1 Awu ndo usenga uwele Mkulu Nguluwi kanguwalonjela Waisilaeli,

"Ndaze, mwangijesa kota nangana kumha kalatasi ya luleko mayenu Yelusalemu?

Hebu! Ila kwa chiwalo cha nongwa za hemwe, mamo wa hemwe nakalechigwa.

Ama, ndaze nangana ndiwaguze hemwe kuli upogozi?

Hebu! Mkumbuchile kota namhilikwa kuli upogozi,

kwa chiwalo cha gehile ga hemwe.

2 Lekachoni lombuyile simfichile ne yumwe?

Lonyemile, lekachoni hakuwele na yoneche wa kunyhidichila?

Ndaze, moko wa heni ndo ng'hochele lukami mbaka ndemwele kuwalohola hemwe?

Ndaze, ndahela mong'ho wa kuwagombola hemwe?

Lole! Kwa kung'hanuchila kudo hela, bahali yangukala,

na nzanda ndanguzidita kuwa kugunuche,

somba zake zangufa na kunhung'ha kwa vila mazi ga haduhu.

3 Ndanguuvaliza ulanga jiza,

na ivalo lya kulombocheza."

4 Mkulu Nguluwi nakamha heni umyango ulangusigwe,

leka ndiuzele ulonzi ulinguwakangaza nhumbula watochile.

Chila lufuku kangumhaga heni maya ga kuhulichiza,

goyalingugana kundangusa.

5 Mkulu Nguluwi nakandita ndihulichize,

nani siwele mjuvi,

ne kumbelenhuka heye.

6 Mgongo wa heni nandiwalechela walingunhowa,

mizeze ja heni kwa wala wang'humbule lulevu lwa heni,

wambasile soni heni na kunhemela mite,

heni sivisile leka ndiwe kutali na hewo.

7 Mkulu Nguluwi kangunhanza,

ahyo siweza kudeula.

Kumeho kwa heni nandikudita kuwe kota iganga,

ndanguvizela kota sibasigwa soni.

8 Yalingundewela ka habehi.

Whaani kochitwanza na heni?

Yoye, twime mchitala.

Mng'honyo wa heni ndo whaani?

Lelo yalute kumwando leka yelajile.

9 Lole, Mkulu Nguluwi ndo yalingunhanza.

Whaani yalinguweza kunhagusa kota ndina nongwa?

Wang'honyo wa heni weng'ha wolala kota ivalo,

fukuzi wowadakula.

10 Whaani hali hemwe yalingumdumba Mkulu Nguluwi?

Whaani hali hemwe yalinguhulichiza ulonzi wa chitumagwa wa heye?

Wone kabaho yalingujenda kuli jiza ne kuwa na lumuli,

yetumbile itagwa lya Mkulu Nguluwi,

na kikundiza kwa Nguluwi wa heye.

11 Ila hemwe mlingubwina chiluli,

na kiditila vyenje,

mjende kwa lumuli lwa vyenje avyo,

milapi ja chiluli chombwinile mwemwe.

Chompata kulawa kwa Mkulu Nguluwi ndo achi,

mowasa hanyi kwa magazo gang'hang'hale.