1 Gwa mhinza wa mwana wa mndewa,

ulole ndaze magulu ga hegwe vyogalingunojeza kuli makwamba.

Mahaza ga hegwe ndo kota maganga ga sendi nyinji,

gawele nagahongoligwa na muwanzi yanojile.

2 Ikuvu lya hegwe ndo kota chizombe chinoligwe,

chiwele changuwaga na divai inojile.

Munda wa hegwe ndo kota chilundo cha ngano chizungulutwe kwa yunjiyunji.

3 Matombo ga hegwe ndo kota mibala minyambili,

vifuno vinyambili.

4 Singo ya hegwe ndo kota ilingo lya izino lya itembo,

Meho ga hegwe ndo kota milamba ja Heshiboni, habehi na lwizi lwa Beti-labi.

Mhenyelo ya hegwe ndo kota ilingo lya Lebanoni,

lilingulola kulutila Damasiko.

5 Mutwi wa hegwe ndo kota chidunda cha Kalimeli.

Mnvili za hegwe ndo nhitu na zangupulika,

kunoga kwa hegwe kwanguweza kumibata munhu yoneche mbaka mndewa.

6 Ulole vyouwele unojile na wa kunojeza, gwa yondilingukugana ulingunojeza!

7 Koneka kwa hegwe ndo ng'wemang'wema kota mnazi,

matombo ga hegwe ndo kota vizabala vya mafuza.

8 Nandonga, "Ndokwina kuli mnazi,

ndobawa nazi zake."

Matombo gako ndo kota vizabala vya zabibu,

kunhunyhilila kwa lweselo lwa hegwe ndo kota tufaa,

9 mlomo wa hegwe ndo kota divai inojile.

Lelo, divai ilute mbaka kwa yondilingumgana,

ichililike mholemhole mchanya mwa mlomo na mizino ja heye.

10 Heni ndo wa heye yondilingumgana,

naye kana maya kwa heni.

11 Gwa yondilingukugana, uye tulute kuli migunda,

tukawase ako kuli vijiji.

12 Lelo, tulute lufuku kuli migunda ja mizabibu,

leka tone kota mizabibu najaluka kuzuka,

kota uluwa wake nawaluka kubahula

na kota mikomamanga najilavya uluwa.

Ako ndokupa igano lya heni.

13 Unhunyhililo wa mituletule* naumema kuli ulanga,

habehi na lwizi lwa hetwe hana chila nhanzi ya mafuza ganojile,

ga katali na ga sambi,

gawele nandikuwichila hegwe yondilingukugana.