1 Heni ndo kota uluwa wa Shaloni,

kota yunjiyunji lya kuli ibindi.

2 Hali wahinza wanji,

yondilingumgana ndo kota yunjiyunji hagati ha miwa.

3 Heye yondilingumgana ndo kunoga kusinda wasongolo wanji,

heye ndo kota igodi lya mtufaa hali migodi ja kisolo,

lubehelo lwake lwangungalila usangalalo,

ifuza lyake ndo linona lukami.

4 Nakanyhola na kunyilika mbaka kuli chituka cha mnvina,

nakangubika kwa igano lya heye.

5 Umhe heni mong'ho kwa zabibu zikalile,

usangalaze heni kwa mafuza ga mtufaa,

kwa vila nda ng'hochele kwa chiwalo cha igano.

6 Moko wa heye wa kumoso wa hasi ha mutwi wa heni,

moko wa heye wa kudilo wangung'humbatila.

7 Ndanguwadedeza hemwe wahinza wa Yelusalemu,

kota vyojiwele mibala na vifuno vya kisolo.

Mleche kwambuza ne kwinula igano mbaka mhela wake houfika.

8 Uhulichize! Yondilingukugana!

Ulole! Ayu aha kanguya,

yozuma mchanya mwa vidunda,

yobilima mchanya mwa vidunda vidodo.

9 Yondilingumgana ndo kota ibala ama chifuno chisongolo.

Ulole! Nakema habehi na lukanzi lwa hetwe,

yolola kukolela mitubuli,

yosunjilila kukolela kuli ipaziya.

10 Yondilingumgana nakandonjela,

"Winuche lelo, gwa yondilingukugana,

ulingunojeza, tulutase.

11 Ulole, mhela wa luhela umala,

nhonya naimala.

12 Uluwa naubahula chila honhu,

mhela wa kwimba ufika,

lizi lya ng'hunda yanguhulikwa kuli migunda ja hetwe.

13 Mtini wangulavya mafuza gake ga mwaluko,

zabibu zilingubahula zangulavya kunhunyhilila kunojile.

Uye lelo, gwa yondilingukugana,

uye tulutase."

14 Gwa ng'hunda wa heni, wivisile kuli mitalawe,

wilajile ndikone kumeho kwa hegwe

na kuhulika lizi lya hegwe,

kwa vila lizi lya hegwe linoga na kumeho kwa hegwe kwangunojeza.

15 "Mtibatile mikanhu,

jila mikanhu midodo,

jilinguwifya migunda ja mizabibu, migunda ja hetwe ja mizabibu jilingubahula."

16 Yondilingumgana ndo wa heni, nani ndo wa heye,

kangunonela heni kota mdimi yalinguhilika migongolo ja heye hagati ha yunjiyunji.

17 Mbaka isanya holilawa na lubehelo holibilima,

uhiluche yondilingukugana, uwe kota ibala,

ama kota chifuno chisongolo mchanya mwa vidunda vidodo vya Beteli*.