1 Nambuya kuli kagunda ka heni,

yalinguhesigwa wa heni yondikuganile,

nang'hungajiza manemane ga heni hamwe na unhunyhililo wunji,

nandilya ilala lya heni na hanombwa ya heni,

nanyinwa divai ya heni na itombo lya heni.

Goloko wa hetwe, mulye na munwe!

Migute kwa igano!

2 Nambasa ila nhumbula ya heni haiwasile.

Lizi lya yondilingumgana lyanguhodiza,

"Nyumulile, yalinguhesigwa wa heni yondilingukugana,

ng'hunda ya heni yalihela nongwa.

Mutwi wa heni naudoda kwa nungwi

na mnvili za heni kwa upesi wa nechilo."

3 Navula ikanzu lya heni,

ndaze vale kahi?

Nanyovuga magulu ga heni,

ndaze ndiwiche kahi kuli wavu?

4 Aho yondilingumgana nakadoliza lwizi, nhumbula ya heni naimema usangalalo.

5 Nanyinuka kumchumulila yondilingumgana.

Kuno moko ga heni golagaza manemane,

vidole vya heni navilagaza unhunyhililo

londibatile mhajilo kuchumula lwizi.

6 Nandimchumulila lwizi yondilingumgana,

ila nayali yochile.

Nhumbula ya heni naitweguka kwa kuka kwa heye.

Nandimpala ila simonile.

Nandimchema ila hedichile.

7 Wamizi wa muji nawambona

lowawele wokwamila.

Nawanhowa na kundumiza,

nawasukula ikanzu lya heni,

wala wamizi wa ng'hanzi.

8 Hemwe wadala wa Yelusalemu,

lommona yondilingumgana,

mumlonjele kota ndangutamika kwa chiwalo cha igano.

9 Gwa ulingunojeza kusinda wadala weng'ha.

Hambi ayo ulingumgana kana choni mzidi wa yunji,

mbaka utudedeze ahyo?

10 Yondilingumgana ndo yanojile na kana mong'ho,

yazidahe kusinda walume elufu kumi.

11 Mutwi wa heye ndo unoga kota zahabu inojile,

mnvili za heye ndo kota misolo jibiniche, nhitu kota ibondwa.

12 Meho ga heye ndo kota ng'hunda hafungo ha nzanda,

ng'hunda iwele nzelu kota itombo, meho gawichigwe goya kota maganga ga sendi nyinji.

13 Mizeze ja heye ndo kota mbuta za mgunda wa unhunyhililo.

Mlomo wa heye ndo kota yunjiyunji,

ulingulagaza manemane.

14 Moko ga heye ndo kota ng'hweku ya zahabu,

inoligwe kwa maganga ga Talishishi ga sendi nyinji.

Lukuli lwa heye ndo kota izino lya nhembo linoligwe

kwa maganga ga buluu galingupulika.

15 Magulu ga heye gana mong'ho kota mizengo ja malimali,

jiwichigwe kuli zahabu inojile.

Kumeho kwa heye ndo kota Lebanoni,

nakunoga kota migodi jake ja mielezi.

16 Mlomo wa heye naumema ulonzi unojile,

kangunojeza lukami.

Ayu ndo yondilingumgana, ena goloko wa heni,

hemwe wadala wa Yelusalemu.