1 Zuwa lyanguya liwele wanhu wokwimba lwimbo alu kuli isi ya Yuda,

"Muji wa nzinzili!

Mkulu Nguluwi yuye ndo yalingwamila ng'hanzi zake!

2 Mchumule lwizi ja muji,

leka wanhu watanganiche wenjile.

3 Gwa Mkulu Nguluwi, kwanguwawika hali kikala goya wawele na nhumbula ziwele nzinzili,

kwa vila wangitumbila kwa hegwe.

4 Mitumbile kwa Mkulu Nguluwi mazuwa geng'ha,

kwa vila heye ndo italawe lya kikala goya mazuwa gose.

5 Kanguwadulisaga walingidaya,

kanguudumyaga muji wa hewo uwele kuchanya,

na kuzigwisa ng'hanzi zake kuli nhimbwisi.

6 Walingubunzigwa wojenda amo

na kubiganga kwa magulu gawo."

7 Nzila ya wanhu watanganiche naigoloka,

gwa Nguluwi wa hachi, kwanguiwikaga goya nzila ya hewo.

8 Gwa Mkulu Nguluwi, natujenda kuli nzila za hegwe, ahyo twangukubeteza,

kulikumbuchila itagwa lya hegwe na lutogo lwa hegwe ndo maya ga nhumbula za hetwe.

9 Mhela wa nechilo nhumbula ya heni yangukugana,

mhela wa mitondo ndagugana kulutilila kuwa na hegwe.

Nhaguso za hegwe hozikuya muisi,

wanhu wa isi zeng'ha wochilangusa hachi.

10 Hanga wehile howolajilwa uganililo,

hawalingilangusa hachi,

mbaka kuli isi ya wagoloche wolutilila kudita gehile,

hawochijesa kuwala ukulu wa Mkulu Nguluwi.

11 Gwa Mkulu Nguluwi, nakwinula moko leka kuwazapa,

ila wang'honyo wa hegwe hawalinguwona.

Uwalajile ndaze vyoulinguwonela fihi wanhu wa hegwe, nawo wobasigwa soni.

Chiluli cha ng'halazi ya hegwe, chiwalakaze wang'honyo wa hegwe!

12 Gwa Mkulu Nguluwi, nakutupa kikala goya,

gala geng'ha gotweneze, hegwe ndo ugaditile kwa chiwalo cha hetwe.

13 Gwa Mkulu Nguluwi, Nguluwi wa hetwe,

wakulu wanji nawatulongoza,

ila hegwe uliyeka ndo tulingukuhulichiza.

14 Wanhu awo nawabagama, hawochikala kahi.

Hegwe nakuwatowa na kuwadumya,

nakusa kukumbuchilwa kwa hewo kweng'ha.

15 Gwa Mkulu Nguluwi, nakuwonjeza wanhu wa isi ya hetwe,

ena, nakuwadita wanhu wa isi ya hetwe wonjezeche.

Nakipatila ukulu kwa chiwalo cha gwegwe,

nakonjeza mbaka jeng'ha ja isi.

16 Gwa Mkulu Nguluwi, natukupala lotuwele kuli magazo,

loutuzapile, natukulanda kwa kupwepwa hela.

17 Kota vila mamo yawele na himila yawele habehi kuponda,

vyoyalingusanzalima na kulila kwa usungu,

ndo vyotuwele hali hegwe, gwa Mkulu Nguluwi.

18 Natufichigwa na usungu wa kuponda,

natusanzalima kwa usungu,

ila natuponda mbeho.

Hatuwezile kigala ulohozi muisi,

hatuwezile konjeza wanhu kuli isi ayi.

19 Wabagame wa hegwe wochikala kahi,

ng'huli za hewo zozilipuka.

Hemwe mlingikala kuli nhimbwisi,

mwinuche mtowe iyowe kwa kusangalala.

Kota lungwi lwa mitondo lulingupulika,

kowapa wabagame ukomu unyale.

20 Mlute wanhu wa heni, mwinjile kuli ng'handa za hemwe,

mihindile kuli ng'handa za hemwe,

mivise kwa mhela uchefu,

mbaka kuzudila kwa Mkulu Nguluwi kukole.

21 Mkulu Nguluwi kanguya kulawa haluga ha heye kilanga,

leka kuwatowa wenyeng'haye wa isi kwa gehile ga hewo.

Isi yowika hazelu danda iwele naibohoka mchanya mwake,

hailutilila kuwavisa wanhu wa heye wakopoligwe.