1 Nandijesa kwa chiwalo cha mbuli azi zeng'ha, hamba nandivizela kota Nguluwi kana ludali kwa wala wawele na luhala na watanganiche. Choneche choweza kulawila kwa yumwe wa hetwe, ahyo hatuweza kuvizela kota kikala kowa kunojile ama kwihile. 2 Weng'ha wana kuduma kulingiwhana, watanganiche na wehile na welile na wakokomoche na wala walingigala nhambiko na wohambe wegale nhambiko. Kota vyoiwele kwa wanojile ndo hihyo du vyoiwele kwa walingudita gehile na kota vyoiwele kwa wala walingilaha ndo hihyo du vyoiwele kwa walingudumba kilaha. 3 Ayi ndo mbuli yihile ng'hatu hali zeng'ha zilingulawila hano muisi, kwa vila kuduma kukula kwanguwafikaga weng'ha. Kuli mhela weng'ha wa ukomu wa hewo, wanhu wangumemaga wihe na lukwale, hamba wangubagamaga. 4 Yoneche yawele hali wawele wakomu kana kitumbila, mbaka libwa likomu ndo fola kusinda isimba lifile.

5 Kwa vila wawele wakomu wanguvizela kota wobagama, ila wabagame hawalinguvizela choneche, hawalingubochela chonolo choneche mbaka kukumbuchilwa kwa hewo nakusemwigwa. 6 Igano lya hewo na kuzudila kwa hewo na fihi za hewo navyajilila hamwe na hewo, hawochihanza kahi kuli lyoneche lilinguditigwa hano muisi.

7 Ulute ukalye chilyo cha hegwe kwa kusangalala na unwe divai ya hegwe kwa nhumbula ya kusangalala, kwa vila Nguluwi kangukunda choulingudita. 8 Uvale nguwo zinojile za mnvina na wibakalize mafuta mazuwa gose. 9 Usangalale hamwe na mchewako kwa chiwalo cha ukomu wa hegwe kuli mazuwa geng'ha ga kikala kwa hegwe kuwele ndo kota iyosi koupegwe na Nguluwi hano muisi, kwa vila aho ndo honhu hako kuli ukomu na kuli mijito ja hegwe jing'ang'ale hano muisi. 10 Ukole mijito kwa mong'ho wa hegwe weng'ha kuli chila chinhu choulingudita. Kuli mhela uchefu hela koluta kuli isi ya wabagame, kuwele kwahela mijito ne kiwika goya ne uwanzi ne luhala.

11 Nambona chinhu chinji kahi muisi. Hawawele walingubilima lukami wangusumya kuli kitwanza, ama wawele na mong'ho walingusumya kuli ngondo, ama wawele na luhala walinguwa na chilyo cha kuhega, ama wawele na nyhala nyinji walingupata lufufu, ama wawele na uwanzi walingupata uganililo, ila mhumu yanguwafikaga wanhu weng'ha. 12 Munhu halinguvizela kota mhela wa heye wofika nili. Kota vila somba vyozilingugwilizwa kuli utandawala ama kota videje vyovilingugwilizwa kuli idiwa, ndo hihyo du wanhu vyowalingugwilizwa na mhela wihile vyoulinguya ne kuvizela.

13 Kahi nambona nhelo ayi ya luhala muisi, iwele nayali inojile lukami kwa heni. 14 Nakwali na muji udodo uwele nawali na wanhu wachefu mgati mwake. Mndewa yumwe yawele na mong'ho nakoya na kuuzunguluta na kiwika goya kuutowa. 15 Kuli muji awo nakwali na munhu yumwe mzunwa ila nayali na luhala. Nakaulohola muji wula kwa luhala lwa heye, ila hakuwele na munhu yawele hamba nakamkumbuchila yula mzunwa. 16 Ahyo nandonga, "Luhala ndo lunoga lukami kusinda mong'ho." Ila luhala lwa mzunwa nalubezigwa, haduhu yawele nakahulichiza ulonzi wa heye kahi.

17 Ulonzi wa uliholile wa yawele na luhala wanguhulichizwa

kusinda iyowe lya chilongozi wa wapoka.

18 Luhala luna mong'ho lukami kusinda vinhu vya kitowela ngondo,

ila wihe umwe wanguwifyaga ganojile menji.