1 Mkulu Nguluwi kangulonga hino,

"Ulanga ndo chigoda cha heni cha undewa,

isi ndo honhu ha kuwichila magulu ga heni.

Lelo, monzenjela ng'handa ilindaze?

Kuli honhu hachi hawele ndoweza kwesela?

2 Heni ndo ndividitile vinhu avi vyeng'ha,

avi vyeng'ha ndo vya heni.

Ila ndolajila uganililo kwa munhu yalingunyenyetela,

na yalingulonga gehile ga heye,

yalingukakama hala hoyohulika ulonzi wa heni.

3 Mwangundavila nhambiko ya misenga milume,

kuno mwanguwakopola wanhu,

mwangundavila nhambiko ya ming'holo myana,

kuno mwangujilavila milungu nhambiko ya mibwa.

Mwangundavila nhambiko ya nyhule,

kuno mwangujilavila jimalukolo nhambiko ya danda ya migubi,

mwangufunyhizila heni ubani kota nhambiko ya kukumbuchila,

kuno mwangujitogola jimalukolo.

Namihagulila kuwinza nzila za hemwe,

na nhumbula za hemwe zangusangalala kwa vinhu avyo vilinguzudiza.

4 Lelo ndowegalila hemwe magazo,

gowafika gagala gomlingugadumba,

kwa vila honyhemile, haduhu yedichile,

hondonjile haduhu yahulichize.

Namdita gehile hali heni,

namhagula gala gawele silingugagana."

5 Mkulu Nguluwi kangulonga hino,

kwa hemwe mlingukakama kwa ulonzi wa heye,

"Wang'holozenu walinguwazudila hemwe,

na kuwalema kwa chiwalo cha heni, nawalonga kwa kubeza,

‘Mkulu Nguluwi yatogoligwe,

leka natwe tuwone hemwe msumya,’

ila hewo ndo wobasigwa soni.

6 Mhulichize lizi kulawa mujini,

kulawa kuli ng'handa ya Nguluwi!

Alyo ndo lizi lya Mkulu Nguluwi,

yowagaza wang'honyo wa heye.

7 "Muji wa heni welile,

ndo kota mamo yalinguponda ne kuwa na usungu,

kung'hali kwaluka kwa usungu, nakaponda mwana msongolo.

8 Whaani yawele nakahulika mbuli kota ayi?

Whaani yawele nakayona mbuli kota ayi?

Ndaze, isi yoweza kupondigwa kwa zuwa limwe,

ama wanhu wa isi woweza kulawila mala imwe hela?

Yelusalemu ndo kota mamo yawele nakaponda mwana wa heye,

mhela uchefu hela kulawa loyafichile kuli honhu ha kupondela.

9 Ndaze, ndimigale mwana mhela wa kupondigwa,

hamba ndeche kukunda yapondigwe?

Ndaze, ndidinye munda wa kuponda,

kuno heni ndo ndilingudita wanhu wapondigwe?

Heni Mkulu Nguluwi nandonga."

10 Mtowe luchenze hamwe na Yelusalemu,

msangalale kwa chiwalo cha muji awo,

hemwe mweng'ha mlinguugana muji.

Hemwe muwele namlombocheza kwa chiwalo cha muji awo, mtowe luchenze.

11 Hemwe wanhu wa Yelusalemu,

mopata chila chinhu chomlinguganigwa kupata,

kota vila chali vyochilingupata chila chinhu,

kulawa kuli matombo ga mayake.

Mosangalala kwa chiwalo cha ukulu wa muji awo,

na chila chinhu chiwele mgati mwake.

12 Mkulu Nguluwi nakalagana,

"Ndoudita muji wa Yelusalemu ulutilile goya kota lwanda lulinguchililika,

umeme vinhu vya sendi nyinji, kulawa kwa wanhu wa isi zinji,

vinhu avyo vyohilikwa Yelusalemu,

vyomema kuli muji awo kota mazi tendema.

Ndowalolela wanhu wa Yelusalemu,

kota mamo vyoyalinguchilolela chali cha heye.

13 Ndowahembuliza hemwe ako Yelusalemu,

kota mamo vyoyalinguchihembuliza chali cha heye.

14 Mogona ago na nhumbula za hemwe zosangalala,

modedemka kota misolo midodi.

Aho ndo yozeleka kota heni Mkulu Nguluwi ndanguwamilaga vitumagwa wa heni,

ila hala hondizudila ndowagaza wang'honyo wa heni."

15 Mkulu Nguluwi kokuya na chiluli.

Kowa mchanya mwa mabawa ga chivuluvumbi,

kwa chiwalo cha kuwagaza wala wawele nawamzudiza.

16 Mkulu Nguluwi kolavya utaguso kwa chiluli,

kowagaza kwa ipanga wanhu weng'ha wawele wofichigwa na nongwa,

wala wawele wodumigwa na heye, wowa wenji.

17 Mkulu Nguluwi kangulonga hino, "Wa baho wanhu walingiwika chiuyeng'ha na kiyeliza leka wenjile kuli vigunda vya kujifugamila milungu. Wanguluta hamwe kwa vilundo na mtambika yawele hagati ha hewo. Wanhu awo wangulyaga migubi na mimdusu na migule na vilyo viyage vikokomoche. Ndikomya wanhu awo wobagama weng'ha hamwe. 18 Ndangugazela madito ga hewo na majesa ga hewo. Ndanguya kuwakungajiza wanhu wa isi zeng'ha na ndonga zeng'ha, welumbe hamwe na kuulola ukulu wa heni. 19 Ndowika hali hewo ulajilo wa heni. Wasigale hali hewo ndowegala hali wanhu wa isi ako Talishishi na Puli na Ludi na isi ziwele na wazidahe kutoza upinde, woluta kahi Tubali na Yavani na isi iwele wanhu hawanahulika kuzeleka kwa heni ne kuwona ukulu wa heni. Awo wasenga wa heni wouwikula ukulu wa heni kuli wanhu wa isi azo. 20 Wowegala hali Mkulu Nguluwi Waisilaeli weng'ha kulawa kuli wanhu wa isi zeng'ha. Wowegala kuno wakwinile falasi na migongolo kota midogowi mikulu na ngamiya na mituka ja falasi mbaka Yelusalemu, kuli chidunda cha heni chelile. Wowegala kota Waisilaeli vyowalingigala nhambiko ya nyhule kuli chinhu chelile mbaka haluga ha heni Mkulu Nguluwi. 21 Nani kahi ndowahagula wamwenga hali hewo leka wawe watambika na wamwenga wawe Walawi. Heni Mkulu Nguluwi nandonga.

22 "Kota vila ulanga unyale na isi inyale zondizilumbile,

hoziwa nzinzili mazuwa gose kwa ludali lwa heni,

ndo walelwa wa hegwe na itagwa lya hegwe vyoliwa nzinzili.

23 Kuli chila mnvina ya kulawa kwa nyelezi,

na kuli chila zuwa lya Kwesela,

wanhu weng'ha wokuya kufugamila heni,

heni Mkulu Nguluwi nandonga.

24 "Hamba woluta kulola mitufi ja wala wambelenhuche heni. Fukuzi ziwele zolya mitufi ja hewo hazibagama na chiluli chiwele chowalakaza hachizimya. Wowa izudizo kwa wanhu weng'ha."