1 Wawele na hachi wangubagamaga,

na haduhu ne munhu yalingijesa mnhumbula kuwala alyo,

wanhu walingumfugamila Nguluwi wangusigwa,

haduhu ne yumwe yalinguvizela,

kota wawele na hachi nawosigwa leka waleche kufichigwa na magazo.

2 Wanhu walinguwinza nzila ya hachi,

wowa na kikala goya na kwesela kuli chilaga.

3 Ila Mkulu Nguluwi kangulonga,

"Muye hano hemwe wahawi,

hemwe wang'hondwa na wahonzolomo mnyhulichize.

4 Ndaze, mwangijesa kota mwangumbeza whaani?

Whaani mlingumseka kwa kubeza,

na kumlavila myango za hemwe?

Ndaze, hemwe hamuwele wana wa wabelenhuche,

lulelo lwa wahadi?

5 Hemwe mna maya ga kuwasa na wadala kuli migodi ja mialoni,

hasi ha chila igodi liwele na nhagala hawele mwangujifugamila milungu ja hemwe.

Mwanguwakopola wana wa hemwe kota nhambiko kwa jimalukolo ja hemwe kuli mibindi,

na kuli mitalawe jiwele na mhalika.

6 Mwanguhagula maganga madeche kuli mibindi,

kuwa ndo milungu ja hemwe.

Mwangugaboholela nhambiko za chakunwa

na kugahilichila nhambiko za nyhule.

Ndaze, ndutilile kuwa na isungu na hemwe kwa mbuli zeng'ha azi zomlingudita?

7 Namuwika vinhanda vya hemwe mchanya mwa vidunda vikulu,

namluta ako kuchanya kuwasa na wahonzolomo na kulavya nhambiko.

8 Kumbele mwa lwizi na fulemu zake

namniniza limalukolo lya hemwe.

Mwangundeka, namviwika goya vinhanda vya hemwe na kuvidita viwe vigazi.

Mwangudita ilagano na hewo wawele namvigana vinhanda vya hewo.

Amo mwangigutiza maya ga hemwe gehile

kuno mwangulilola lukami limalukolo lya hemwe.

9 Mwangibakaliza vinhunyhililo kwa winji,

hamba mwanguluta kumfugamila Moleki.

Mwanguwalajiza wasenga wa hemwe walute aku na ako,

kupala milungu ja kujifugamila,

mbaka kuli isi ya wabagame nawafika.

10 Namtoka kwa majendo ga hemwe,

ila hamtweguche nhumbula,

nampata mong'ho unyale,

ahyo hamuwele habehi kubagama.

11 "Namumdumba na kukabuswa na whaani,

mbaka namlonga udesi,

na kuleka kukumbuchila heni,

na kuleka kijesa kuwala heni?

Heni siwagazile hemwe kwa mhela winji,

hanji acho ndo chiwalo namleka kundumba.

12 Mwangijesa kota mwangudita goya,

ila ndogawika hazelu madito ga hemwe,

najo milungu ja hemwe hajiweza kuwatanza chinhu.

13 Homlila kwa kuchilanda utanzi,

chilundo cha jimalukolo ja hemwe,

hachiweza kuwalohola.

Mbeho yochiwembelusila kutali,

ena, yochitaga kutali.

Ila wawele wobilimila kikala goya kwa heni,

woihalila isi,

chidunda cha heni chelile chowa cha hewo."

14 Mkulu Nguluwi kangulonga hino,

"Mzenje! Mzenje! Muiwiche goya nzila!

Muse vinhu vyeng'ha mnzila vilinguwalemeza wanhu wa heni kukola."

15 Ahi ndo vyoyalingulonga Nguluwi Yawele Kuchanya,

yalingikala mazuwa gose na yawele itagwa lya heye ndo Yelile,

"Heni ndangikala ako kuchanya, honhu helile,

nda hamwe na walingulongaga gehile ga hewo na walingunyenyetela.

Heni ndowakangaza nhumbula walingunyenyetela,

ndowapa mong'ho walonjile gehile ga hewo.

16 Silutilila kuwalonjeleza

ne kuwazudila mazuwa gose,

kwa vila hewo wowa ng'hochele hali heni,

nani ndo ndiwapele lweselo lwa heni lwa ukomu.

17 Nandiwazudila hewo kwa chiwalo cha gehile na maya ga hewo,

nandiwagaza hewo na kuvisa kumeho kwa heni na kuzudila,

ila nawalutilila kuwinza nzila za hewo wawo.

18 Nandizona nzila za hewo, ila ndowadita wapone,

ndowalongoza na kuwahembuliza hewo walingulombocheza.

19 Ndowadita wembe lwimbo lwa lutogo.

‘Kikala goya, kikala goya,

kwa wawele kutali na wawele habehi.’

Ndowadita wapone.

20 Ila wehile ndo kota bahali itiguche,

iwele haiweza kusindamala,

nhigu zake zanguhombaga nhope na wavu."

21 Nguluwi wa heni kangulonga hino,

"Wanhu wehile siwapa kikala goya."