1 Mwinuche! Mwinuche!

Hemwe wanhu mlingikala kuli muji welile wa Yelusalemu!

Muwe na mong'ho kahi,

leka mlajile kota muji wa hemwe ndo unojile na uwele na ukulu.

Haduhu wajenzi wohambe wamkunde Nguluwi ama wakokomoche,

wawele wokwinjila kuli muji wa hemwe kahi na kuwavaba.

2 Mibaguse nhimbwisi mwinuche,

midite kota wandewa hemwe wanhu wa Yelusalemu.

Michumule minyololo jiwele namuwopigwa kuli singo za hemwe.

3 Mkulu Nguluwi kangulonga hino, "Lomditigwe kuwa wapogozi hailavigwe sendi kwa chiwalo cha hemwe, ahyo haduhu sendi iwele yolipigwa kwa chiwalo cha kilejeha kwa hemwe. 4 Mhela winji ukolile hemwe wanhu wa heni namluta Misili na kikala ako, lelo Waashulu nawawabunza hemwe ne chiwalo. 5 Lelo ndangupata mzidi wachi kwa kuwona wanhu wa heni nawahilikwa kuli upogozi? Hewo walinguwalongoza wangidaya, ila itagwa lya heni lyangulutilila kubezigwa chila zuwa. 6 Ahyo wanhu wa heni wonzela, zuwa alyo wovizela kota heni ndilingulonga, ‘Ndabaho!’ "

7 Lole vyoilingunojeza,

kumona msenga kanguya kulawa kuli chidunda,

kuno kanguwikula mbuli inojile,

mbuli inojile ya kikala goya!

Kanguwikula kuwala ulohozi!

Kanguulonjela muji wa Yelusalemu,

"Nguluwi wa hegwe kangulongoza!"

8 Wamizi wa muji wangulandula lizi,

wanguchemeleza kwa kusangalala,

kwa vila wangona kwa meho ga hewo wawo,

kuhiluka kwa Mkulu Nguluwi kuli muji wa Yelusalemu!

9 Mtowe iyowe lya luchenze,

hemwe mahame ga Yelusalemu,

kwa vila Mkulu Nguluwi nakawahembuliza wanhu wa heye,

nakaugombola muji wa Yelusalemu.

10 Mkulu Nguluwi nakaulajila mong'ho wa heye welile,

hali wanhu wa isi zeng'ha.

Kowalohola wanhu wa heye,

na isi yeng'ha yololela.

11 Muche! Muche! Muche hano.

Mleche kudoliza chinhu choneche chikokomoche!

Muche kuno Babuloni!

Miyelize hemwe mlingupika vinhu vya Mkulu Nguluwi.

12 Mhela awu hamlawa himahima,

ne hamkuka kwa kubilima,

kwa vila Mkulu Nguluwi, Nguluwi wa hemwe kowalongoza,

na kuwamila hemwe kuli banzi zeng'ha.

13 Nguluwi kangulonga hino,

"Chitumagwa wa heni kodita kwa luhala,

kotogoligwa na kopata ukulu.

14 Wawele womona wotinhuka,

kwa vila kumeho kwa heye kowifigwa,

howa kahi na lukuli kota lwa munhu.

15 Ila kowabubuwaza wanhu wa isi nyinji.

Wandewa wobubuwala kwa chiwalo cha heye,

kwa vila wokona mbuli ziwele hawanawahika kulonjelwa,

na wovizela mbuli ziwele hawanawahika kuhulika."