1 Hamba nambona kahi kubunza kweng'ha kuwele nakuditigwa muisi. Nandigona mahozi ga yalingubunzwa kahela wa kumhembuliza. Yula yalingumbunza myage nayali na mong'ho nakwali haduhu wa kumhembuliza yalingubunzwa. 2 Nani nandonga kota fola kwa yula yawele nakabagama kusinda yula yawele mkomu. 3 Ila fola ng'hatu kwa yula yawele hopondigwa, kusinda wala weli wawele ndo mkomu na yabagame, kwa vila heye yawele hopondigwa kowa yang'hali kuwona wihe ulinguditigwa muisi.

4 Nandivizela chiwalo cha wanhu kukola mijito kwa kikangaza leka mijito ja hewo jiwe minji lukami, ndo kwa chiwalo cha kuwonela maya walingikalasa habehi na hewo. Ila ali nalyo ndo iyosi, ndo kota kubilimisa mbeho.

5 Mpoka halingugana kukola mijito,

ahyo, kangubagama kwa vila kanguwa kahela chilyo.

6 Fola kuwa na chinhu chido hamwe na kikala goya,

kusinda kuwa na vinhu vinji hamwe na kitunya,

kwa vila ndo kota kubilimisa mbeho.

7 Nambona kahi chinhu chiyage chiwele ndo kota iyosi muisi. 8 Nakwali na munhu yawele nayali yaliyeka, hawele na mwana ne mng'holoze yoneche, ila halechile kukola mijito na halingiguta kwa lufufu lwa heye ne kwesela na kiwuza, "Ndangitunya ahi kwa chiwalo cha whaani? Lekachoni nani ndangibunza kusangalala?" Ali kahi ndo iyosi, ndo mijito jiwele na magazo!

9 Fola kuwa wanhu weli kusinda yumwe, kwa vila howowa hamwe wokola mijito goya kwa kitanza. 10 Wone yumwe hali hewo kogwa myage komwinula, ila wone munhu kogwa na kayeka, yowa ndo mbuli yihile ng'hatu kwa vila kowa haduhu wa kumtanza kwinuka. 11 Wone kuwe na chipute wanhu weli wowasa hamwe leka kigalila ivuche, ila munhu koweza ndaze kigalila ivuche heye yaliyeka? 12 Munhu yawele yaliyeka koweza kusumigwa na munhu yunji, ila wanhu weli woweza kumtowa na kumsumya munhu ayo. Kahi ng'weso itawigwe goya ng'hatu kwa nyuzi zidatu, haiweza kudumuka himahima.

13 Fola msongolo mzunwa yawele na luhala kusinda mndewa sekulu mpoka yawele halingugana kubochela makanyo. 14 Mbuli za msongolo kota ayo zoweza kulutilila goya na hamba kuwa mndewa, hanga mhaza na mayake nawali wazunwa ama hanga heye nayali mchinweng'ho kwa mhela umwenga. 15 Nandimona chila yumwe muisi yomuwinza chilongozi msongolo yawele nakoya na kuwa na mndewa hala mndewa loyabagame. 16 Wanhu walingumuwinza nawali wenji mbaka hawawezile kuwazigwa. Ila wala wawele wokuya hamba hawoweza kunojezwa na heye. Ali nalyo ndo iyosi, ndo kota kubilimisa mbeho.