1 Winuche gwa Yelusalemu ulangaze

kwa vila lumuli lwangulawa kwa chiwalo cha hegwe,

ukulu wa Mkulu Nguluwi wangukulangazila.

2 Lole, jiza loigubika isi,

jiza totolo lowagubika wanhu wa isi,

ila Mkulu Nguluwi kokulangazila,

ukulu wa heye wokoneka kwa hegwe.

3 Wanhu wa isi na wandewa wowinza lumuli lwa hegwe,

lumuli lwa hegwe lwa kubwemwenzuka.

4 Winule meho ga hegwe ulole banzi zeng'ha,

weng'ha wangikungajiza na kuya kwa hegwe,

wasongolo wa hegwe wanguya kulawa kutali,

wahinza wa hegwe wa mmoko kota vyali.

5 Aho ndo kokona na kumema usangalalo,

nhumbula ya hegwe yokakama kwa luchenze,

kwa vila lufufu lwa wanhu wa isi logaligwa kwa hegwe,

kwa kukolela kuli bahali lufufu lokuya kwa hegwe.

6 Vilundo vya ngamiya vyomema kuli isi ya hegwe,

ena, ngamiya kulawa Midiani na Efa.

Wanhu kulawa Sheba wokuya,

wokugalila zahabu na ubani,

kuno wowikula lutogo lwa heni Mkulu Nguluwi.

7 Vilundo vya ming'holo ja Kedali vyokungajizwa na kugaligwa kwa hegwe,

koweza kujilavya ming'holo milume ja Nebayoti kwa chiwalo cha nhambiko,

nhambiko ilingukundigwa honhu ha kulavila nhambiko ha Nguluwi,

Mkulu Nguluwi kowika ukulu kuli ng'handa ya heye yelile.

8 Whaani awo walinguwembeluka kota ng'hungugu,

kota ng'hunda vyozilinguguluka kuluta kuli vimvulila vyawo?

9 Meli zanguya kulawa kuli isi za kutali,

kuno zilongolwe na meli za Talishishi,

zanguwegala wana wa hegwe,

hamwe na sendi na zahabu za hewo,

kwa lutogo lwa Mkulu Nguluwi, Nguluwi wa hegwe,

kwa lutogo lwa Nguluwi, Yelile wa Isilaeli,

kwa vila nakakudita uwe na ukulu.

10 Mkulu Nguluwi kangulonga,

"Wajenzi wozizenga unyale ng'hanzi za hegwe,

wandewa wa hewo wokukolela mijito,

hanga kwa ng'halazi ya heni nandikutowa,

ila kwa igano lya kwimilila lya heni ndokonela isungu.

11 Lwizi lwa hegwe lowa mwanzi mazuwa gose,

nechilo na nemisi haluhindigwa,

leka wanhu wa isi wakugalile lufufu,

kuno welongoze na wandewa wa hewo.

12 Chila undewa ama wanhu wa isi wohambe wakukolele mijito wowifigwa,

wodumigwa ng'hatu.

13 "Kogalilwa lufufu lwa chihulo cha Lebanoni,

mbawo za mibeloshi na mivinje na misonobali,

leka kuinoliga Ng'handa ya heni Yelile,

kuidita ng'handa ya heni iwe na ukulu.

14 Walelwa wa wala wakubunzile,

wokuya na kufugama hali hegwe,

wala weng'ha wakubezile,

wofugama hali magulu ga hegwe.

Wokuchema, ‘Muji wa Mkulu Nguluwi,’

‘Siyoni muji welile wa Isilaeli.’

15 "Hanga nawali ulechigwe na kuzudilwa,

haduhu munhu yawele kuli majendo yawele nakakola kwa hegwe,

lelo ndokudita uwe na lutogo mazuwa gose,

kowa muji wa kusangalala kwa lulelo lweng'ha.

16 Wanhu wa isi zinji na wandewa wokulolela,

kota mamo vyoyalingonyeza chali cha heye.

Aho ndo kovizela kota heni Mkulu Nguluwi, ndo mlohozi wa hegwe,

Mbele na Mong'ho wa Yakobo, ndo mgombozi wa hegwe.

17 Ndokugalila zahabu honhu ha shaba,

na sendi honhu ha chuma,

na shaba honhu ha migodi,

na chuma honhu ha maganga.

Kikala goya kokulongoza hegwe,

kutanganika kowa ndo mndewa wa hegwe.

18 Kitowa hakuweza kuhulikwa kahi kuli isi ya hegwe,

ne kuwifya na kudumya kuli mbaka ja hegwe.

Koweza kuzichema ng'hanzi za hegwe, ‘Ulohozi,’

na lwizi ja hegwe, ‘Lutogo.’

19 "Hauweza kuligana kahi isanya kukulangazila nemisi,

ne nyelezi kukulangazila nechilo,

kwa vila heni Mkulu Nguluwi ndowa lumuli lwa hegwe mazuwa gose,

heni Nguluwi wa hegwe ndowa ukulu wa hegwe.

20 Lumuli lwa hegwe lwa nemisi haluzinga kota isanya,

ne nechilo lumuli lwa hegwe halubilabila kota nyelezi,

kwa vila heni Mkulu Nguluwi ndo lumuli lwa hegwe mazuwa gose,

na mazuwa ga hegwe ga masinzo goduma.

21 Wanhu wa hegwe weng'ha wowa watanganiche,

isi ayi yowa ya hewo mazuwa gose.

Hewo ndo izuchila lyondilinyalile,

mijito ja moko ga heni kwa chiwalo cha ukulu wa heni.

22 Yawele mdodo hali hemwe kowa nhanzi,

yawele mdodo kusinda weng'ha kowa wanhu wa isi wawele na mong'ho.

Heni ndo Mkulu Nguluwi,

mhela houfika ndogeneza gano himahima."