1 Ulole vyouwele unojile gwa yondilingukugana!

Ena, ndaze vyouwele unojile.

Meho ga hegwe kumbele kwa shela ya hegwe ndo kota ga ng'hunda.

Mnvili za hegwe ndo kota mhene zilingudulika kulawa kuli chidunda cha Gileadi.

2 Mizino ja hegwe ndo mizelu kota ming'holo jitemigwe milaika,

jilingulawa koga.

Mizino ja hegwe najenela kuli mlomo wa hegwe,

haduhu ne izino liwele nalyuka.

3 Mlomo wa hegwe ndo kota uzi udung'hu,

kumlomo kwa hegwe kwangunojeza.

Mizeze ja hegwe kumbele kwa shela,

ndo kota vihande vili vya ikomamanga.

4 Singo ya hegwe ndo kota ilingo lya Daudi,

liwele nalinoligwa kwa misitali ja maganga,

mchanya mwake naziwichigwa ngawo elufu imwe,

zeng'ha ndo ngawo za wazidahe.

5 Matombo ga hegwe ndo kota mibala minyambili

kota mibala myana minyambili,

jilingulya hagati mwa yunjiyunji.

6 Ndochikala kuli vidunda vila vya manemane na ubani,

mbaka hokubwemwenzuka

na jiza kwajilila.

7 Hegwe kwa unojile kweng'ha, gwa yondikuganile,

kwahela nongwa mgati mwa hegwe.

8 Uye tulutase gwa yondikuganile,

tulutase kulawa Lebanoni,

uduliche kulawa kuli chidunda cha Amana,

kulawa mchanya mwa Senili, kuli chinhembenhembe cha Helimoni,

kulawa kuli mhalika za misimba

kuli vidunda vya iduma.

9 Nakuisangalaza nhumbula ya heni, gwa yondikuganile,

nakuisangalaza nhumbula ya heni,

kwa kundola kamwe hela,

na kwa honhu hado ha ugasi wa hegwe kuli singo ya hegwe.

10 Ulole igano lya hegwe vyolilingusangalaza heni,

yalinguhesigwa wa heni yondilingukugana,

igano lya hegwe lyangusangalaza kusinda divai

na kunhunyhilila koneche!

11 Gwa yondikuganile,

mlomo wa hegwe wangulagaza hanombwa kota ilala,

umyango wa hegwe una hanombwa na itombo.

Unhunyhililo unojile wa nguwo za hegwe ndo kota wula wa Lebanoni.

12 Hegwe ndo kagunda kevisile, yalinguhesigwa wa heni,

yondikuganile,

hegwe ndo mwaluko wa mazi ulingulolelwa,

nzasa ya heni ndiliyeka.

13 Mizuchila ja hegwe ndo kagunda ka makomamanga,

gawele na mafuza ganojile ng'hatu,

kawele na hina na nalido.

14 Nalido na zafalani na misombasomba na mdalasini,

hamwe na chila nhanzi ya igodi lya ubani

na manemane na udi,

na chila nhanzi ya unhunyhililo unojile.

15 Hegwe ndo nzasa ya kagunda ka heni,

ideho lya mazi galinguchililika,

galinguchililika kulawa Lebanoni.

16 Winuche, gwa mbeho ya kasikazini,

uye gwa mbeho ya kusini!

Upute mchanya mwa kagunda ka heni,

leka unhunyhililo wa heye unojile wenele mbaka kumwambu.

Yondilingumgana yoye kuli kagunda ka heye

na kujeza mafuza ganojile ng'hatu.