1 Mkulu Nguluwi nakandonjela, "Uhole mbawo ng'hulu, wandiche mchanya mwake kwa kalamu ya hihi hela ulonzi awu, ‘Maheli-shalali-hashi-basi.’* 2 Nani ndowachema watambika Uliya na Sekaliya, mwana wa Yebelekiya, kota walolezi wa heni wa kitumbila."

3 Hamba nanduta na kuwasa na mche wa heni yawele naye kahi nayali mloli, naye nakawa na himila, nakaponda mwana. Mkulu Nguluwi nakandonjela, "Mcheme ayo mwana Maheli-shalali-hashi-basi. 4 Mwana hoyowa yang'hali kudaha kulonga, ‘Mhaza’ ama ‘Mamo,’ lufufu lwa Damasiko na vinhu viholigwe kulawa kuli ngondo ako Samaliya, vyoholigwa na mndewa wa Ashulu."

5 Mkulu Nguluwi nakalongasa na heni kahi, nakandonjela, 6 "Kwa vila wanhu awa nawagalema mazi ga Shilo galinguchililika mholemhole na nawasangalala kwa chiwalo cha Lesini na Peka, mwana wa Lemaliya, 7 ahyo, heni Mkulu Nguluwi ndowegala wamizi wa isi ya Ashulu na mong'ho wawo weng'ha kuivaba isi ya Yuda. Wokuya kota mazi tendema ga lwanda lwa Eyufulate, gomema mbaka kuli nhenje za lwanda lweng'ha, 8 gozunguluta himahima mchanya mwake, kuno gokola hagati mbaka kufika kuli singo. Ila Nguluwi ka hamwe na hetwe na mabawa gake gagonzoligwe gogubika isi yeng'ha kwa chiwalo cha kutwamila!"

9 Hemwe wanhu wa isi zinji,

mlute kumwando na miwiche goya kwa ngondo,

ila mobenangwa kuli vihande!

10 Miwiche goya, ila molemwela,

muwalajize wamizi wa hemwe, ila hawoweza kulutilila goya,

kwa vila Nguluwi ka hamwe na hetwe.

11 Mkulu Nguluwi nakalongasa na heni kuno moko wa heye uwele na mong'ho uwele mchanya mwa heni, yondonjela ndeche kuiwinza nzila ya wanhu wa isi ayi, nakalonga, 12 "Uleche kilumba kuli mbuli za hewo zihile ne kudumba gala gowalingugadumba ne kuwa na lunhwinhwi. 13 Unzele heni ndiliyeka, Mkulu Nguluwi Mbele na Mong'ho kota ndo yelile, undumbe na kufugamila heni ndiliyeka. 14 Ndowa honhu ha kubilimila, kahi ndowa iganga lilingwambuza wanhu kikwang'wala na italawe lya kuugwisa undewa wa isi za Isilaeli na Yuda, ndowa idiwa lya kuwagwiliza wenyeng'haye wa Yelusalemu. 15 Wanhu wenji wochikwang'wala na kugwa na kubeneka, wogwilizwa kuli idiwa alyo na kuholigwa na wang'honyo wa hewo."

16 Uliwiche goya ilajizo alyo na kulihinda ilanguso hali walingumbinza. 17 Nani ndombeteza Mkulu Nguluwi yawele nakevisa, nakewika kutali na walelwa wa Yakobo, ndochitumbila kwa heye. 18 Heni hamwe na wana woyamhele Mkulu Nguluwi ndo ulajilo wa makanyo kuli Isilaeli, kwa itagwa lya Mkulu Nguluwi Yawele na Mong'ho, yalingikala kuli chidunda cha Siyoni. 19 Wanhu wanji wowalonjela hemwe, "Mlande utanzi kwa walingulonga na mihoka na kwa walaguzi walingulila kota videje. Ndaze, wanhu hawalinguganigwa kupala mbuli kwa Nguluwi wa hewo? Ndaze, walute kwa wanhu wabagame kwa chiwalo cha walingikala?" 20 Ndikomya, yalingulonga ahyo yang'hali kona lumuli. Ila hemwe mibatilile gala malajizo ga malanguso ga Nguluwi.

21 Wanhu wolubaluba kuli isi kuno wawele wagaziche ng'hatu na wawele na nzala. Howogazika kwa nzala, wowa na ng'halazi lukami na kumpanjila mndewa wa hewo na kumpanjila Nguluwi wa hewo howolola kuchanya. 22 Wolola kuli chila honhu muisi, wogona magazo hela na jiza na masinzo. Haduhuli yawele koweza kiwika kutali na jiza alyo likulu.