1 Mkulu Nguluwi kangulonga hino,

"Wimbe kwa luchenze gwa Yelusalemu,

hegwe uwele kota mdala yawele mhende.

Utowe iyowe na kwimba lukami,

hegwe uwele hupondile,

kwa vila wana wa hegwe

wowa wenji kusinda wa mdala yawele na mlume.

2 Jidite mihema ja hegwe jiwe mikulu,

ujidite jiwe migazi.

Uzidite ng'weso zake ziwe ng'wemang'wema na uvidite vigingi vyake viwe nzinzili,

3 kwa vila kokonjeza ugazi wa hegwe kuli ubanzi wa kudilo na kumoso,

walelwa wa hegwe wowalongoza wanhu wa isi zinji,

na kikala kuli miji ja isi ya hegwe jiwele najilechigwa mahame.

4 Uleche kudumba, kwa vila haubasigwa soni,

uleche kudumba kudeula kwa vila haubezigwa kahi.

Koisemwa soni ya uhinza wa hegwe,

ne hauweza kukukumbuchila kahi kudeula kwa kulechigwa na mlume wa hegwe.

5 Heni ndikulumbile ndowa kota mlume wa hegwe,

Mkulu Nguluwi Yawele na Mong'ho, ndo itagwa lya heni,

mbele Yelile wa Isilaeli ndo mgombozi wa hegwe,

heni ndanguchemigwa Nguluwi wa isi yeng'ha.

6 Hegwe kwa kota mdala yawele nakalechigwa na mlume wa heye,

na kukudita uwe na masinzo mnhumbula,

hegwe kwa kota mdala yahesigwe loyawele mhinza,

hamba mlume ayo nakamleka.

Ila Mkulu Nguluwi nakakuchema leka uhiluche kwa heye.

7 Nandikuleka kwa mhela uchefu hela,

kwa isungu likulu ndokuhilula.

8 Kwa ng'halazi ing'hang'hale,

nandikuvisa kumeho kwa heni leka ndeche kukona kwa mhela uchefu hela,

ila kwa igano lya kwimilila lya mazuwa gose ndokonela isungu.

Heni Mkulu Nguluwi mgombozi wa hegwe, nandonga.

9 "Ndodita kota vyonditile kuli mhela wa Nuhu,

mhela wula nandilaha,

kota siigubika isi kahi kwa mazi tendema.

Lelo ndangilaha kota sikuzudila,

ne kukung'hanhuchila kahi.

10 Vidunda vyoweza kwajilila,

vigongo vyoweza kusigwa,

ila igano lya kwimilila lya heni halikuka,

ilagano lya heni lya kikala goya halikusigwa.

Heni Mkulu Nguluwi ndilingukonela isungu nandonga."

11 "Gwa Yelusalemu uwele nakugazika,

uwele na masinzo na kulechigwa ne kuhembulizwa,

ndokuzenga unyale kwa maganga ga sendi nyinji,

misisi ja hegwe jowa ja maganga ga lanji ya buluu.

12 Milingo ja hegwe ndojizenga kwa maganga galinguchemigwa akiki,

lwizi ja hegwe kwa maganga galingupulika,

ng'hanzi za hegwe kwa maganga ga sendi nyinji.

13 "Wanhu wa hegwe wolanguswa na heni Mkulu Nguluwi,

ndowadita walutilile goya ng'hatu.

14 Kwa hachi hegwe kotawizwa,

kubunza kowa kutali na hegwe,

hauweza kudumba choneche,

kowa kutali na lunhwinhwi,

kwa vila haluweza kuwa habehi na hegwe.

15 Munhu yoneche yawele kokuvaba,

kowa halajizwe na heni.

Yoneche yawele kochitowa na hegwe, kodumigwa.

16 "Lole, heni ndo ndimlumbile yalingulumba vinhu kwa chuma,

yalingubwina chiluli cha makala,

na kugongomanya vinhu vya kitowela ngondo kwa chiwalo cha heye.

Heni ndo ndimlumbile yalingudumya leka yadumye.

17 Vinhu vyeng'ha vya kitowela ngondo vilumbigwe kwa chiwalo cha kukulumiza,

haviweza kukulumiza.

Wone munhu yakulonjeleze mchitala, komsumya.

Awu ndo uhalizi wondiwawichile vitumagwa wa heni,

kota ndowalewela.

Heni Mkulu Nguluwi nandonga."