1 Yochona, isi imemile lizi lya mabawa,

isi iwele kumwambu mwa nzanda za Kushi!

2 Ilinguwalajiza wasenga walingujenda kwa mitumbwi kuli lwanda.

Mlute hemwe wasenga wabewe,

kwa wanhu wa isi wawele wenji na wazidahe,

wanhu wawele ng'wemang'wema na ngozi idedemche.

Wanhu awo wangudumbigwa chila honhu,

wanhu wa isi wawele na ivuche na ndonga ya chijenzi,

wawele isi ya hewo naigawanuligwa na nzanda.

3 Hemwe wanhu wa isi zeng'ha,

hemwe mlingikala muisi,

mhela bendela hozikwinuligwa kuli vidunda, mozona,

nazo mhalamhanda hozipembigwa, mozihulika.

4 Ali ndo Mkulu Nguluwi lyoyandonjele,

"Ndosindamala na kulolela,

kulawa haluga hangu,

kota ivuche kuli lumuli lwa isanya,

kota ng'hungugu ya nungwi mhela wa mbeta.

5 Mhela uwele wamizi wang'hali kuwavaba kota vila mhela wa kubeta louwa ung'hali,

mhela wa kubahula louwa umalile,

uluwa louwa ung'hali kugaluka kuwa zabibu,

Nguluwi kowatowa kota vyoyalinguzitema nhagala zizuchile, kwa sengo ya kutemela nhagala,

na kusa nhagala zonjezeche.

6 Mitufi jawo jeng'ha jolechigwa kwa chiwalo cha videje vilingupelemba kuli chidunda,

na migongolo jinji ja kisolo.

Videje vya kisolo vyolya miwunde ja mitufi ajo kuli mhela wa chipalangule,

migongolo ja kisolo jodakula kuli mhela wa chipute."

7 Mhela awo, Mkulu Nguluwi Yawele na Mong'ho kogalilwa nhambiko kulawa kwa wanhu wa isi wawele ng'wemang'wema, wawele na ngozi idedemche, kulawa kwa wanhu wa isi walingudumbigwa wa habehi na wa kutali, kulawa kwa wanhu wa isi wawele na ndonga ya chijenzi, wawele isi ya hewo naigawanuligwa kwa nzanda. Nhambiko azo kogalilwa kuli chidunda cha Siyoni, hoyofugamilwa heye Mkulu Nguluwi Yawele na Mong'ho.