1 Awu ndo usenga wa Mkulu Nguluwi kuwala wanhu walingumbelenhuka heye,

"Mwanguwinza majesa ga hemwe, hagawele ga heni,

mwangulanda kwamilwa na wanhu wa isi zinji, ila hamlingulanda kwa heni,

na mwangulutilila kudita gehile.

2 Namluta Misili kuwalanda utanzi vilongozi wa isi ayo ne kumbuza,

namitumbila kuli wamizi wa mndewa wa Misili, Falao, kuwamila hemwe,

kota wanhu wawele nawekalisa kuli lubehelo lwa igodi kiyamila na ivuche.

3 Ila kwamilwa na Falao kowa soni kwa hemwe,

lubehelo lwa isi ya Misili lowadita hemwe mdeule.

4 Hanga vilongozi wa hewo nawafika Soani,

na wasenga wa hewo kahi nawafika ako Hanesi,

5 weng'ha wobasigwa soni,

kwa chiwalo cha wanhu wa isi wohambe watanze chinhu,

wawele hawalingigala utanzi ne chinhu cha mzidi,

ila kuwegalila soni na kudeula hela."

6 Nguluwi kangulonga hino kuwala migongolo ja Negebu,

"Wasenga wangukola kuli isi ya magazo,

kuli honhu hawele misimba jangikala,

hawele na mizoka jiwele na dunga na mizoka jilingunyonzoka.

Wasenga awo wangukola na lufufu lwa hewo,

mchanya mwa migongo ja midogowi na ngamiya,

kuwahilichila wanhu wa isi wawele hawalingutanza chinhu.

7 Utanzi kulawa Misili haulingutanza chinhu,

ahyo Misili nandiichema hino,

‘Izoka* lilihela mong'ho!’ "

8 Nguluwi nakandonjela,

"Lelo, wandiche usenga awu,

kwa chiwalo cha wanhu wa heni,

leka ukale kwa mazuwa gose.

9 Wanhu awa nawabelenhuka, ndo kota wana wahadi,

wana wawele hawalingugana kuhulichiza malanguso ga Mkulu Nguluwi.

10 Wanguwalonjela wasenga wa Nguluwi na waloli,

‘Mleche kutulonjela kahi choyawalajile Nguluwi,

na mleche kudamla kukomya.

Mtulonjele mbuli zotulingugana kuhulika,

hanga zowa ndo mbuli za udesi.

11 Mgalamche na muileche nzila ya kukomya,

mleche kutulonjela kahi kuwala Nguluwi, Yelile wa Isilaeli.’ "

12 Ahyo Nguluwi, Yelile wa Isilaeli kangulonga hino,

"Namuulema usenga wa heni,

namnuwila kubunza na uhadi.

13 Lelo gehile aga gowegalila hemwe kudumigwa,

kota lukanzi luwele ng'wemang'wema,

luwele na ufa ukulu luwele logwa baho du.

14 Kugwa kwa lukanzi alo,

ndo kota kubeneka kwa vinhu vya ilongo,

vilingubeneka vibi ng'hatu ne kusigala chihande cha kuholela chiluli kuchiko,

ama kudehela mazi kuli ideho."

15 Mkulu Nguluwi, Yelile wa Isilaeli kangulonga,

"Wone mwahangalamchile na kusindamala mwahaloholigwe,

kwa kusindamala na kwa kitumbila kwa heni, mwahawele na mong'ho.

Ila hemwe hamganile.

16 Namlonga, ‘Hebu! Tobilima kwa falasi walingubilima lukami.’

Goya, mobilima na falasi walingubilima lukami,

ila falasi wa wang'honyo wa hemwe, wangubilima ng'hatu kusinda falasi wa hemwe.

17 Wanhu wa hemwe elufu imwe wombilima mwamizi yumwe wa wang'honyo,

na wamizi wahano wa wang'honyo wohega kuwabilimisa hemwe mweng'ha.

Hemwe mweng'ha mobilima,

ila wachefu hela hali hemwe ndo wosigala,

kota izengo lya bendela vyolilinguwa liliyeka,

mchanya mwa chinhembenhembe cha chidunda."

18 Mkulu Nguluwi kangubeteza kuwalajila hemwe isungu,

nakewika goya kuwalechela kwa vila mazuwa gose kanguditaga gawele ga hachi.

Nawatambichizwa wala weng'ha walingitumbila kwa heye.

19 Hemwe wanhu mlingikala Yelusalemu, hamlila kahi. Mkulu Nguluwi kowonela isungu hemwe, homumlanda utanzi wake, naye kowedichila. 20 Hanga Mkulu Nguluwi kowapa hemwe magazo na usungu kota ndo chilyo na mazi, ila lelo momona kahi Mkulu, mlangusa wa hemwe, naye kowalongoza. 21 Mohulika lizi kumbele kwa hemwe lilingulonga, "Nzila ndo ayi, muiwinze." 22 Hamba mojidita jimalukolo ja milungu ja hemwe jibakalizwe sendi na jimalukolo ja hemwe jibakalizwe zahabu jiwe jikokomoche. Mojitoza kutali kota vinhu vikokomoche kuno mlonga, "Mwajilile ng'hatu!"

23 Homnyala nyhadikwa za hemwe, Mkulu Nguluwi kowegalila hemwe nhonya kwa mhela wa heye, nazo zokota na kuwapa mbena nyinji ng'hatu. Migongolo ja hemwe ja kufujigwa najo jopata honhu hakulu ha kudimilwa. 24 Mibuguma na midogowi ja hemwe milume ja kulimila jolya misolo jinojile na chilyo chigongomanyigwe goya. 25 Kuli zuwa alyo liwele ngome za wang'honyo wa hegwe hoziholigwa na wanhu wake kukopoligwa, nzanda za mazi zolavya mazi kulawa kuli chila chidunda na kulawa kuli chila chigongo. 26 Nyelezi yokwaka kota isanya, nalo lumuli lwa isanya lopulika mala saba mzidi wa lumuli lwake lwa chila zuwa, kota vila lumuli lwa mazuwa saba, mhela Mkulu Nguluwi hoyoviwopa vilonda vya wanhu wa heye viwele heye yuye nakambuza.

27 Mlole, mong'ho na ukulu wa Mkulu Nguluwi wangoneka kulawa kutali!

Chiluli na iyosi vyangulajila ng'halazi ya heye,

mlomo wa heye wangulajila kuzudila kwa heye,

kangulonga na ulonzi wa heye wangulakaza kota chiluli.

28 Kangulajiza chivuluvumbi kumwando kwa heye,

kota mazi tendema galinguhola chila chinhu.

Kanguwika lijamu ya falasi kuli mizeze ja wanhu wa isi iwele yanguwalongoza kuli kwajilila.

29 Ila hemwe wanhu wa Yelusalemu mosangalala na kwimba kota vyomlingudita kuli mhela wa nechilo ya mnvina yelile. Mosangalala kota wanhu walingujenda kuno wovina muzichi wa mluli kuluta kuli ng'handa ya Mkulu Nguluwi, Italawe lya Isilaeli. 30 Mkulu Nguluwi kowadita wanhu weng'ha walihuliche lizi lya heye likulu na kuwona mong'ho wa ng'halazi ya heye. Kowa na milapi ja chiluli ching'hang'hale na kubuma na nhigu na nhonya ya maganga. 31 Waashulu howohulika lizi lya Mkulu Nguluwi womema lunhwinhwi na kwa nyhimbati ya heye kowatowa. 32 Chila mhela nyhimbati ya Mkulu Nguluwi hoiwa iwatowa Waashulu, wanhu wa heye wowa wovina muzichi wa ngoma na igombogombo. Nguluwi yuye kochitowa na Waashulu. 33 Ena, honhu ha kumdumya mndewa wa Ashulu nahawichigwa goya kwa mhela winji ukolile. Honhu aho ndo ikulubila likulu na ligazi liwele na chiluli na ngodi nyinji. Mkulu Nguluwi kochibwina chiluli kwa lweselo lwa heye kota maganga ga chikwatilo.