1 Mkumbuchile yakulumbile kuli mazuwa ga usongolo wa hegwe,

logang'hali kuya mazuwa ga magazo, mhela houlonga,

"Silingusangalala kwa chiwalo cha kikala aku."

2 Mkumbuchile yakulumbile hala isanya na lumuli na nyelezi na nhondwe loviwa ving'hali kuwichigwa jiza,

mhela ng'hungugu loiwa ing'hali kuhiluka hala nhonya loitowile,

3 mhela uwele moko galingukwamila gangukakama,

mhela magulu ga hegwe hogowa ng'hochele,

na mizino ja hegwe ja kubalasila hojiwa hajilingutanza chinhu kwa chiwalo cha uchefu,

na mhela meho ga kusunjilila kuli mitubuli hogowa gangubilabila.

4 Mkumbuchile yakulumbile mhela uwele makutu ga hegwe hagoweza kuhulika goya,

hauweza kulihulika lizi lya wanhu wawele kuli mijito,

mhela wa nechilo, hauweza kuwasa goya,

ila kohulika videje hoviwa vikwimba,

ahyo, kokwinuka kwa chiwalo cha videje avyo,

5 mhela uwele hegwe kodumba chinhu chinuche na kukabusa mnzila,

mhela uwele kowa na nyimvi kota uluwa uzelu wa igodi lya mlozi,

na houjenda kwangikwang'wala kota ndede itochile,

hegwe kowa ulihela maya kahi.

Mhela awo ndo munhu koganigwa yalute kuli ng'handa ya heye ya mazuwa gose,

walingulombocheza wenji wowa chila honhu.

6 Mkumbuchile yakulumbile mhela ng'weso ya sendi ing'hali kudumuka kwa chiwalo cha kulala,

ama chisaye cha zahabu hochiwa ching'hali kugwa,

mhela ibiga ling'hali kutulika kuli ideho,

iguludumu ling'hali kutulika kuli honhu ha kudeha mazi,

7 mhela lukuli holuhiluka kuli misanga kolulawile,

na muhe wohiluka kwa Nguluwi yaulumbile.

8 Mdamla kangulonga, "Iyosi! Iyosi!

Chila chinhu ndo kota iyosi!"

9 Mdamla hawele na luhala hela, ila kahi nakawalangusa wanhu uwanzi. Nakejesa na kupugajiza nhelo nyinji na kuzandika. 10 Mdamla nakapugajiza leka yawe na ulonzi wa kukomya na chila chiwele nakandika nachali chigoloche ng'hatu.

11 Ulonzi wa munhu yawele na luhala ndo kota migodi jihongoche jiwele mdimi kangutumiya kulongozela migongolo. Kahi nhelo zilingulawa kwa mdimi yumwe, ndo kota vigingi vitowelelwe goya kuli misanga. 12 Mzidi wa ago, wilolele mwanangu! Haduhu kuduma kwa kwandika vitabu, nako kusoma ng'hatu kwangutunya lukuli.

13 Ulonzi weng'ha naulonjigwa, ila naipona mbuli imwe.

Mdumbe Nguluwi, ubatilile malajizo ga heye,

kwa vila aji ndo mijito joyapegwe munhu.

14 Nguluwi kogatagusa madito ga hetwe geng'ha,

mbaka gala gotulingudita chinyele, gawe ganojile ama gehile.