1 Ng'honzi imwe ifile mgati mwa ibuli lya unhunyhililo,

yangwambuzaga kunhunyhilila kunojile kwajilile.

Hihyo du, upoka udo wangwambuzaga luhala na lutogo kusumigwa.

2 Majesa ga munhu yawele na luhala gangumlongozaga munhu kudita ganojile,

ila mpoka kangwajilizwaga na majesa ga heye.

3 Mbaka hoyojenda mnzila, mpoka kangoneka vyoyawele,

kangilajila kwa chila yumwe ndaze vyoyawele mpoka.

4 Chilongozi hoyowa na ng'halazi kwa chiwalo cha hegwe, uleche kuhaleka honhu hako ha mijito,

nongwa ng'hulu zoweza kulechelwa housindamala.

5 Hana wihe uwele nandiwona muisi

wihe ulingwambuzwa na vilongozi.

6 Wapoka wanguwichigwa kuli honhu ha kuchanya kuli ulongozi,

kuno wawele na lufufu wangubezigwa.

7 Nandiwona wapogozi wawele wakwinile falasi,

kuno wakulu wojenda kota wapogozi.

8 Yalingubawa isimo, hanji kogwa mgati mwake,

yalingubomola lukanzi lwa maganga, hanji kolumigwa na izoka.

9 Yalinguhongola maganga hanji kangulumizwa na ago maganga,

yalingutema migodi hanji kangulumizwa na migodi ajo.

10 Wone iwago liwe lidujile,

mong'ho winji wanguganigwa,

ila uwanzi wodita mbuli imale himahima.

11 Wone izoka lyomluma mteleka mikwandi hoyowa yang'hali kupemba mluli,

ayo mteleka mikwandi halinguganigwa kupegwa sendi.

12 Ulonzi wa yawele na luhala wangumtanza yula yalingulonga,

ila mpoka kangudumigwa na choyalingulonga.

13 Mpoka ayo kangwalukaga kulonga ulonzi wa chipoka,

hamba kangusindaga kwa kulonga ulonzi wa lukwale,

14 mpoka kangulutilila kulonga ulonzi winji.

Whaani yoweza kulonga mbuli yachi yolawila hamba?

Haduhu yoneche yalinguvizela lilinguya.

15 Mijito ja mpoka jangumtunyaga heye yuye,

halinguizela nzila ilinguluta kuli muji.

16 Mbuli zihile zowafika wanhu wa isi wawele chilongozi wa hewo ndo msongolo mpoka,

na wakulu wawo wangudita mnvina chila mhela.

17 Motambichizwa hemwe wanhu wa isi muwele mndewa wa hemwe kowa na luhala,

na muwele vilongozi wa hemwe wangudita mnvina kwa mhela uwichigwe hela,

kwa chiwalo cha kiyipa mong'ho, ila haiwele kwa chiwalo cha kugala.

18 Wone munhu yawe mgata, chinduwiko cha ng'handa chosegama,

kwa chiwalo acho, ng'handa ya heye yohulula na kugwa.

19 Kulya chilyo chinojile na kunwa divai kwangutwambuza tusangalale,

ila twanguweza kusangalala kwa chiwalo cha vinhu avyo vyeng'ha,

wone tuwe na sendi za kugula vinhu avyo.

20 Uleche kijesa kumpanjila mndewa wa hegwe,

ama yawele na lufufu, hanga kowa mchihengo cha hegwe,

kwa vila videje vyohulika lizi lya hegwe houwa uliyeka,

ama chilumbigwe chilinguguluka chowikula ulonzi wa hegwe.