1 Gwa ulingunojeza kusinda wadala weng'ha, youlingumgana nakaluta kohi?

Nakagaluchila nzila yachi, leka tumpale hamwe na hegwe?

2 Yondilingumgana nakaluta kuli kagunda ka heye, hali mbuta za uluwa ulingunhunyhilila goya.

Kangudima ming'holo ja heye na kubawa yunjiyunji.

3 Heni ndo wa heye yondilingumgana naye ndo wa heni,

ming'holo ja heye kangudimilaga hali yunjiyunji.

4 Yondilingukugana, hegwe ndo unojile kota muji wa Tilisa,

ulingunojeza kota muji wa Yelusalemu,

kwangububuwaza kota chilundo cha wamizi chiwele na bendela.

5 Dedede, ulole hafungo, wone undole ndangusanzalima.

Mnvili za hegwe ndo kota chilundo cha mhene, zilingudulika kulawa kuli chidunda cha Gileadi.

6 Mizino ja hegwe ndo mizelu kota ming'holo jilingulawa koga.

Najenela kuli mlomo wa hegwe, haduhuli liwele nalyuka.

7 Mizeze ja hegwe

ndo kota nusu ya ikomamanga

kumbele kwa shela ya hegwe.

8 Wone hawe na wache wa wandewa makumi sita

na waha makumi nane

na wohambe wating'hane na walume hawalinguwazika,

9 ila ng'hunda ya heni ndo ya chiuyeng'ha

na yahela nongwa,

mhinza wa udewele kwa mayake,

yalinguganigwa na yampondile.

Wahinza wangumlolaga na kumchema yawele yatambichizwe,

wache wa wandewa na waha nawamtogola.

10 Whaani ayo yalinguya kota kubwemwenzuka,

yanojile kota nyelezi na yalingulangaza kota isanya,

kangububuwaza kota chilundo cha wamizi wawele na bendela?

11 Nanyinjila kuli kagunda ka milozi,

kulola mizuchila ja kuli ibindi,

kona kota mizabibu najikula ama mikomamanga najibahula.

12 Ne kuvizela,

maya ga heni ga kuwa na hegwe nagandita heni mbubuwale,

kota nda hagati ha mituka ja chiundewa jilingukwejigwa na falasi.

13 Uhiluche, uhiluche, gwa Mshulami,

uhiluche, uhiluche leka tukulole!

Lekachoni mwangumlola Mshulami,

kota mwanguwalola wanhu walinguvina ngoma ya Mahanaimu?