1 "Mhulichize hemwe Waisilaeli, vitumagwa wa heni,

mhulichize hemwe walelwa wa Yakobo, wondiwahagule.

2 Heni, Mkulu Nguluwi, ndiwalumbile hemwe,

kulawila mhela lompondigwe nandiwatanza.

Mleche kudumba vitumagwa wa heni,

mhaguligwe wa heni, Yeshuluni*.

3 "Ndoiboholela mazi isi iwele na ng'halu,

na kulavya nzanda kuli isi ikalile.

Ndowagalila muhe wa heni walelwa wa hemwe,

ndowatambichiza wana wa hemwe.

4 Wozuchila kota misolo hali nzasa za mazi,

kota migodi hafungo ha nzanda.

5 Wamwe wa hewo wolonga, ‘Heni ndo wa Mkulu Nguluwi,’

wanji wochichema kwa itagwa lya Yakobo,

wanji wokwandika kuli moko ga hewo, ‘Wa Mkulu Nguluwi,’

na wanji wochizelesa kwa itagwa lya ‘Isilaeli.’ "

6 Mkulu Nguluwi, mndewa na mlohozi wa Isilaeli,

ena, Mkulu Nguluwi Yawele na Mong'ho, kangulonga hino,

"Heni ndo wa mwaluko na kuduma,

haduhu Nguluwi yunji ila heni.

7 Whaani yawele kota heni?

Yawikule na kulonga hazelu hali heni.

Whaani nakawikula aho katali kuwala mbuli ziwele zolawila hamba?

Watulonjele gala gawele gang'hali kulawila.

8 Hemwe wanhu wa heni, mleche kudumba ne kuwa na lunhwinhwi.

Ndaze, siwalonjele aho katali kuwala mbuli ziwele zolawila?

Hemwe ndo walolezi wa heni.

Ndaze, hana mlungu yunji?

Haduhu italawe linji,

simzelele ne yumwe."

9 Wanhu weng'ha walingugongomanya jimalukolo ja milungu hawawele chinhu na vinhu viwele wangusangalala kwa chiwalo cha avyo havilinguwatanza chinhu. Walingufugamila milungu ajo ndo wohambe walole na ndo wapoka, ahyo wobasigwa soni! 10 Mbuli ayo yangububuwaza kwa munhu kugongomanya limalukolo lya mlungu liwele halilingumtanza chinhu. 11 Ndikomya, heye hamwe na wayage walingulifugamila wobasigwa soni, nawo walingugongomanya jimalukolo ajo ndo wanhu hela. Lelo weting'hane weng'ha, wokabuswa na kubasigwa soni. 12 Yalingugongomanya vinhu vya chuma kanguholaga chihande cha chuma, kangulubusaga mchiluli na kuponda limalukolo. Kanguhondaga kwa nyundo na moko ga heye gawele na mong'ho. Mhela awo heye kanguwaga na nzala na kutoka, kahi kanguwaga na ng'halu na kwisilwa na mong'ho. 13 Hihyo naye yalingugongomanya vinhu vya kuhongola kangupimaga chihande cha mbawo kwa ng'weso, kanguchiwikaga ulajilo kwa kalamu ya heye, hamba kwa vinhu vya heye kanguhongolaga kwa kuliwhaniza na munhu yawele na kumeho kunojile na kuliwika limalukolo alyo lya mlungu honhu hake. 14 Munhu ayo kangutemaga igodi lya mwelezi leka yatumiye ama kanguhagulaga mbeloshi ama mwaloni. Kanguulekaga ukule hali migodi ja kumhulo ama kangunyalaga msonobali na nhonya yanguuditaga ukule. 15 Honhu ha igodi alyo howa kota ngodi, munhu kangotaga chiluli kwa chiwalo cha kusa chipute mlukuli na kubanika mibumunda mchanya mwake. Honhu hanji ha igodi lilyo, munhu kangigongomanyila limalukolo lya mlungu, hamba kangulifugamila. 16 Hamba kanguholaga honhu ha ngodi na kuziwika mchiluli, kangubanikaga miwunde mchanya mwake, kangulyaga na kiguta. Kangotaga chiluli na kulonga, "Ena! Ndikomya namhata ivuche! Acho ndo chiluli!"

17 Honhu hasigale ha igodi lilyo kangigongomanyila limalukolo lyake lya mlungu, hamba kangulifugamila na kulilanda yolonga, "Hegwe ndo Nguluwi wa heni, undohole!" 18 Wanhu awo hawavizelele chinhu choneche. Nawadinyigwa meho, hawalingona na nyhala za hewo nazidinyigwa haziweza kuvizela. 19 Haduhu yalingijesa ama yawele na kuvizela na kulonga, "Nusu ya igodi ali nambwinila chiluli na kubanika mibumunda mchanya mwa makala gake na kubanika miwunde na kulya. Ndaze, honhu hasigale ndogongomanya limalukolo liwele ndo izudizo na kuchifugamila acho chihande cha igodi?" 20 Hebu! Majesa ga heye nagelumba na acho chiwele ndo mivu hela! Munhu ayo nakajilila na howeza kilohola yuye na kulonga, "Ndikomya chondilingibata mmoko ndo uhadi hela!"

21 Mkulu Nguluwi kangulonga hino,

"Hemwe wanhu wa Yakobo, mzikumbuchile mbuli azi,

ena, mkumbuchile hemwe Waisilaeli.

Hemwe ndo vitumagwa wa heni.

Nandiwalumba leka muwe vitumagwa wa heni,

mazuwa gose heni siwasemwa.

22 Nandizilechela nongwa za hemwe kota mbeho ilinguwembelusa ng'hungugu,

nandigosa gehile ga hemwe kota ikunguyosi vyolilinguka na ivuche.

Mnyhiluchile kwa vila nandiwagombola.

23 "Mwimbe kwa kusangalala hemwe ulanga,

kwa vila Mkulu Nguluwi ndo yaliditile ali.

Mtowe iyowe hemwe misisi ja isi,

mwimbe kwa kusangalala hemwe vidunda!

Hemwe vihulo na migodi jeng'ha jiwele amo, mwimbe,

kwa vila Mkulu Nguluwi nakawagombola walelwa wa Yakobo,

nakaulajila ukulu wa heye kuli Isilaeli."

24 Mkulu Nguluwi, mgombozi wa hemwe,

yawalumbile kulawa mmunda mwa wamai wa hemwe, kangulonga,

"Heni ndo Mkulu Nguluwi yavilumbile vinhu vyeng'ha.

Heni ndiliyeka nandiuhanzanza ulanga,

nandiilumba isi kwa mong'ho wa heni ndiliyeka.

25 Ndanguwifyaga ulajilo wa waloli wa udesi

kuwawichila upoka walingulagula.

Ndangugalula uwanzi na luhala,

na kuvidita viwe upoka,

26 ila ndanguutawizaga usenga wa chitumagwa wa heni,

na kweneza uloli wa wasenga wa heni.

Heni ndo ndilinguulonjela muji wa Yelusalemu,

‘Hegwe Yelusalemu, wanhu wochikala kahi kwa hegwe,’

na miji ja Yuda,

‘Hemwe mozenjingwa kahi,’

na kuwala mahame, ‘Namwe ndowagongomanya kahi.’

27 Heni ndo mbele ndigalajize mazi menji,

kwa kugalonjela, ‘Mkale.’

28 Heni nandonga kuwala Koleshi,

‘Hegwe kowadima wanhu honhu ha heni,

kokweneza majesa ga heni geng'ha.’

Heni nandonga kuwala Yelusalemu,

‘Hegwe Yelusalemu kozenjigwa unyale kahi,’

na kuwala ng'handa ya Nguluwi,

‘Msisi wa hegwe wowichigwa kahi.’ "