1 Wala wanhu wawele nawali wochikala kuli isi ya Yuda wawele nawagazigwa, hawolutilila kuwa kuli magazo. Aho hamwande Mkulu Nguluwi nakawadita wanhu wa isi ziwele nhanzi za Sebuluni na Nafutali nazali zichikala, wanyenyetele. Ila kuli mazuwa galinguya Nguluwi kowadita wanhu walingikala kuli mkowa wa Galilaya hafungo ha nzila, kuwele ndo hagati ha lwanda lwa Yolodani na bahali ya Mediteleniyani, kuwele wajenzi walingikala, watogoligwe.

2 Wanhu walingujenda kuli jiza,

nawalwona lumuli lukulu,

wala walingikala kuli isi ya jiza totolo,

lelo lumuli naluwalangazila.

3 Gwa Mkulu Nguluwi, nakuwadita wanhu wa hegwe Waisilaeli wonjezeche,

nakonjeza kusangalala kwa hewo,

wangusangalala hali hegwe kota wanhu vyowalingusangalala mhela wa mbena,

kota wamizi vyowalingusangalala howowa wochigawila vinhu vya kulawa kuli ngondo.

4 Nakubena mong'ho wa walinguwatunya wayawo,

wanhu wawele nawawadita wanhu wa hegwe wawe wapogozi.

Nakuwagombola kota vyouwalohole wanhu wa hegwe kulawa kwa Wamidiani.

5 Chila ikwamba lya mwamizi litumiche kuli ngondo,

chila ivalo liwele na usalagwa wa danda,

vyowichigwa kwa chiwalo cha kulakazwa,

vyowa usalagani wa kubwinila chiluli.

6 Mina kwa chiwalo cha hetwe, mwana nakapondigwa,

natupegwa mwana mlume,

naye kopegwa ludali lwa kulongoza,

kochemigwa, "Yalingulonga mbuli za luhala, yalingububuwaza" na,

"Nguluwi Yawele na Mong'ho" na,

"Mhaza wa mazuwa gose" na,

"Mndewa wa kikala goya."

7 Mong'ho wa ulongozi wa heye wolutilila kukula,

undewa wa heye wowa kuli kikala goya mazuwa gose.

Kowa mhalizi wa mndewa Daudi,

kolongoza kwa hachi na kutanganika,

kulawa sambi mbaka mazuwa gose.

Maya ga Mkulu Nguluwi Yawele na Mong'ho, gokweneza aga.

8 Mkulu Nguluwi nakalavya utaguso kuli undewa wa Isilaeli,

kuli lulelo lwa Yakobo.

9 Wanhu weng'ha wovizela kota,

Waefulaimu na wenyeng'haye wa Samaliya,

wawele wangulonga kwa ujuvi

na kidaya kwa nhumbula za hewo, wolonga,

10 "Ng'hanzi ziwele nazizenjigwa kwa mitufali nazigwa,

ila tozizenga kahi kwa maganga gahongoligwe,

mitini najigwiswa,

ila tonyala mielezi honhu hake."

11 Kwa chiwalo acho Mkulu Nguluwi komha mong'ho mng'honyo wa Lesini,

kowadita wawe na ng'halazi ing'ang'ale.

12 Waalamu kulawa ubanzi wa kolilawilaga isanya,

Wafilisti kulawa ubanzi wa kolizinjilaga isanya,

nawagabula milomo ja hewo kuimela Isilaeli.

Ila, ng'halazi ya heye haisindamala,

moko wa heye ung'hali ugololigwe kwa hewo.

13 Hanga nakawagaza wanhu,

ila hawamhiluchile Mkulu Nguluwi Yawele na Mong'ho.

14 Lelo, kwa mhela wa zuwa limwe hela,

Mkulu Nguluwi kodumula vitwi na michila kuli Isilaeli,

nhagala ya igodi lya mchikichi na misolo.

15 Wasekulu na wanhu walinguzeleka lukami ndo vitwi,

waloli walingulangusa udesi ndo michila.

16 Wala walinguwalongoza wanhu awa wanguwajiliza,

walingulongozwa nawajilila.

17 Ahyo, Mkulu Nguluwi halingusangalala kwa chiwalo cha wasongolo wa hewo,

ne kuwonela isungu walekwa na wadala wafililwe na walume wawo,

kwa vila haduhu ne yumwe wa hewo yalingumdumba Nguluwi,

nawo ndo wehile na walingulonga mbuli za upoka.

Ila ng'halazi ya heye haisindamala,

yang'hali yagolole moko wa heye.

18 Ndikomya wihe wangwakaga kota chiluli,

wangulakaza miwa na mikwangwasale,

wangwakaga kota chiluli kuli visosolo vya kuchihulo,

wangipilinjila kuluta kuchanya kota izengo lya iyosi.

19 Kwa ng'halazi ya Mkulu Nguluwi Yawele na Mong'ho,

isi yolakazwa kwa chiluli,

wanhu wowa ngodi za chiluli.

Haduhu munhu yoweza kumonela isungu mng'holoze.

20 Ubanzi wa kudilo wowa wodakula,

ila wang'hali wokona nzala,

ubanzi wa kumoso wowa wolya,

ila hawochiguta.

Chila yumwe komulya mwanage yuye.

21 Manase komulya Efulaimu,

naye Efulaimu komulya Manase,

nawo weng'ha weli, womditila vibi Yuda.

Ila ng'halazi ya Mkulu Nguluwi haisindamala,

yang'hali yagolole moko wa heye.