1 Wone wahawele kalumbu wa heni,

yawele nakong'ha matombo ga mayangu!

Hamba, wone ndahakufichile ako kunze, ndahakunonele,

na haduhu yoneche yawele yahambezile.

2 Ndahakuholile na kukuhilika kuli ng'handa ya mayangu,

yawele nakandangusa.

Ndahakupele divai ing'hang'hale,

kulawa kuli makomamanga ga heni.

3 Moko wa hegwe wa kumoso wa hasi ha mutwi wa heni,

moko wa hegwe wa kudilo wangung'humbatila.

4 Wahinza wa Yelusalemu ndanguwadedeza,

mleche kwambuza ne kwinula igano mbaka mhela wake houfika.

5 Whaani ayu yalinguya kulawa kuli chiwala kuno yomwegamila yalingumgana?

Nandikwinula hasi ha mtufaa,

hala hawele mayako nakona usungu,

ena, hala hawele mayako nakakuponda.

6 Mbiche kota mhuli mnhumbula mwa hegwe,

kota mhuli kuli moko wa hegwe,

kwa vila igano lina mong'ho kota kubagama,

lina fihi ing'hang'hale kota isi ya wabagame.

Lyangulakaza kota ilapi lya chiluli,

kota ilapi likulu lya chiluli.

7 Mazi menji hagoweza kuzimya igano,

mazi tendema hagoweza kulyusa.

Wone munhu yahalavile sendi za heye zeng'ha kwa chiwalo cha igano,

yahabezigwe ng'hatu.

8 Twanaye lumbu mdodo,

matombo ga heye gang'hali kutona.

Lelo, todita choni kwa ayu lumbu wa hetwe hoyowa yobanichilwa?

9 Wone yahawele lukanzi,

twahamzenjele ilingo lya sendi,

wone kahi yahawele lwizi,

twahamzungulusile kwa mbawo za mielezi.

10 Hamwande mhambaga ya heni nayali kota lukanzi

ila sambi, matombo ga heni ndo kota milingo,

ahyo, nda kota yalingumgalila kikala goya.

11 Solomoni nayali na mgunda wa mizabibu ako Baali-hamoni,

nakawabasila walimi.

Chila yumwe wa hewo nakalipa migwala elufu imwe ja sendi kuli chila mwaka.

12 Ila lukuli lwa heni ndo kota mgunda wa heni wa mizabibu,

na ndangukupa hegwe Solomoni.

Haulinguganigwa kumha heni migwala elufu imwe ja sendi kwa chiwalo cha mafuza ga heni,

ila ndowapa migwala miya mbili ja sendi wala walingundolela.

13 Hegwe ulingikala kuli kagunda,

goloko wa heni wangubeteza kuhulika lizi lya hegwe,

ahyo, ndangugana ng'hatu kuhulika lizi lya hegwe.

14 Uye himahima gwa yondilingukugana,

uwe kota ibala ama chifuno chisongolo mchanya mwa chidunda cha unhunyhililo.