1 Wochona hewo walinguluta Misili kulanda utanzi,

wala walingitumbila falasi na winji wa mituka ja hewo ja ngondo,

na mong'ho wa wamizi wakwina falasi wa hewo,

wohambe wetumbile kwa Mkulu Nguluwi, Yelile wa Isilaeli,

ne kupala utanzi kwa Mkulu Nguluwi.

2 Nguluwi kana luhala na ndo yalingigala kudumya,

halingugalula ulonzi wa heye.

Ka goya kitowa na wehile na walinguwatanza walingudita gehile.

3 Wamisili ndo wanhu hela, hawawele Nguluwi,

falasi wa hewo ndo migongolo hela, hajiwele muhe.

Mkulu Nguluwi hoyogolola moko wa heye,

wanhu wa isi walingulavya utanzi wochikwang'hwala,

na wala walingutanzigwa wogwa,

weng'ha wodumigwa hamwe.

4 Mkulu Nguluwi nakandonjela hino,

"Kota vila isimba ama isimba lyana vyolilingubuma kuli kupelemba kwake,

wone chichemigwe chilundo cha wadimi kulitowa,

halilingudumba iyowe lya hewo ne kutinhuka kwa chiwalo cha lizi lya hewo.

Ahyo ndo heni Mkulu Nguluwi Mbele na Mong'ho vyondidulika,

kitowa mchanya mwa chidunda cha Siyoni.

5 Kota chideje vyochilingugulukaguluka mchanya mwa chimvulila chake,

kuchamila chibofu chake,

ndo heni Mkulu Nguluwi Mbele na Mong'ho vyondikwamila,

na kuulewela muji wa Yelusalemu.

6 Hemwe Waisilaeli,

mngalamchile heni kwa vila hemwe nambelenhuka heni.

7 Mhela wofika uwele hemwe mweng'ha,

mojitajila kutali jimalukolo ja hemwe jibakalizwe sendi na zahabu,

jiwele namjigongomanya kwa moko ga hemwe gawele gehile.

8 Waashulu wokopoligwa kwa ipanga, ila haliwele ipanga lya munhu,

wasongolo wa hewo wojeza kusulupuka,

ila wobatigwa na kuditigwa wakole mijito ja upogozi kwa lupichi.

9 Ngome za hewo zogwa kwa chiwalo cha lunhwinhwi,

wang'hangala wa hewo wozileka bendela za hewo na kubilima kwa chiwalo cha kukabuswa.

Ena, heni Mkulu Nguluwi, ndo kota chiluli kuli chidunda cha Siyoni,

ndo kota itanulu lilingwaka kuli muji wa Yelusalemu."