1 Kwa chiwalo cha hegwe Yelusalemu, siweza kinyamalila,

kwa chiwalo cha hegwe Yelusalemu, siweza kusindamala,

mbaka kuloholigwa kwa hegwe kulawile kota kubwemwenzuka,

mbaka kutanganika kwa hegwe kulawile kota chenje.

2 Wanhu wa isi wokona kutanganika kwa hegwe,

wandewa weng'ha wowona ukulu wa hegwe,

kochemigwa kwa itagwa linyale,

itagwa liwele kokupa heye yuye Mkulu Nguluwi.

3 Kowa itaji linojile kwa Mkulu Nguluwi,

itaji linojile lya chiundewa kwa Nguluwi wa hegwe.

4 Hauchemigwa kahi, "Yalechigwe,"

ama, "Isi ya Uchiwa."

Itagwa lya hegwe linyale lyowa, "Yalinguganigwa na Nguluwi" na "Yalinguhesigwa na Nguluwi,"

kwa vila Mkulu Nguluwi nakanojezwa na hegwe,

naye kowa kota mlume wa hegwe.

5 Wanhu wa hegwe woihola isi,

kota msongolo vyoyalinguhesa mdala.

Ahyo, Mkulu Nguluwi konojezwa na hegwe,

kota mlume vyoyalingunojezwa na mche wa heye.

6 Mchanya mwa ng'hanzi za hegwe, gwa Yelusalemu, nandiwawika wamizi,

wawele mazuwa gose, nemisi na nechilo hawonyamalila.

Womdita Mkulu Nguluwi yakumbuchile kilagana kwa heye,

mhela weng'ha ne kuleka.

7 Waleche kumha heye mhela wa kwesela,

mbaka hoyouwika nzinzili muji weng'ha wa Yelusalemu,

na kuudita uwe lutogo lwa isi yeng'ha.

8 Mkulu Nguluwi nakelaha,

ena, kwa ludali lwa heye nakalonga,

"Siwapa kahi wang'honyo wa hegwe nyhule za hegwe,

ne wajenzi hawonwa kahi divai ya hegwe

viwele nakugazika ng'hatu kuvipata avyo.

9 Ila hegwe ubetile nyhule azo,

kolya na kunhogola heni Mkulu Nguluwi.

Ukwanyule zabibu azo,

konwa divai kuli lugagala lwa honhu helile ha heni."

10 Wenyeng'haye wa Yelusalemu, mlawe,

mlawe kwa kukolela kuli lwizi,

mgongomanye nzila kwa chiwalo cha wanhu wa hemwe walinguhiluka!

Mgongomanye kahi! Mgongomanye kahi nzila ng'hulu na kusa maganga geng'ha.

Mwinule bendela ya ulajilo kwa chiwalo cha wanhu wa isi zinji.

11 Mkulu Nguluwi nakawikula kwa wanhu wa isi zeng'ha,

"Muwalonjele wanhu wa Yelusalemu kota,

mgombozi wa hewo kanguya,

ndolendole ya heye ya hamwe na heye,

na chonolo cha heye cha kumwando kwa heye."

12 Wanhu wa Yelusalemu wochemigwa,

"Wanhu welile" na "Wagomboligwe na Mkulu Nguluwi."

Yelusalemu kochemigwa,

"Muji ulinguganigwa na Nguluwi" na "Muji uwele haulechigwe na Nguluwi."