1 Uwe uchilolela houluta na kuihejelela ng'handa ya Nguluwi. Fola kuluta hala na kilangusa kusinda kulavya nhambiko kota vyowalingudita wapoka, wanhu wohawagazele ganojile na gehile. 2 Wijese louwa ung'hali kulonga na uleche kilaha himahima hali Nguluwi, kwa vila Nguluwi ka kilanga nagwe kwa muisi. Ahyo uleche kulonga ulonzi winji. 3 Munhu vyoyowa yosanzalima ng'hatu, ndo vyoyolota na lizi lya mpoka ndo ulonzi winji.

4 Wone wilahe kwa Nguluwi, uleche kukawila kweneza. Nguluwi halingunojezwa na wapoka. Weneze chowilahile. 5 Inoga kuleka kilaha kusinda kilaha hamba uleche kweneza. 6 Wilolele leka mlomo wa hegwe uleche kukwinjiza kuli gehile, hamba umlonjele mtambika kota hunuwile kudita chilaho kota acho. Lekachoni kumdita Nguluwi yazudile na kujiwifya mijito ja hegwe? 7 Kilaha kota kodita chinhu na kuleka kudita chinhu acho, ndo kota kulota kulihela utanzi. Ahyo, mbuli inojile ndo kumdumba Nguluwi.

8 Houwona wazunwa wangubunzigwa kuli isi kwa vila utaguso na hachi navyajilila, uleche kububuwala kwa chiwalo cha mbuli azo, kwa vila chila chilongozi yalinguwabunza wanhu awo, ka hali ulongozi wa mkulu yunji na mchanya mwa awo weng'ha hana vilongozi wanji wawele ndo wakulu ng'hatu kusinda hewo. 9 Mbena za isi ndo kwa chiwalo cha weng'ha, mbaka mndewa yuye kangulyaga kulawa kuli migunda.*

10 Yoneche yalingugana sendi hochiguta kwa sendi,

yoneche yalingugana lufufu hochiguta kwa choyawelenacho.

Ali nalyo kahi ndo kota iyosi.

11 Wone uwe na lufufu lwinji, wanhu wenji wogana uwape chilyo.

Munhu halingupata mzidi wa lufufu lwa heye,

kwa vila wanji wanguluhola kulawa kwa heye.

12 Usinjizi wa mkola mijito ndo unoga, hanga yawe nakalya chido ama chinji,

ila usinjizi wa yawele na lufufu ndo wa lunhwinhwi, kwa vila mzidi wa lufufu lwa heye lwangumtunyaga nechilo yeng'ha.

13 Nandiwona wihe ukulu muisi.

Munhu kanguwa na lufufu, ila haluwele lunojile kwa heye,

14 kwa vila mbuli yangulawila na kwambuza kwajilila kwa lufufu lwa heye,

ahyo, hoyobagama kwanguwa haduhu chinhu chiwele chosigala kwa chiwalo cha uhalizi wa mwana wa heye.

15 Loyapondigwe, hoyile na chinhu choneche,

na hoyobagama, howeza kuhola chinhu choneche,

chiwele nachilawa kuli mijito ja heye ja kikangaza.

16 Mbuli ayi kahi ndo yiha ng'hatu.

Munhu hoyopondigwa halinguya na chinhu muisi,

ahyo, hoyokuka aha muisi, kokuka ne chinhu.

Nakakola mijito kwa kikangaza, ila halingupata chinhu chilingukala mazuwa gose.

17 Kuli mazuwa ga kikala kwa heye kweng'ha,

nakekala hasi ha ng'hungugu, kutweguka nhumbula na ng'halazi.

18 Nandivizela kota inoga kwa munhu kulya na kunwa na kusangalala kwa chiwalo cha mijito ja heye jing'ang'ale joyalingujikola muisi, kuli mazuwa mado ga ukomu wa heye goyapegwe na Nguluwi, kwa vila ndo hachi yake. 19 Mzidi wa geng'ha, Nguluwi hoyomha munhu yoneche lufufu na kusangalala kwa chiwalo cha kutumiya vinhu avyo na kusangalala kwa chiwalo cha mijito ja heye, vinhu avi ndo ndolendole kulawa kwa Nguluwi. 20 Nguluwi kanguwaditaga wanhu wasangalale kwa kuwapa mijito, leka waleche kijesa kuwala mazuwa ga hewo ga ukomu vyogawele mado.