1 Awu ndo usenga wa Mkulu Nguluwi kuwala isi ya Misili.

Mkulu Nguluwi nakakwina mchanya mwa ng'hungugu ilinguluta himahima,

nakaluta mbaka kuli isi ya Misili.

Jimalukolo ja milungu ja Misili jokakama hali heye,

na wanhu wa isi ya Misili wokwajiliza kitumbila kwa hewo.

2 Mkulu Nguluwi nakalonga,

"Ndokwambuza kilewa hali Wamisili,

msongolo kochitowa na mkulugwe,

ivyazi limwe lyochitowa na ivyazi linji,

goloko kochitowa na goloko wa heye,

wanhu wa muji umwe wochitowa na wanhu wa muji wunji,

wanhu kulawa kuli mkowa umwe wochitowa na wanhu kulawa kuli mkowa wunji.

3 Wamisili wotweguka nhumbula,

ndogawifya majesa ga hewo.

Wopala utanzi kuli jimalukolo na kwa mihoka,

kwa walaguzi na kwa walingulonga na mihoka.

4 Ndowawika Wamisili mmoko mwa mkulu yawele na nhumbula yihile,

mndewa yang'hang'hale kowalongoza hewo.

Heni Mkulu Nguluwi Mbele na Mong'ho, nandonga."

5 Mazi ga lwanda lwa Naili gokala,

lwanda lokala ng'hatu kwa isanya.

6 Nzanda zokala ng'hatu,

Vikolola vya Misili vyonung'ha,

kwa chiwalo cha kuswinha kwa migugu na misolo mikulu.

7 Mizuchila jeng'ha jiwele najinyaligwa hafungo ha lwanda lwa Naili jokala,

hamba jowembeluswa na kwajilila.

Mbena za chila mgunda uwele hafungo ha lwanda lwa Naili zokala,

zowembeluswa na kwajilila.

8 Walingulowa somba wolila na kulombocheza,

wala weng'ha walingutoza ndowano kuli lwanda lwa Naili.

9 Walingutawa nguwo za kitani wogozola,

kwa vila wowahela nyuzi kwa chiwalo cha kutawa,

10 nawo walingutanza mijito ajo wowa na masinzo,

ahyo weng'ha wotweguka nhumbula.

11 Vilongozi wa Soani ndo wapoka ng'hatu,

walingumlonjela mbuli za luhala Falao, mndewa wa Misili wangulavya ulonzi wa chipoka.

Mwanguweza ndaze kumlonjela Falao,

"Heni nda yumwe wa wanhu wawele na luhala,

mlanguswa wa wandewa wa katali?"

12 Falao, wakohi lelo wanhu wa hegwe wawele na luhala?

Walonjele lelo wakulajile na kukuzelesa,

chiwele Mkulu Nguluwi Yawele na Mong'ho,

choyalingugana kuwaditila wanhu wa Misili.

13 Vilongozi wa Soani nawawa wapoka,

wakulu wa Memufisi nawahadigwa.

Wala wawele ndo msisi wa nhanzi za hewo,

nawawajiliza wanhu wa isi ya Misili.

14 Mkulu Nguluwi nakazitigula nyhala za vilongozi wa Misili,

ahyo nawawalongoza wanhu wa hewo kwa kuwajiliza,

nawawadita wawe wozebeduka,

kota wagalile walinguwasa kuli wavu waudechile.

15 Haduhu munhu yoneche kuli isi ya Misili,

hawele chilongozi ne munhu wa hihi hela,

yalinguzeleka lukami ne mzunwa,

yalinguweza kudita mbuli yoneche inojile.

16 Kuli zuwa alyo Wamisili wodumba kota wadala. Wokakama kwa lunhwinhwi howomona Mkulu Nguluwi Yawele na Mong'ho nakagolola moko wa heye kwa hewo. 17 Wanhu wa isi ya Yuda wowadita Wamisili wawe na lunhwinhwi, chila yumwe yawele kohulika kuwala wanhu wa isi ya Yuda, kodumba kwa chiwalo cha mbuli iwele Mkulu Nguluwi Yawele na Mong'ho nakanuwila kuwaditila. 18 Kuli zuwa alyo miji jihano ja Misili jolonga ndonga ya Kanaani na kilaha kumfugamila Mkulu Nguluwi Yawele na Mong'ho. Muji umwenga wochemigwa Muji wa Isanya. 19 Kuli zuwa alyo kowa na honhu ha kulavila nhambiko kwa chiwalo cha Mkulu Nguluwi hagati ha Misili na ilingo lya kukumbuchila lya Mkulu Nguluwi kuli mbaka wa Misili. 20 Honhu aho ha kulavila nhambiko howa ulajilo na ulolezi wa kusumya kwa chiwalo cha Mkulu Nguluwi Yawele na Mong'ho kuli isi ya Misili. Wanhu howomlilila Mkulu Nguluwi kwa chiwalo cha walinguwabunza, Nguluwi kowegalila mlohozi yawele kowalewela. 21 Ahyo, Mkulu Nguluwi kochizelesa yuye kwa Wamisili na kuli zuwa alyo womkunda Mkulu Nguluwi. Womfugamila kwa kumlavila nhambiko za nyhule na nhambiko za kulakazwa, wolaha hali Mkulu Nguluwi na kweneza kilaha ako.

22 Mkulu Nguluwi kowagaza wanhu wa isi ya Misili kwa utamwa. Womgalamchila Mkulu Nguluwi, naye kohulika kulanda kwa hewo na kowalohola. 23 Kuli zuwa alyo kowa na nzila ng'hulu kulawa kuli isi ya Misili mbaka kuli isi ya Ashulu. Waashulu wowajendela Wamisili na Wamisili wowajendela Waashulu. Wamisili na Waashulu womfugamila Nguluwi hamwe. 24 Kuli zuwa alyo kahi Isilaeli yowazigwa hamwe na Misili na Ashulu, wanhu wa isi azi zidatu wowa utambichizo kuli isi. 25 Mkulu Nguluwi Yawele na Mong'ho kowatambichiza, yolonga, "Utambichizo uwe kwa Wamisili, wawele ndo wanhu wa heni na kwa Waashulu, wawele ndo mijito ja moko ga heni na kwa Waisilaeli, wawele ndo wanhu wa heni ndiwahagule."