1 Awu ndo usenga wa Nguluwi kuwala Ibindi lya Uloli.

Lekachoni mna lunhwinhwi hemwe wanhu wa Yelusalemu?

Lekachoni namkwinha mchanya mwa vinduwiko vya ng'handa?

2 Gwa muji umemile iyowe likulu,

muji wa iyowe na mnvina!

Wanhu wa hemwe wabagame hawakopoligwe kwa ipanga,

ne kubagama kuli ngondo.

3 Vilongozi wa hemwe weng'ha nawabilima,

ila hamba nawabatigwa na wang'honyo wa hewo ne kutoza msale ne umwe,

kwa chiwalo cha kiyamila.

Wamizi wa hemwe nawajeza kubilima mhela wang'honyo wa hemwe lowawele kutali,

ila nawo kahi nawabatigwa.

4 Ndo mina nandiwalonjela hemwe,

"Mleche kijesa choneche kuwala heni,

mndeche ndilile kwa usungu.

Mleche kujeza kunyhembuliza,

kwa chiwalo cha kubagama kuwafichile wanhu wa heni."

5 Mkulu Nguluwi Yawele na Mong'ho,

nakahagula mhela uwele kowa na kilewa kukulu.

Kuli Ibindi lya Kulota kowa na vilundo vya wamizi walingujenda kwa magulu,

na wanhu kudumbizwa.

Wowa ndo mhela uwele ng'hanzi za muji wa hetwe zobomoligwa,

na vililo vya wanhu kwa chiwalo cha kulanda utanzi vyohulikwa kuli vidunda.

6 Wamizi wa Elamu nawahola mipinde na misale,

nawoya kuno wakwinile falasi na mituka ja ngondo,

nawo wamizi wa Kili wanguwika goya ngawo za hewo.

7 Mibindi ja hegwe jinojile gwa Yelusalemu najimema mituka ja ngondo,

na wakwina falasi nawawichigwa goya kuli lwizi ja muji wa hegwe.

8 Kiyamila kweng'ha kwa Yuda nakusigwa.

Zuwa alyo namitumbila vinhu vya kitowela ngondo viwele naviwichigwa kuli ng'handa ya chiundewa ya Chihulo cha Lebanoni, 9 hemwe namona kota ng'hanzi za muji wa Daudi nazitulika lukami. Nammemeza mazi kuli ilamba lya hasi*. 10 Namziwaza ng'handa za muji wa Yelusalemu, nambomola ng'handa ziyage leka kupata maganga kwa chiwalo cha kuziwika nzinzili ng'hanzi za muji. 11 Hagati ha ng'hanzi azo namzenga ilamba kwa chiwalo cha mazi galinguchililika kulawa kuli ilamba lya katali, ila hamumpalile Nguluwi yawele nakambuza mbuli azi zeng'ha, hamumdumbile heye yawele nakazidita kulawa aho katali.

12 Zuwa alyo Mkulu Nguluwi Yawele na Mong'ho,

nakagana hemwe mlile na kulombocheza,

mbeye mnvili za hemwe na kuvala mivalo ja migunila.

13 Ila hemwe namsangalala na kutowa luchenze,

namjidumula singo misenga na ming'holo,

namlya miwunde na kunwa divai.

Namlonga, "Tunwe na kulya kwa vila hamitondo tobagama."

14 Mkulu Nguluwi Yawele na Mong'ho nakangubulila aga yolonga,

"Ndikomya hawolechelwa kwa nongwa ayi,

wobagama ne kulechelwa.

Heni Mkulu Nguluwi Mbele na Mong'ho nandonga."

15 Mkulu Nguluwi Yawele na Mong'ho nakandonjela ndute kwa Shebuna, mlolezi wa ng'handa ya chiundewa, ndikamlonjele hino, 16 "Kuna hachi yachi hegwe kuwa kuno? Ndaze, hana mng'holozo yoneche aha mbaka nakibawila chilaga kuli mhalika mchanya mwa chidunda? 17 Hegwe kuna mong'ho, ila hima hela Mkulu Nguluwi kokutoza kutali. 18 Kokubina na kokutoza mbaka kuli isi ngazi kota mpila. Kobagama na kutiligwa kuko, mituka ja ngondo ja hegwe joujiganile josigala kwa wang'honyo. Hegwe nakuwa soni kuli ng'handa ya mkulu wa hegwe. 19 Ndokusa kuli mijito ja hegwe na kukudulisa kulawa kuli ulongozi wa hegwe. 20 Zuwa alyo ndomigala chitumagwa wa heni yalinguchemigwa Eliyakimu mwana wa Hilikiya. 21 Ndomvaliza ivalo lya hegwe na ndomuwoha isali lya hegwe na ndomha ulongozi wa hegwe. Heye kowa mhaza kwa wanhu wa Yelusalemu na ivyazi lya Yuda. 22 Ndomuwichila chichumulilo cha ng'handa ya Daudi kuli mayega ga heye. Chila choyochichumula, haduhu yoweza kuchihinda na choyochihinda, haduhu yoweza kuchichumula. 23 Ndomwimiza nzinzili Eliyakimu kota chigingi chiwele nachitowelelwa goya, naye kopata lutogo na ludali kuli ivyazi lya wasekulu wa heye.

24 "Ukulu weng'ha wa ivyazi lya heye wochitumbila kwa heye. Wadodo na wakulu wa ivyazi alyo wochiwika kwa heye kota visaye na vizombe viwele vyanguninila kuli ngwamo imwe hela. 25 Ila zuwa limwe, kota vila chigingi chiwele nachitowelelwa goya chokwisilwa mong'ho kwa chiwalo cha itunyo, naye Eliyakimu kolavigwa kuli ulongozi wa heye na ivyazi lya heye lyeng'ha lyowa lilihela utanzi. Heni Mkulu Nguluwi nandonga."