1 Mleche kijesa kota moko wa Mkulu Nguluwi ndo ufupi,

mbaka yalemwele kuwalohola hemwe,

ama makutu ga heye nagadinyigwa,

mbaka yalemwele kuwahulichiza hemwe.

2 Gehile ga hemwe ndo galinguwawika kutali na Nguluwi wa hemwe,

gehile ga hemwe ndo gamditile heye yevise kutali na hemwe,

mbaka halinguwahulichiza hemwe.

3 Kwa vila moko ga hemwe nagawichigwa ukokomoche kwa kukopola,

vidole vya hemwe kwa madito gehile.

Milomo ja hemwe najilonga udesi,

myango za hemwe zangulongaga wihe.

4 Homluta kuli chitala kumlonjeleza munhu,

hamlingulonga kukomya ne kwa hachi.

Mwangitumbila uhadi,

mwangulonga udesi.

Mwangijesa mbuli zihile na kulela wihe.

5 Mwanguganhula mafinga ga izoka liwele na dunga,

mwangutawa utandawala wa ibui.

Yalingulya mafinga ga hemwe kobagama,

hogotuligwa mizoka jangulawa amo.

6 Utandawala wa hemwe hauwele goya kwa mivalo,

wanhu hawoweza kigubika chomlingutawa.

Mijito ja hemwe ndo ja wihe,

madito ga hemwe geng'ha ndo kitowa hela.

7 Mwahabehi kudita wihe,

mwangudita himahima kubohola danda ilihela nongwa.

Majesa ga hemwe ndo ga wihe,

kuwifya na kudumya kwangonekaga kuli nzila za hemwe.

8 Hamuizelele nzila ya kikala goya,

nzila za hemwe zeng'ha ndo za kubunza.

Namiditila nzila za kwajilila,

yoneche yalingukola amo howeza kuwa na kikala goya.

9 Hachi ya kutali na hetwe,

kutanganika kwa Nguluwi kung'hali kufika kwa hetwe.

Twangitumbila kupata lumuli, ila ndo jiza hela,

twangubeteza lumuli, ila twangujenda kuli jiza.

10 Twangukwabasa lukanzi kota wohambe walole,

kota wanhu walihela meho.

Twangikwang'wala nemisi kota vila ndo nechilo,

hetwe ndo kota wabagame hali wanji wawele na mong'ho.

11 Twangubuma kota midubu,

twangulombocheza kota ng'hunda.

Twanguubeteza utaguso wa hachi ila wa haduhu,

twanguupala ulohozi ila wa kutali na hetwe.

12 Nongwa za hetwe hali hegwe ndo nyinji lukami,

gehile ga hetwe gangutulonjeleza.

Ena, twa hamwe na nongwa za hetwe,

twanguuzela wihe wa hetwe.

13 Natukubelenhuka na kukulema, gwa Mkulu Nguluwi,

natulema kukuwinza gwa Nguluwi wa hetwe.

Kubunza na kubelenhuka vya mnhumbula za hetwe,

twangijesa na kulonga mbuli za udesi.

14 Hachi naiwichigwa hafungo,

kutanganika kwa kutali,

kukomya kwangubigangwa mchitala,

kugoloka hakulinguweza kwinjila amo.

15 Kukomya kwa haduhu chila honhu,

naye yalinguleka wihe kanguwaga upelembi.

Mkulu Nguluwi nakazona mbuli azo, nakazudizwa,

kwa vila hakuwele na hachi.

16 Nakona kota haduhu munhu ne yumwe yalingikangaza nhumbula,

nakabubuwala kwa vila haduhu yalinguwatanza walingubunzigwa.

Ahyo, nakatumiya mong'ho wa heye yuye kuwalohola,

hachi ya heye kwa kusumya.

17 Nakavala kutanganika kota ivalo lya kiyamila mhambaga,

ulohozi kota kofiya ya chuma kumutwi.

Kovala chibida kota ivalo,

na kigubika ng'halazi kota ikanzu.

18 Kowagaza wang'honyo wa heye kwa kiwhana na madito ga hewo,

ena, kuzudila kwa heye na chibida vyowafika wang'honyo wa heye,

kowagaza mbaka wenyeng'haye wa isi za kutali.

19 Kulawa kolizinjilaga isanya mbaka kolilawilaga isanya,

chila munhu komdumba Mkulu Nguluwi,

na kuuzela ukulu wa heye.

Kwa vila kokuya kota lwanda lumemile mazi galinguluta himahima,

mazi galingukundujizwa na mbeho ya Mkulu Nguluwi.

20 Mkulu Nguluwi kangulonga hino,

"Ndokuya Yelusalemu kota mgombozi wa walelwa wa Yakobo,

wawele wolonga gehile ga hewo.

21 Ali ndo ilagano lya heni na hemwe,

kuwala Muhe wa heni na ulonzi vyondiwapele hemwe,

havikuka kwa hemwe mazuwa gose,

ne kwa wana na wazukulu wa hemwe,

kulawa sambi mbaka mazuwa gose."