1 Awu ndo usenga uwele Mkulu Nguluwi kangulonga kuwala Koleshi,

"Hegwe ndo mndewa yondikuhagule,

ndouwika nzinzili mong'ho wa hegwe,

leka uwadumye wanhu wa isi,

na kuusumya mong'ho wa wandewa.

Ndanguchumula lwizi lwa muji,

na haduhu lwizi luwele lohindigwa.

2 Ndokulongola,

na kuselega vidunda hali hegwe.

Ndobenanga lwizi ja shaba,

ndotemanga pingu za chuma.

3 Ndokupa ng'hano ivisigwe kuli jiza,

na lufufu luwele honhu ha chinyele,

leka uvizele kota heni ndo Mkulu Nguluwi,

Nguluwi wa Isilaeli, ndilingukuchema kwa itagwa lyako.

4 Kwa chiwalo cha Yakobo, chitumagwa wa heni,

ena, kwa chiwalo cha Waisilaeli wondiwahagule,

nandikuchema kwa itagwa lya hegwe,

nandikupa itagwa lya lutogo, hanga hunzelele.

5 "Heni ndo Mkulu Nguluwi, haduhu yunji,

haduhu Nguluwi yunji ila heni.

Ndokuwika uwe nzinzili, hanga hegwe hunzelele,

6 leka wanhu weng'ha kulawa kolilawilaga isanya,

mbaka kolizinjilaga isanya,

wavizele kota haduhu Nguluwi yunji ila heni.

Heni ndo Mkulu Nguluwi, haduhu yunji.

7 Nandiludita lumuli na jiza,

ndangigalaga kikala goya na kwambuza kudumya.

Heni Mkulu Nguluwi, ndanguditaga vinhu avi vyeng'ha.

8 Ndolajiza kusumya kulawa kilanga kota nhonya,

isi yogubuka kwa chiwalo cha kubochela kusumya ako,

na kilejeha na hachi vyozuchila kota uluwa.

Heni Mkulu Nguluwi ndogadita ago galawile."

9 "Kochona munhu yalingitwanza na heni, mbele ndimlumbile,

heye ka kota igaye hela, nani ndo ndimgongomanye.

Ahyo halinguweza kumbuza kwa chiwalo cha kitwanza na heni.

Ilongo halilinguweza kumuuza yalinguponda ilongo,

‘Lekachoni kwangungongomanya hino?.’

Igaye haliweza kumlonjela, ‘Mijito ja hegwe hajenele!’

10 Kochona mwana yalingumlonjela mhaza wa heye,

‘Lekachoni nakwambuza heni kuya kuli isi?’

Ama kumlonjela mayake,

‘Lekachoni nakumhonda?’ "

11 Mkulu Nguluwi, Yelile wa Isilaeli,

Nguluwi, yailumbile Isilaeli, kangulonga,

"Ndaze, mwangujeza kumbuza kuwala mbuli zilinguya kwa wana wa heni,

ama kundajiza kuwala mijito ja heni?

12 Heni ndiilumbile isi,

na wanhu walingikala amo.

Moko ga heni ndo nagahanzanza ulanga,

na wamizi weng'ha wa ulanga wa ako kwa ilajizo lya heni.

13 Heni ndo ndimwinule Koleshi kuli hachi ya heni.

Ndogolola nzila za heye zeng'ha,

kouzenga unyale muji wa heni wa Yelusalemu,

na kowapa kilejeha wanhu wa heni wawele kuli isi za chijenzi,

ne kugana kupegwa sendi ne ndolendole. Heni Mkulu Nguluwi Mbele na Mong'ho nandonga."

14 Mkulu Nguluwi kangulonga hino na Waisilaeli,

"Lufufu lwa Misili na vinhu vya Kushi,

hamwe na wanhu wa Sheba, wanhu wawele ng'wemang'wema,

vyokuya na kuwa vya hemwe.

Wanhu awo wowakolela mijito kuno wawele wawopigwe minyololo,

wofugama hali hemwe na kuwadedeza wolonga,

‘Tukomya, Nguluwi ka hamwe na hemwe,

haduhu yunji ila heye.’ "

15 Ndikomya hegwe kwa Nguluwi wivisile,

Nguluwi wa Isilaeli, Nguluwi mlohozi.

16 Weng'ha walingugongomanya jimalukolo, wobasigwa soni na kudeuzwa,

weng'ha hamwe wodeula.

17 Ila wanhu wa isi ya Isilaeli woloholigwa na Mkulu Nguluwi,

wopata ulohozi wa mazuwa gose.

Hawobasigwa soni ne kudeuzwa mazuwa gose.

18 Mkulu Nguluwi, Nguluwi yaliyeka,

heye ndo yaulumbile ulanga,

ndo yalumbile isi na kuidita iwe nzinzili.

Hailumbile leka iwe ilihela chinhu,

ila nakailumba leka vilumbigwe vya heye vikale.

Lelo kangulonga,

"Heni ndo Mkulu Nguluwi,

haduhu yunji.

19 Silonjile kwa uviso,

kulawa honhu hamwenga kuli isi iwele na jiza.

Siwalonjele walelwa wa Yakobo,

wamhale hihi hela.

Heni Mkulu Nguluwi ndangulonga kukomya,

ulonzi wa heni ndo wa kutanganika.

20 "Hemwe wanhu wa isi msigale,

mikungajize hamwe muye!

Wala walingupika jimalukolo ja migodi ndo wanhu walihela nyhala,

wala walingujilanda milungu johambe jilohole.

21 Mlonje hazelu na kuwikula,

mlongase hamwe!

Whaani yalongole kulonga mbuli ayi kulawa katali,

yalonjile mbuli azi kulawa katali ng'hatu?

Ndaze, siwele heni Mkulu Nguluwi?

Haduhu Nguluwi yunji, ila heni!

Heni ndo Nguluwi wa hachi na mlohozi,

haduhu yunji, ila heni.

22 Mngalamchile leka mloholigwe,

honeche muwele muisi,

kwa vila heni ndo Nguluwi, haduhu yunji.

23 Nandilaha kwa nhumbula ya heni,

mlomo wa heni naulonga kwa kugoloka,

ulonzi uwele hauweza kugaluka.

Chila munhu kofugama hali heni,

kwa heni chila umyango wolaha.

24 Wolonga kuwala heni,

‘Hachi na mong'ho vya kwa Mkulu Nguluwi yaliyeka.’ "

Weng'ha wawele nawamzudila Mkulu Nguluwi,

womuyila heye na kudeula.

25 Ila hali Mkulu Nguluwi walelwa weng'ha wa Isilaeli

wopata hachi, wosangalala.