1 Nandijesa mnhumbula mwa heni, "Goya, ndojeza kudita chila chinhu leka ndiwe na usangalalo." Ila mbuli ayi ndo iyosi, ayo nayo nayoneka kota hailingutanza chinhu. 2 Nandonga, "Kuseka chila mhela ndo upoka na kulutilila kudita mbuli zilingundita sangalale hakulingugala utanzi wa mhela winji." 3 Lombele ndipala luhala, nandijesa ng'hatu, hamba nanyamula kisangalaza kwa kunwa lukami divai. Nanyamula kunwa divai leka kona kota ndo goya kuli mhela awu uchefu wa kikala hano muisi.

4 Kahi nandita mbuli ng'hulu, ziwele ndo kizenjela ng'handa ng'hulu na kulima migunda mikulu ja mizabibu. 5 Nangongomanya vigunda na luga lwa mnvina na kunyala chila nhanzi ya migodi ja mafuza mgati mwake. 6 Nangongomanya milamba ja kukungajiza mazi ga kuboholela migodi aji jiwele najali jikula goya. 7 Nangula wapogozi wadala na walume na wapogozi wanji nawapondigwa kuli ng'handa ya heni. Nandali kahi na vilundo vikulu vya misenga na ming'holo na mhene kusinda munhu yoneche yawele nayali yochikala Yelusalemu, mhela heni lombele nding'hali kulongoza. 8 Nandikungajizila sendi na zahabu kulawa kuli ng'hano za wandewa wa honhu hanji. Nandali na walingwimba walume na wadala, kahi nandali na waha, wawele nawali woisangalaza nhumbula ya mlume. 9 Nandali ndizeleka ng'hatu kusinda munhu yunji yoneche yawele nakandongola kikala Yelusalemu na nandali na luhala ng'hatu.

10 Silechile kuhola chinhu choneche chiwele meho ga heni nagali na maya nacho,

haduhu chinhu chinojile chiwele sijezile.

Nhumbula ya heni naisangalala kwa chiwalo cha mijito ja heni jeng'ha,

acho nachali ndo chonolo cha mbuli za heni zeng'ha zondiziditile.

11 Vyombele ndijesa kuwala geng'ha gawele moko ga heni nagali gaditile,

na gala gawele nandali nditunya leka kweneza,

ago geng'ha ndo iyosi, ndo kota kubilimisa mbeho,

hakuwele na chinhu choneche cha mzidi hano muisi.

12 Hamba nandiwuza,

"Mndewa yunji kodita choni chiwele heni, mndewa Solomoni sichiditile?"

Hamba nanyaluka kiwhaniza kuwala luhala na lukwale na upoka.

13 Nambona kota luhala ndo lunoga lukami kusinda upoka,

kota vila lumuli vyoluwele lunojile kusinda jiza.

14 Munhu yawele na luhala kana meho kumutwi mwa heye, leka yone hoyojenda,

naye mpoka howeza kona hoyojenda, kwa vila kangujenda kuli jiza,

ila hamba nambona kota weng'ha weli kuduma kwa hewo kwangiwhana.

15 Hamba nandiwuza mnhumbula mwa heni, "Kuduma kwa mpoka kofika heni kahi,

ndowa na choni chinojile ng'hatu kwa kuwa na luhala?"

Ahyo nanyidichila mnhumbula mwa heni, "Ali nalyo ndo iyosi."

16 Kwa vila munhu yawele na luhala, ndo kota vyoiwele kwa mpoka,

weng'ha weli wobagama, hokumbuchilwa kwa mhela winji.

Kuli mazuwa galinguya weng'ha wosemwigwa,

kota vila vyoyawele mpoka, yawele na luhala kahi kanguganigwa kubagama.

17 Ahyo, nandikuzudila kikala, kwa vila mijito jilingukoleka muisi najali masinzo kwa heni. Geng'ha ago ndo iyosi, ndo kota kubilimisa mbeho. 18 Nandichizudila chila chinhu chiwele nandali nditunyile hano muisi, kwa vila ndoganigwa ndimlechele yula yalinguya kulongoza hondibagama. 19 Whaani yalinguvizela kota ayo kowa munhu yawele na luhala ama mpoka? Ila hanga kowa mpoka, heye ndo yawele kohalila vinhu vyeng'ha viwele nandikangaza ng'hatu na kwa luhala leka kuvipata. Ali nalyo ndo iyosi. 20 Ahyo nhumbula ya heni nayaluka kugozola kuwala mijito jeng'ha jong'holile kwa kikangaza hano muisi, 21 kwa vila munhu kanguweza kukola mijito ja heye kwa luhala na kwa uwanzi lukami, hamba koganigwa kumlechela vinhu vyeng'ha munhu yunji yawele havipalile kwa kitunya. Ali kahi ndo iyosi na ndo mbuli yihile ng'hatu. 22 Munhu kopata choni kwa chiwalo cha magazo ga heye makulu na kitunya kwa kikangaza kuli mijito hano muisi? 23 Mazuwa ga heye geng'ha ga mijito nagamema usungu na masinzo, mbaka kuli mhela wa nechilo nyhala za heye hazilingwesela. Ali nalyo ndo iyosi.

24 Haduhu chinhu chinojile ng'hatu chiwele munhu koweza kudita mzidi wa kulya na kunwa na kusangalala kwa chiwalo cha mijito ja heye. Ndangukunda kota aga twangupegwa na Nguluwi, 25 kwa vila haduhu munhu yawele koweza kusangalala kwa chiwalo cha vinhu avyo mzidi wa heni. 26 Kwa yula munhu yalingumnojeza Nguluwi, Nguluwi kangumpaga luhala na uwanzi na usangalalo, ila kwa yawele na gehile Nguluwi kangumpaga mijito ja kukungajiza lufufu na kuwika kuli ng'hano leka Nguluwi yamhe yula yalingunojezwa naye. Kukola mijito kwa hewo kwa kikangaza ndo iyosi, ndo kota kubilimisa mbeho.