1 Lwimbo lunojile kusinda nzimbo zeng'ha za Solomoni.

2 Unonele heni kwa mlomo wa hegwe!

Igano lya hegwe lyangusangalaza heni kusinda divai.

3 Unhunyhililo wa hegwe wangunhunyhilila goya,

na itagwa lya hegwe ndo kota unhunyhililo ujidigwe,

acho ndo chiwalo cha wadala kukugana.

4 Udite himahima mndewa wa heni! Tudite himahima.

Unyhiliche kuli chihengo cha hegwe.

Twangusangalala kwa chiwalo cha hegwe!

Twangulitogola igano lya hegwe kusinda divai.

Wahinza wa Yelusalemu, inoga wone momtogola.

5 Hemwe wahinza wa Yelusalemu,

ngozi ya heni ndo nhitu, ila yangunojeza,

ndo nhitu kota mihema ja Kedali, kota mipaziya ja ihema lya Solomoni.

6 Mleche kunhogolela meho kwa vila ngozi ya heni ndo nhitu,

naiwa nhitu kwa chiwalo cha isanya.

Wang'holozangu nawanzudila

na kundita ndiwe ndikola mijito kuli migunda ja mizabibu,

ahyo, siwele na mhela wa kuhega kwa chiwalo cha lukuli lwa heni.

7 Ndonjele gwa yondilingukugana,

kohi kodimila ming'holo ja hegwe

na kohi kojidita ming'holo ja hegwe jesele?

Ndonjele kwa vila silingugana kulubaluba kota mng'hondwa,

habehi na vilundo vya ming'holo vya goloko wa hegwe?

8 Gwa mdala unojile kusinda weng'ha,

wone hauvizelele udite hino,

uwinze uzayo wa ming'holo

na kuhilika mhene za hegwe kuli honhu ha kudila migongolo habehi na mihema ja wadimi.

9 Mganwa wa heni, kunoga kwa hegwe ndo kota yumwe hali falasi wa chiundewa wa Misili,

yula yawopigwe kuli umwe hali mituka ja ngondo.

10 Mizeze ja hegwe jangunojeza hojiwa na vinoligo,

na singo ya hegwe hoiwa na ugasi wa maganga ga sendi nyinji.

11 Tokugongomanyila ugasi wa zahabu,

uwele wonoligwa kwa sendi.

12 Mhela mndewa loyawele kuli ikochi lya heye,

unhunyhililo wa heni nawenela chila honhu.

13 Yondilingukugana, hegwe ndo kota unhunyhililo,

ulinguwasa hagati ha matombo ga heni.

14 Kwa heni ndo kota chizabala cha uluwa wa hina,

kulawa kuli migunda ja mizabibu ja Eni-gedi.

15 Ulole vyouwele unojile, gwa yondilingukugana!

Ulole vyouwele unojile!

Meho ga hegwe ndo kota ga ng'hunda.

16 Ulole vyouwele unojile yondilingukugana!

Ena, ulole vyounojile!

Misolo midodi jowa ndo chinhanda cha hetwe.

17 Migodi ja mielezi jowa ndo mizengo ja ng'handa ya hetwe,

mibeloshi jowa ndo chinduwiko chake.