1 Fola itagwa liwele na lutogo lunojile kusinda lukuli luwele na unhunyhililo unojile,

nalyo zuwa lya kubagama ndo linoga kusinda lya kupondigwa.

2 Fola kuluta kuli ng'handa ya walingulombocheza kusinda kuluta kuli ng'handa ya mnvina,

kwa vila kubagama ndo kuduma kwa chila munhu,

wawele wakomu wanguganigwa kijesa kuwala mbuli ayo.

3 Fola kuwa na masinzo kusinda kuseka chila mhela,

kwa vila masinzo gangutudita tijese lukami kuwala ndaze vyotulinguganigwa kikala.

4 Yawele na luhala kangijesa kuwala masinzo,

ila mpoka kangijesa kuwala kusangalala hela.

5 Fola kuhulichiza makanyo ga wawele na luhala

kusinda kuhulichiza nzimbo za lutogo kulawa kwa wapoka.

6 Kuseka kwa mpoka kwangumala himahima,

ndo kota lizi lya miwa hojiwa jilakala kuli chiluli.

Ali nalyo ndo kota iyosi.

7 Kubunza kwangumditaga yawele na luhala yawe mpoka,

na kubochela chinhu kwa chiwalo cha kwajiliza hachi, kwanguwifyaga nhumbula.

8 Fola kuduma kwa mbuli kusinda mwaluko wake,

fola kwimilila kusinda kidaya.

9 Uleche kuzudila himahima,

kwa vila ng'halazi yangikalaga mgati mwa wapoka.

10 Uleche kulonga, "Mazuwa ga katali nagali ganojile kusinda mazuwa aga,"

kwa vila walihela luhala ndo wangulongaga ahyo.

11 Luhala ndo chinhu chinojile ng'hatu kota uhalizi,

kwa vila lwanguwatanza wala walingikala.

12 Kwamilwa na luhala ndo kota kwamilwa na sendi,

ila luhala ndo lunoga lukami kusinda sendi, kwa vila loweza kuulohola ukomu wa hegwe.

13 Wijese ng'hatu kuwala chila chinhu choyachiditile Nguluwi.

Whaani yoweza kugolola chinhu choyachibinile Nguluwi?

14 Mhela mbuli hoziwa zinojile usangalale,

na wone mhela mbuli hoziwa vibi,

ukumbuchile kota Nguluwi yuye ndo yalingwambuza mbuli zinojile

na ndo yuye kahi yalingwambuza mbuli zili vibi zilawile.

Ahyo, huweza kuvizela choni cholawila kwa hegwe kuli mhela ulinguya.

15 Kuli kikala kwa heni nambona mbuli mbili,

ziwele haziwele ubewe kwa heni kuzizela, kota kujeza kubata iyosi.

Nandiwona watanganiche wangubagama kuno wang'hali wasongolo,

na wehile wangulutilila kikala kwa mhela winji.

16 Uleche kuwa yatanganiche lukami ama kuwa na luhala mzidi wa vyoilinguganigwa,

lekachoni utweguche nhumbula?

17 Uleche kudita wihe mzidi ne kuwa mpoka lukami,

wone kodita ahyo, koweza kubagama kuno mhela wa hegwe haunafika.

18 Wijeze kudita mbuli azo.

Munhu yalingumdumba Nguluwi kohulichiza makanyo geng'ha meli.

19 Wone kuna luhala, kowa na mong'ho lukami,

kusinda vilongozi kumi kuli muji.

20 Haduhu yatanganiche muisi,

yalinguditaga ganojile mhela weng'ha ne kudita gehile.

21 Uleche kupugajiza chila ulonzi uwele wanhu wangulonga,

kwa vila wone udite ahyo, koweza kuhulika chitumagwa wa hegwe kangulonga ulonzi wihile ulingukuwala.

22 Uleche kusemwa kota,

nagwe nakulonga ulonzi wihile kwa wanji.

23 Kwa luhala lwa heni nandizijeza mbuli azi zeng'ha,

nandali ndigana kuwa munhu yawele na luhala, ila luhala nalwali kutali na heni.

24 Yangoneka kota luhala lwa kutali ng'hatu kwa heni,

ndikomya, haduhu munhu yoneche yawele koweza kuvizela kuwala chila chinhu.

25 Nanyamula kilangusa mbuli nyinji leka ndiwe na luhala,

nandali ndigana kuvizela kuwala kikala vyokuwele,

nandali ndigana kahi kuvizela mbuli za wihe na za upoka zilinguditigwa na wanhu.

26 Nandichizela chinhu achi,

kota mdala mwihe ndo yehile kusinda kubagama.

Lukuli lwake na nhumbula ya heye ndo idiwa.

Komgwiliza yalingudita gehile,

ila yalingumdumba Nguluwi, howeza kugwilizwa.

27 Achi ndo chinhu chiwele nandichizela,

lombele ndijeza kilangusa ng'hatu kuwala vinhu,

kuwele ndo kujeza kuvizela chiwalo cha chila chinhu,

28 nding'hali ndangupala, ila sipata,

nandali ndimpatile mlume yumwe yagoloche hali elufu imwe,

ila haduhuli mdala yumwe yagoloche hali wadala weng'ha.

29 Ali liliyeka ndo ndilipatile.

Nguluwi nakawalumba wanhu wagoloche,

ila hewo nawazifika nzila nyinji za kudita wihe.