1 Nguluwi kangulonga hino,

"Hemwe mlingikala mhwani mnyamalile mnyhulichize!

Hemwe wanhu wa isi muwe na mong'ho kahi!

Milajile, mlongase na heni,

tuting'hane hamwe honhu ha utaguso.

2 Whaani yawele nakamhagula mndewa yumwe kulawa kolilawilaga isanya,

munhu yawele kangusumya honeche hoyoluta?

Nguluwi kanguwawikaga wanhu wa isi na wandewa kuli moko ga heye.

Kwa ipanga lya heye kanguwatemanga wawe kota nhimbwisi,

kwa ipinde lya heye kanguwasambalulaga kota mhumba.

3 Heye kanguwawinzaga na kulutilila ne kulumizwa,

kangulutaga himahima kota magulu ga heye hagalingudoliza hanyi.

4 Whaani yaiditile mbuli ayi na kweneza?

Whaani yawichile mhela wa chila chilingulawila?

Heni Mkulu Nguluwi ndo nditile ahyo,

heni ndo wa mwaluko,

na wa kuduma.

5 "Walingikala mhwani nawagona gonditile, nawadumba,

isi yeng'ha yangukakama kwa lunhwinhwi.

Wanhu weng'ha nawekungajiza na kuya.

6 Chila yumwe kangumtanzaga myage,

na kumlonjela,

‘Gwa, wikangaze nhumbula!’

7 Yalinguponda chuma kangumkangazaga nhumbula yalinguponda zahabu,

naye yalingulihonda limalukolo kwa nyundo, kangumkangazaga nhumbula yalingulilumba kwa msumali,

weng'ha wangulongaga, ‘Ndo mijito jinojile ng'hatu!’

Hamba wangulitowelela kwa misumali leka lileche kutigasika.

8 "Mhulichize hemwe Waisilaeli, vitumagwa wa heni,

hemwe walelwa wa Yakobo wondiwahagule,

hemwe walelwa wa Abulahamu goloko wa heni,

9 hemwe wondiwahagule kulawa kuli kuduma kwa isi,

hemwe wondiwalonjele, ‘Hemwe mwa vitumagwa wa heni,’

siwatajile, ila nandiwahagula.

10 Lelo, mleche kudumba, kwa vila nda hamwe na hemwe.

Mleche kukabuswa, kwa vila heni nda Nguluwi wa hemwe.

Ndowadita muwe nzinzili na kuwatanza,

ndowamila na moko wa heni utanganiche.

11 "Ena! Weng'ha wawele na ng'halazi kuwala hemwe,

wobasigwa soni na kudeuzwa.

Weng'ha walingitwanza na hemwe wodumigwa.

12 Hanga mowapala wang'honyo wa hemwe, hamuwona

wala walingitwanza na hemwe,

hawowa chinhu kwa hemwe.

13 Kwa vila heni ndo Mkulu Nguluwi, Nguluwi wa hemwe,

heni ndo ndilingibata moko ga hemwe ga kudilo,

na kuwalonjela, ‘Mleche kudumba, ndowatanza.’ "

14 Mkulu Nguluwi kangulonga hino,

"Hemwe wanhu wa Yakobo, mwa ng'hochele kota linhu,

hemwe Waisilaeli, mleche kudumba!

Heni Mkulu Nguluwi ndangulonga kota ndowatanza.

Heni nda mgombozi wa hemwe,

Yelile wa Isilaeli.

15 Ndowadita muwe kota chinhu cha kupululila,

chiwele na mizino minji jinyale na jing'hang'hale.

Movipulula vidunda na kuvihondanga,

vigongo movibalasa viwe kota mhumba.

16 Movibeta, mbeho yoviwembelusila kutali,

Namwe mosangalala kwa chiwalo cha heni, Mkulu Nguluwi,

mowona ukulu kwa chiwalo cha heni,

Nguluwi Yelile wa Isilaeli.

17 "Wazunwa na walihela chinhu wangupala mazi,

ila ga haduhu,

myango za hewo nazikala kwa ng'halu.

Ila heni Mkulu Nguluwi ndowedichila,

heni Nguluwi wa Isilaeli, siwaleka.

18 Ndozidita nzanda zilavye mazi kulawa mchanya mwa vidunda vikalile,

na kuli nzasa za kuli mibindi.

Ndokugalula kugunuche kuwe ilamba lya mazi,

isi ng'havu kuwa nzasa za mazi.

19 Ndonyala migodi ako kugunuche,

migodi ja mielezi na mihadasi na mizeituni,

kahi ndowika migodi ja mibeloshi na misonobali,

20 leka wanhu wayone mbuli ayo,

nawo wovizela kota

heni Mkulu Nguluwi nandiidita,

heni Yelile wa Isilaeli nandiidita mbuli ayo."

21 Mkulu Nguluwi, mndewa wa Isilaeli kangulonga,

"Hemwe milungu ja wanhu wa isi migale ulonjelezi wa hemwe,

mlonje utawizo wa hemwe!

22 Migale jimalukolo ja hemwe leka jitulonjele chiwele cholawila,

mtulonjele mbuli za katali nazali ndaze,

leka tijese na kuvizela.

Ama muwikule mbuli zilinguya,

23 mtulonjele chiwele cholawila hamba,

natwe tuvizele kota hemwe ndo milungu.

Mdite chinhu choneche, chinojile ama chihile,

leka tukabuswe na kudumba.

24 Ndikomya ng'hatu, hemwe hamuwele chinhu,

hamlinguweza kudita chinhu choneche.

Yalinguhagula kufugama hali hemwe ka izudizo ng'hatu.

25 "Nandimhagula munhu kulawa kasikazini,

ena, nandimhagula yumwe yawele kokuya Isilaeli kulawa kolilawilaga isanya,

naye kolichema itagwa lya heni.

Heye kowabiga wandewa kota nhope,

kota yalingulumba vinhu vya ilongo vyoyalinguhonda ilongo.

26 Whaani yalonjile aga kulawa mwaluko,

leka hetwe tuvizele?

Whaani yalongole kugawikula,

leka lelo tulonje nakulonga kukomya?

Haduhu ne yumwe wa hemwe yagalonjile,

ne haduhu yawele nakahulika ulonzi wa hemwe.

27 Nandali wa mwaluko kukulonjela Siyoni,

‘Ulole, wa hano!’

Nandimha Yelusalemu msenga wa mbuli inojile.

28 Nandola goya ng'hatu,

ila silingumona yoneche,

haduhu yoneche hali milungu yalinguweza kutanza,

hondiuza haduhu yalinguweza kunyidichila.

29 Ulole, milungu ajo jeng'ha ndo uhadi,

hajilinguweza kudita choneche,

jimalukolo jawo ja kuponda ndo upoka."