1 Mkulu Nguluwi yawele nakawalumba hemwe wanhu wa Yakobo,

heye yawaditile hemwe wanhu wa Isilaeli, kangulonga,

"Mleche kudumba, kwa vila nandiwagombola,

nandiwachema hemwe kwa matagwa ga hemwe, namwe ndo wa heni.

2 Homkola kuli mazi tendema,

ndowa hamwe na hemwe,

homkola kuli nzanda,

haziwasumya kwa mong'ho.

Homjenda kuli chiluli,

hamlakazwa,

milapi ja chiluli hajiwadumya.

3 Kwa vila heni ndo Mkulu Nguluwi, Nguluwi wa hemwe,

Yelile wa Isilaeli, Mlohozi wa hemwe.

Ndoilavya isi ya Misili kota fidiya ya hemwe,

ndoilavya Kushi na Seba leka muwe milejehe.

4 Kwa vila hemwe mna lutogo na kuhulichizwa hali heni,

nandiwapa uganililo na igano,

nani ndanguwaleka wanhu wanji leka ndiwe na hemwe,

ndanguwaleka wanhu wa isi zinji honhu ha kikala kwa hemwe.

5 Mleche kudumba kwa vila nda hamwe na hemwe,

ndowegala walelwa wa hemwe kulawa kolilawilaga isanya,

ndowakungajiza hemwe kulawa kolizinjilaga isanya.

6 Ndoilonjela kasikazini, ‘Waleche woche,’

na kusini, ‘Uleche kuwalemeza’

Muwahilule wana wa heni kulawa kutali,

kulawa chila honhu muisi,

7 chila yumwe yawele nakachemigwa kwa itagwa lya heni,

yondimlumbile na kumdita,

kwa chiwalo cha ukulu wa heni."

8 Muwegale kumwando wanhu wa heni,

wawele wana meho ila hawalingona,

wana makutu ila hawalinguhulika.

9 Wanhu weng'ha wa isi zeng'ha wekungajize hamwe,

nhanzi zeng'ha ziting'hane.

Whaani hali milungu ja hewo yalinguweza kuwikula gawele nagalawila?

Whaani yalinguweza kutulajila gawele golawila sambi?

Wawegale walolezi wa hewo leka kutawiza kota nawadita ahyo,

leka wanji wahuliche na kulonga, "Wangukomya."

10 Mkulu Nguluwi kangulonga hino,

"Hemwe Waisilaeli ndo walolezi wa heni,

nandiwahagula leka muwe vitumagwa wa heni,

leka mnzele na kung'hunda,

kota ndiliyeka ndo Nguluwi.

Haduhu mlungu yawele nakawahika kuwabaho, ila heni,

ne haduhu yawele kochikala kwa mhela winji kusinda heni.

11 Heni ndiliyeka ndo Mkulu Nguluwi,

haduhu mlohozi yunji, ila heni.

12 Nambika hazelu na kulohola na kuwikula,

heni, siwele mlungu mjenzi hali hemwe.

Hemwe mwa walolezi wa heni.

13 Heni ndo Nguluwi na ndowa Nguluwi mazuwa gose.

Haduhu yalinguweza kusulupuka kulawa kuli moko wa heni uwele na mong'ho.

Hondidita, whaani yoweza kulemeza?"

14 Mkulu Nguluwi, Mlohozi wa hemwe,

Yelile wa Isilaeli, kangulonga hino,

"Kwa chiwalo cha hemwe ndowalajiza wamizi kuluta Babuloni,

na kuwegala hano Wababuloni kota wapogozi wa ngondo,

kuli meli ziwele nawazona kota ndo lutogo kwa hewo.

15 Heni ndo Mkulu Nguluwi, Yelile wa hemwe,

ndiilumbile Isilaeli, Mndewa wa hemwe."

16 Mkulu Nguluwi ndo nakawika nzila kuli bahali,

nzila hagati ha nhigu ng'hulu,

17 nakawakopola wamizi wawele na mituka na falasi wa ngondo,

chilundo cha wamizi na wamizi wazidahe.

Nakawagwisa, hawoweza kwinuka kahi,

nakawadumya na kuwazimya kota utambi wa chenje.

Ayu ndo Mkulu Nguluwi yalingulonga,

18 "Mleche kukumbuchila mbuli zikolile,

ne kijesa kuwala mbuli za katali.

19 Mlole, ndodita mbuli inyale.

Yokoleka sambi baha,

namwe moweza kuyona.

Ndodita nzila kuli chiwala,

na kuwika nzanda zilinguchililika mazi kugunuche.

20 Migongolo ja kisolo jonyhulichiza,

mikanhu na mituwe,

kwa vila ndowika mazi kugunuche,

na nzanda kuli chiwala,

leka kuwanweza mazi wanhu wa heni wondiwahagule,

21 wanhu wondiwalumbile kwa chiwalo cha heni,

leka wawikule lutogo lwa heni!"

22 "Hemwe walelwa wa Yakobo, kukomya namnhoka,

hamlingulutilila kundanda heni.

23 Hamngalile ming'holo ja hemwe kwa chiwalo cha nhambiko za kulakazwa,

ne kunyhulichiza kwa nhambiko za hemwe.

Siwaditile mkole mijito kwa kugana ndolendole,

ne kuwatunya kwa kugana ubani.

24 Hamgulile ubani woneche uwele na unhunyhililo kwa chiwalo cha heni,

ne kumha heni kwa igano mafuta ga migongolo ja nhambiko za hemwe.

Ila gehile ga hemwe nagawa mhomholo kwa heni,

na kunhunya ng'hatu kwa nongwa za hemwe.

25 Ndo nene hela ndilingusa gehile ga hemwe,

kwa chiwalo cha nene baha,

silingugakumbuchila kahi gehile ga hemwe.

26 "Mndonjele kota mna nongwa na heni,

muye tiwuze,

mlavye ulonjelezi wa hemwe leka mpegwe hachi ya hemwe.

27 Mhaza wa hemwe wa mwaluko nakadita gehile,

vilongozi wa hemwe nawambelenhuka heni.

28 Ahyo nandiwadita watambika wa hemwe wawe wakokomoche,

nandiwalavya wanhu wa Yakobo leka wadumigwe,

ena, nandiwaleka Waisilaeli wabezigwe."