1 Beli nakagwa,

Nebo nakaduliswa,

jimalukolo ja milungu ajo jilingupapigwa na migongolo ja mhomolo.

Milungu ajo jomlingujihola na kuluta najo chila honhu, ndo itunyo ikulu ng'hatu,

itunyo kwa watochile.

2 Milungu ajo jogwa hamwe na hemwe,

hajiweza kuwalohola wanhu,

mweng'ha mohilikwa kuli upogozi.

3 Mkulu Nguluwi kangulonga,

"Muhulichize hemwe walelwa wa Yakobo,

hemwe wanhu wa heni, Waisilaeli msigale.

Nandiwalolela kulawa mhela lompondigwe.

4 Heni ndo Nguluwi wa hemwe na ndowalolela hemwe,

mbaka kuli usekulu wa hemwe, mnvili za hemwe hoziwa na mbuliza.

Nandiwalumba ahyo mwaluko,

ndowapapa ahyo kahi.

Ndowatanza hemwe na kuwalohola."

5 "Mowhaniza heni na whaani?

Ndaze, kabaho yawele nakewhana na heni?

6 Wanhu wangulavyaga zahabu kulawa kuli vihako vya hewo,

na kupima sendi kuli mizani.

Hamba wangumhaga mijito yalinguponda zahabu,

leka yagongomanye limalukolo lya mlungu.

Hamba wangulifugamila limalukolo alyo.

7 Wangulipikaga limalukolo alyo mmayega,

hamba wanguliwikaga honhu hake, lyangikalaga baho.

Halilinguweza kuhejela kulawa honhu hake,

hanga wanhu wangulilililaga, halilinguwedichila,

haliweza kumlohola munhu kuli magazo ga heye.

8 "Muikumbuchile mbuli ayi na kijesa,

muiwiche kuli vitwi vya hemwe, hemwe mlingubelenhuka.

9 Mzikumbuchile mbuli zonditile aho katali.

Heni ndo Nguluwi, haduhu yunji,

ena, heni ndo Nguluwi, haduhu yunji kota heni.

10 Nandiwikula mbuli za kuduma kulawa mwaluko,

kulawa katali nandiwikula mbuli ziwele zolawila hamba.

Majesa ga heni gokwenela,

heni ndokweneza kunuwila kwa heni kweng'ha.

11 Ndangulichema ikungule lya heni kulawa kolilawilaga isanya,

ena, munhu yalingweneza kunuwila kwa heni.

Nandonga na ndogadita,

lila londilingijesa ndo ndolidita.

12 "Mnyhulichize hemwe muwele na nhumbula zigagadale,

hemwe muwele kutali na hachi.

13 Ndanguiwika habehi hachi ya heni,

na ulohozi wa heni haukawila.

Ndoulohola muji wa Yelusalemu,

kwa chiwalo cha Isilaeli, ukulu wa heni."