1 Nechilo yeng'ha lombele mchinhanda mwa heni,

nandimpala yondilingumgana mnhumbula mwa heni,

nandimpala ila simpatile.

2 Nanyinuka na kulubaluba mujini,

mnzila mbaka kuli honhu ha kiting'hana,

nandimpala yula yondilingumgana mnhumbula mwa heni.

Nandimpala ila simpatile.

3 Walingwamila muji nawafika heni lowawele wouzunguluta muji.

Nandiwauza, "Nammona yondilingumgana mnhumbula mwa heni?"

4 Mhela uchefu hela lotilechile na walingwamila muji,

nandimona yula yondilingumgana mnhumbula mwa heni.

Nandimibata, simlechile yoche,

mbaka londimhiliche kaye kwa mamo wa heni,

mbaka kuli chihengo cha yula yamhondile.

5 Wahinza wa Yelusalemu ndanguwadedeza,

kwa ibala na kwa chifuno cha kuli mgunda,

mleche kwambuza ne kwinula igano

mbaka mhela wake houfika.

6 Ndo chinhu chachi chila chilingulawa kugunuche

kota ilingo lya iyosi

chilingunhunyilila manemane na ubani,

unhunyhililo ulinguguzigwa na walingugula na kuguza vinhu?

7 Ulole! Ndo Solomoni

yapapigwe mchanya mwa chigoda cha heye cha undewa

nakazungulutwa na wamizi makumi sita,

wazidahe wanojile wa Isilaeli.

8 Chila yumwe wa hewo yebatile ipanga,

chila yumwe wa hewo ka yazidahe kwa kitowa ngondo.

Chila yumwe wa hewo kana ipanga lya heye mmoko,

wewichile goya kitowa na mng'honyo nechilo.

9 Chigoda cha kumpichila Mndewa Solomoni,

nachigongomanyigwa kwa mbawo zinojile kulawa Lebanoni.

10 Mizengo jake najigongomanyigwa kwa sendi,

chikalilo chake kwa zahabu.

Honhu ha kikalisa nahagubikwa kwa chibende cha lanji ya zambalau,

chihonigwe kwa igano na wahinza wa Yelusalemu.

11 Muye lelo hemwe wahinza wa muji wa Yelusalemu,

mumone mndewa Solomoni.

Nakavala kofia ya chiundewa yavalizwe na mayake,

zuwa lya mnvina ya heye ya kuhesa,

ena, zuwa liwele nhumbula ya heye nayali imemile usangalalo.