1 Nandiyona mbuli yihile yinji kahi muisi, ilinguwatunya ng'hatu wanhu. 2 Nguluwi kangumhaga munhu lufufu na lutogo, choneche choyalinguchonela maya, ila Nguluwi halingumdita munhu ayo yasangalale kwa chiwalo cha kutumiya vinhu avyo, ila mjenzi ndo yalingusangalala kwa chiwalo cha avyo. Ali nalyo ndo kota iyosi na ndo wihe ulingigala masinzo. 3 Hanga munhu koweza kuwa na wana miya imwe na wone naye koweza kikala miyaka minji, ila howeza kusangalala kwa chiwalo cha lufufu lwa heye, ndangulonga kota fola mwana yapondigwe yawele nakabagama, kusinda heye. 4 Ukomu wa mwana ayo ndo kota iyosi, kwa vila kangwajililaga kuli jiza na kuli jiza itagwa lyake lyangugubikwaga na kangusemwigwa. 5 Hanga hawezile kulyona isanya ne kuchizela chinhu choneche, kangwesela goya kusinda munhu ayo, 6 hanji munhu ayo kochikala miyaka elufu mbili (2,000) na mzidi, ila wone kolemwela kusangalala kwa chiwalo cha mbuli za heye zilingulutilila goya ziwele Nguluwi nakamha, yahawele ndo mbuli inojile kwa heye kuleka kupondigwa. Wanhu weng'ha wanguluta hali honhu hamwe, kuli chilaga.

7 Mijito jeng'ha ja kikangaza kwa munhu ndo kwa chiwalo cha chilyo cha heye hela, ila mhela weng'ha halinguweza kugutiza maya ga heye. 8 Ndaze, munhu yawele na luhala kana chinhu chachi cha mzidi kusinda mpoka? Ndaze, mzunwa kangupataga chinhu chachi cha mzidi kwa kuvizela kikala goya hali wanhu wanji? 9 Fola kiguta kwa vinhu vyouwele navyo, kusinda kitunya kwa maya ga kugana vinhu vinji lukami. Kulutilila kugana vinhu vinji lukami ndo kota iyosi, ndo kota kubilimisa mbeho.

10 Lyoneche lilingulawila nalyamuligwa kulawa katali na choneche chilingulawila kwa munhu nachizeleka kulawa katali. Ahyo haduhu munhu yawele koweza kitwanza na Nguluwi yawele na mong'ho kusinda munhu. 11 Ulonzi vyouwa winji ndo vyouwa kota iyosi, kwa vila haulingigala chinhu choneche cha mzidi kwa munhu. 12 Twangikala kwa mhela uchefu hela na kwajilila kota isisila vyolilingwajilila kuli lumuli lwa isanya. Haduhu yalinguvizela choni cholawila muisi munhu hoyobagama.