1 Aku ndo uloli wa Isaya mwana wa Amosi, kuwala isi ya Yuda na muji wa Yelusalemu, kuli mihela ja ulongozi wa Usiya na Yotamu na Ahasi na Hesekiya, wandewa wa Yuda.

2 Mkulu Nguluwi kangulonga hino,

"Mhulichize hemwe ulanga!

Uwiche goya ikutu gwa isi.

Nandiwalisa wana na kuwalolela,

ila nawambelenhuka heni.

3 Isenga lyangumzelaga yula yalingulidima,

nalyo idogowi lyangumzelaga yalingulipa chilyo,

ila Waisilaeli hawanzelele,

wanhu wa heni hawavizelele kota heni ndo ndilinguwalolela!"

4 Wochona wanhu wa isi wawele na gehile,

wanhu wawele na itunyo lya wihe,

lulelo lwa walingudita gehile,

wana wawele nawazizowela nzila za kwajilila!

Nawamleka Mkulu Nguluwi,

nawamlema kwa kumbeza,

heye yawele yelile wa Isilaeli,

na kumhinduchizila chigosi.

5 Lekachoni mlutilile kudita mbuli zilinguwambuza hemwe kugazigwa?

Lekachoni mlutilile kikala kuli kubelenhuka?

Vitwi vya hemwe vyeng'ha navilumizwa ng'hatu,

nhumbula yeng'ha ya chila yumwe wa hemwe ndo ng'hochele.

6 Kulawa kuli uzayo mbaka kumutwi mwa hemwe,

haduhu honhu hawele goya,

ndo kulumila hela na vilonda vilingulavya danda,

viwele havihovujigwe ne kuwopigwa ne kubakalizwa mafuta.

7 Isi ya hemwe naiwifigwa,

miji ja hemwe najilakazwa kwa chiluli.

Wajenzi nawahola mbena za migunda ja hemwe na kuziwifya kuno mlola.

8 Muji wa Yelusalemu naulechigwa uchiwa,

kota chibumuli chilechigwe na yalingwamila kuli mgunda wa mizabibu,

ama kuli mgunda wa matango,

kota muji uwele nauzungulutwa na wang'honyo.

9 Kwa vila Mkulu Nguluwi Yawele na Mong'ho nakawaleka wanhu wachefu,

ahyo muji wa Yelusalemu haudumigwe ng'hatu,

kota Sodoma na Gomola.

10 Yelusalemu, vilongozi wa hegwe na wanhu wa hegwe

ndo kota wala wa Sodoma na Gomola.

Mhulichize choyalinguwalonjela Mkulu Nguluwi,

chila choyalinguwalangusa heye!

11 Mkulu Nguluwi kangulonga hino,

"Mwangijesa kota ndanguzigana nhambiko za hemwe zeng'ha zomlingundavila?

Nandali na ming'holo minji lukami,

jiwele namjilakaza kota nhambiko,

na mafuta ga migongolo ja hemwe.

Silingunojezwa na danda ya mibuguma,

na ming'holo myana na mipongo.

12 Homkuya hali heni kufugamila heni,

haduhu yawele nakawalajiza kubiganga mgati mwa lugagala lwa heni,

kuno mlavya nhambiko azo.

13 Mleche kingalila kahi nhambiko za hemwe, kwa vila hazilingunhanza chinhu!

Ubani wa hemwe ndo izudizo kwa heni.

Siweza kwimilila wihe wa hemwe womlingudita,

kuli mnvina za hemwe za kulawa kwa nyelezi,

ama kuli mazuwa ga hemwe ga Kwesela,

na kuli mihela jinji ja kufugamila.

14 Nhumbula ya heni yanguzizudila,

mnvina za hemwe za kulawa kwa nyelezi,

na mnvina zinji ziwichigwe.

Naziwa itunyo ikulu kwa heni,

nani nhoka kwimilila.

15 Homgolola moko ga hemwe kuli kulanda,

ndokuvisa kumeho kwa heni leka ndeche kuwona hemwe,

hanga molanda lukami, siwahulichiza,

kwa vila moko ga hemwe nagamema danda.

16 Mihovuje na kiyeliza.

Mgose madito ga hemwe gehile hali heni,

mleche kudita wihe.

17 Milanguse kudita ganojile!

Mpale hachi,

muwatanze walingutunyigwa.

Muwape walekwa hachi,

muwalewele wadala wafililwe na walume wa hewo."

18 Mkulu Nguluwi kangulonga hino,

"Muye lelo tijese kuwala kwamula kwa hemwe.

Hanga gehile ga hemwe ga kota lanji ndung'hu,

gowa gazelu kota seluji,

hanga ndo gadung'hu ng'hatu kota danda,

gowa gazelu ng'hatu kota sufi.

19 Wone mokunda kunyhulichiza,

molya ganojile ga isi,

20 ila wone molema na kumbelenhuka heni,

modumigwa kwa ipanga.

Heni Mkulu Nguluwi ndangulonga."

21 Ulole, Yelusalemu, muji uwele nawali nzinzili aho hamwande,

lelo nauwa muji wa ung'hondwa!

Mwaluko nawali umemile kugoloka,

hachi nayali yangikala mgati mwake,

ila lelo naumema kukopola!

22 Sendi zake naziwa wavu,

divai yake inojile naihanzigwa na mazi.

23 Vilongozi wake ndo walingubelenhuka,

wangihanza na wahizi,

weng'ha wangugana kupegwa chinhu kwa chiwalo cha kwajiliza hachi,

na kubilimila kubochela ndolendole kwa uviso.

Hawalinguwalewela walekwa,

hachi za wadala wafililwe na walume wa hewo haiwele chinhu kwa hewo.

24 Lelo, Mkulu Nguluwi Yawele na Mong'ho wa Isilaeli,

kangulonga hino,

"Ndobohola ng'halazi ya heni kwa wang'honyo wa heni,

ndohilula chibida kwa walingitwanza na heni.

25 Ndogolola moko wa heni kuwawika hemwe mchanya mwa chiluli kota sendi,

ahyo, ndowusa wavu wa hemwe weng'ha,

na ukokomoche wa hemwe weng'ha.

26 Ndowapa hemwe watagusa kota vyoiwele hamwande,

na walinguwalonjela hemwe mbuli za luhala kota vyoiwele aho mwaluko.

Hamba, Yelusalemu wochemigwa muji wa hachi,

muji uwele nzinzili."

27 Muji wa Yelusalemu wogomboligwa kwa hachi,

wala wawele mgati mwake, wawele nawalonga gehile ga hewo kwa kutanganika, woloholigwa.

28 Ila walingubelenhuka na wawele na gehile,

weng'ha wodumigwa hamwe na walingumleka Mkulu Nguluwi.

29 Mobasigwa soni kwa vila namjifugamila jimalukolo hasi ha migodi ja mialoni,

jiwele namwali mchijesa kota ndo jelile,

modeuzwa kwa vila namjifugamila jimalukolo kuli vigunda,

honhu hawele namihagulila kujifugamila.

30 Mowa kota mwaloni uwele mahamba gake ganguswina,

kota kagunda kalihela mazi.

31 Munhu yawele na mong'ho kokwajilila,

kota mahamba gakalile vyogalingulakala,

mijito ja heye ndo kota ilapi lya chiluli,

vyeng'ha vyolakala hamwe,

haduhu wa kuchizimya acho chiluli.