1 Hana mhela kwa chiwalo cha chila mbuli,

na kwa chila chilinguditigwa hasi ha ulanga.

2 Hana mhela wa kupondigwa na mhela wa kubagama,

mhela wa kunyala na mhela wa kubeta ganyaligwe,

3 mhela wa kukopola na mhela wa kulohola,

mhela wa kubomola na mhela wa kuzenga,

4 mhela wa kulila na mhela wa kuseka,

mhela wa kulombocheza na mhela wa kuvina,

5 mhela wa kukungajiza na mhela wa kusambalula,

mhela wa kukumbatila na mhela wa kuleka kukumbatila,

6 mhela wa kupala na mhela wa kwajiliza,

mhela wa kuwika na mhela wa kutoza,

7 mhela wa kudadula mivalo na mhela wa kuhona,

mhela wa kunyamalila na mhela wa kulonga,

8 mhela wa kusangalala na mhela wa kuzudila,

mhela wa ngondo na mhela wa kikala goya.

9 Mkolamijito kopata chinhu chachi cha mzidi kwa chiwalo cha kikangaza kwa heye? 10 Nandijona mijito jing'ang'ale jiwele Nguluwi nakajiwika kwa chiwalo cha wanhu. 11 Nakadita chila chinhu chiwe chinojile kwa mhela wake. Nakatupa maya ga kugazela gawele golawila, ila hatupele kuvizela ng'hatu kuwala gala gawele Nguluwi nakagadita kulawa mwaluko mbaka kuduma. 12 Nandivizela kota haduhu chiwele chinojile ng'hatu kwa wanhu kusinda kuwa na usangalalo na kudita ganojile mhela howowa wochikala. 13 Tweng'ha twanguganigwa kunwa na kusangalala kwa chiwalo cha mijito ja hetwe, kwa vila awo ndo utambichizo wa Nguluwi. 14 Ndanguvizela kota chila chinhu choyalingudita Nguluwi chochikala mazuwa gose, haduhu munhu yawele koweza konjeza ama kupunguza. Nguluwi kanguditaga ahyo leka wanhu wamdumbe heye. 15 Choneche chiwele baho nachali baho, chila chiwele chowa baho nachali baho kulawa katali, naye Nguluwi kangugachemaga gala gakolile gahiluche kahi.

16 Nambona chinhu chinji kahi muisi, mbaka kuli chitala, honhu hawele watagusa wanguganigwa kudita hachi, nawadita wihe winji. 17 Nandali ndijesa, "Nguluwi kowahilika kuli utaguso weng'ha weli, watanganiche na wehile, kwa vila kowa na mhela kwa chiwalo cha chila mbuli, mhela wa kutagusa madito geng'ha."

18 Nandijesa kahi, "Nguluwi kanguwajezaga wanhu leka kuwalajila kota hewo ndo kota migongolo, 19 kwa vila chilingulawila kwa wanhu ndo chilingulawila kwa migongolo. Vyojilingubagama migongolo ndo vyowalingubamaga wanhu, weng'ha wana lweselo lulingiwhana, wanhu wahela chinhu cha mzidi kusinda migongolo. Chila chinhu ndo iyosi. 20 Weng'ha wangulutaga honhu halingiwhana, weng'ha wangulawaga kuli nhimbwisi na weng'ha wanguhilukaga kuli nhimbwisi. 21 Whaani yalinguvizela ng'hatu kota muhe wa munhu wangulutaga kuchanya na muhe wa igongolo wangudulikaga hasi kuli misanga?"

22 Ahyo nambona kota haduhu chinhu chiwele chinojile ng'hatu kwa munhu kusinda kusangalala kwa chiwalo cha mijito ja heye. Haduhu yalinguweza kumhilula leka yoye kona chila chilinguya kuditigwa hoyobagama.