1 Mbuli yihile youfika muji wa Samaliya, muji ukulu wa Isilaeli,

uwele mchanya mwa chigongo chiwele hagati ha ibindi liwele na mboto.

Wanhu walingikala mgati mwa muji awo wangugala lukami na walingidaya,

ndo muji unojile lukami na uwele na ukulu,

ila mhela umwenga wokwajilila kota uluwa ulinguswinha na kukala!

2 Mkulu Nguluwi ndo yazidahe na kana mong'ho,

kota nhonya ya maganga na nhigu ng'hulu,

kota nhonya ilingutowa lukami na kigala mazi tendema.

Kwa moko wa heye kowataga wanhu awo kuli misanga.

3 Kidaya kwa vilongozi walingugala wa Efulaimu,

kobigangwa kuli misanga.

4 Lutogo lwa hewo lokuka kota uluwa ulinguswinha.

Ukulu uwele naulongoza kuli ibindi liwele na mboto,

wowa kota tini zipile ung'hali mhela wa chipalangule,

wone munhu yazone kangukwanyulaga na kulya mhela wuwo.

5 Kuli mhela awo Mkulu Nguluwi Yawele na Mong'ho,

kowa ndo itaji lya ukulu kwa wanhu wa heye wawele wosigala wakomu.

6 Kowalongoza walingwamula kuli chitala leka wadite hachi,

kowapa mong'ho walingwamila muji.

7 Vilongozi awo wanguzebeduka na kugwa,

kwa chiwalo cha kunwa lukami divai.

Watambika na waloli kahi wanguzebeduka,

kwa chiwalo cha kunwa lukami divai.

Hawalingijesa goya,

wangulota ila hawalinguvizela mana yake,

kuli kulavya utaguso hawalingudita hachi.

8 Visaga vyeng'ha navimema vyowadechile,

haduhu honhu honeche halihela wavu.

9 Hewo wangumbeza heni na kumbuza,

"Ayu mloli kangugana kumlangusa whaani?

Kangumlonjela whaani usenga wa heye?

Ndaze, hetwe twa wana wadodo,

walechezwe kong'ha kuli mazuwa aga ga habehi?

10 Kangutulangusa kota wana wadodo,

malajizo aga na malajizo gayage,

msitali awu na msitali uyage,

chino na chila!"

11 Lelo! Mkulu Nguluwi kolonga na wanhu awa,

kwa nzila ya wanhu wa ndonga ilivinji,

walingulonga ndonga za chijenzi.

12 Ila heye nayali yawalonjele,

"Ndowalajila honhu ha kwesela,

ndowadita mwesele hano hemwe mtochile.

Hano ndo honhu ha kwesela."

Ila hewo hawaganile kuhulichiza.

13 Lelo, ulonzi wa Mkulu Nguluwi kwa hewo wowa,

malajizo aga na malajizo gayage,

msitali awu na msitali uyage,

chino na chila!

Wojeza kubilima ila wogwa kumbele,

wobeneka na kugwilizwa.

14 Lelo, mhulichize ulonzi wa Mkulu Nguluwi,

hemwe mlingubeza,

mlinguwalongoza wanhu wa Yelusalemu,

15 Hemwe mlingidaya namdita ilagano na kubagama,

namdita ilagano na isi ya wabagame!

Mwangulonga kota magazo hogokuya hagowafika,

kwa vila namuudita udesi kota ndo kitumbila kwa hemwe,

uhadi ndo ngawo ya hemwe!

16 Lelo, Mkulu Nguluwi kangulonga hino,

"Ndanguliwika iganga lya msisi kuli muji wa Yelusalemu,

iganga liwele nzinzili,

iganga lya mwaluko kuli msisi lya sendi nyinji,

kwa chiwalo cha msisi uwele nzinzili,

yalingulitumbila hodita himahima.

17 Ndotumiya hachi kota chipimilo cha heni,

ndotumiya kutanganika kupimila.

Nhonya ya maganga yofajilila kutali udesi womlingitumbila,

mazi tendema gowifya honhu ha hemwe ha kivisa.

18 Aho ilagano lya hemwe lyomliditile na kubagama lyokusigwa,

na ilagano lya hemwe na isi ya wabagame lyokusigwa.

Magazo makulu hogokuya, gowagwisa.

19 Chila hogokolela kwa hemwe gowavaba,

nago gokola chila mitondo na chila nemisi na chila nechilo,

gowavaba kulawa mwaluko mbaka kuduma."

Kuhulika hela usenga awu kowa ndo kukabusa.

20 Kwa hemwe yowa kota yalingigolola mchanya mwa chinhanda chidodo ng'hatu,

ama kigubika igolole lidodo ng'hatu.

21 Mkulu Nguluwi kokuya na kukwambuza usumigwe kota vyoyawaditile Wafilisti kuli chidunda cha Pelasimu,

kowa na ng'halazi ing'hang'hale, kota vyoyaditile kuli ibindi lya Gibeoni.

Hoyochidita chowa cha kububuwaza lukami, hachiwele cha hihi hela.

22 Lelo, mleche kubeza,

leka minyololo ja hemwe jileche kuwa itunyo ikulu ng'hatu kwa hemwe.

Mkulu Nguluwi Yawele na Mong'ho,

nakanuwila kuidumya isi yeng'ha.

23 Muwiche goya makutu ga hemwe,

mhulichize goya ulonzi wa heni.

24 Ndaze, yalingulima kangunyalaga mazuwa geng'ha?

Ndaze, kangulutilila kulima na kuselega mgunda wa heye mazuwa geng'ha?

25 Hebu! Hoyosinda kuselega mgunda wa heye,

kangunyalaga nyhule za bizali na jila,

konyala ngano na shayili kuli misitali,

na kuli mbaka ja mgunda konyala mizuchila jinji.

26 Munhu ayo kanguvizela choni cha kudita,

kwa vila Nguluwi wa heye kangumlangusa.

27 Bizali hambe ipululwe kwa chuma ne jila kwa mutuka wa misenga!

Ila bizali yangupululwa kwa ngoda na jila kwa nyhimbati.

28 Nyhule yanguganigwa ibalaswe leka kugongomanya ibumunda,

ahyo, munhu halingulutilila kupulula mazuwa gose.

Kanguvizela ndaze vyoyopulula kwa guludumu,

ne kuwifya ng'hatu nyhule za ngano.

29 Uwanzi awu wangulawa kwa Mkulu Nguluwi Yawele na Mong'ho.

Kiwika goya kwa Nguluwi ndo kwa kububuwaza,

luhala lwa heye nalwenela ng'hatu.