawele kota heni?"

26 Mwinule meho ga hemwe, mlole kilanga.

Whaani yalumbile avi vyeng'ha?

Ndo heye yalinguchigala kunze chilundo cha nhondwe imwe mbaka iyage,

na kuzichema chila imwe na itagwa lyake.

Kwa chiwalo cha ludali lwake lukulu na mong'ho wake ukulu,

haduhu ne imwe ilinguwa haduhu.

27 Hemwe wanhu wa Isilaeli, walelwa wa Yakobo,

lekachoni mwangung'ung'uta na kulonga,

"Mkulu Nguluwi hambe yatutanze!

Nguluwi wa hetwe halingijesa kuwala hachi za hetwe!"

28 Ndaze, hemwe mng'hali kuvizela?

Ndaze, hamhuliche?

Mkulu Nguluwi ndo Nguluwi wa mazuwa gose,

heye ndo yalumbile chila chinhu muisi.

Halingutoka ne kuwa ng'hochele,

haduhu ne yumwe,

yawele yoweza kupugajiza kuvizela kwa heye.

29 Heye kanguwapaga ludali wala watweguche nhumbula,

ng'hochele kanguwapaga mong'ho.

30 Mbaka wasongolo wangutokaga na kutweguka nhumbula,

ena, wangikwang'hwala na kugwa,

31 ila weng'ha walingitumbila kwa Mkulu Nguluwi,

wopata mong'ho unyale.

Woguluka kwa mabawa kota ikungule,

wobilima ne kutoka,

wojenda ne kutweguka nhumbula.