1 Awu ndo ulonzi wa Mdamla, mwana wa Daudi, mndewa wa Yelusalemu,

2 "Iyosi! Iyosi!"

Mdamla kangulonga,

"Iyosi! Munhu halinguweza kugalula chinhu muisi kwa mijito ja heye,

kota vyoyalingulemwela kibata iyosi."

3 Munhu kangupegwa choni,

kwa chiwalo cha mijito ja heye jeng'ha aha muisi?

4 Chila mhela wanhu wangubagama na wanhu wanji wangupondigwa,

ila isi yangikala mazuwa gose.

5 Isanya lyangulawaga na kuzingaga,

nalyo lyanguditaga himahima kuhiluka leka lilawe kahi.

6 Mbeho yanguputaga kulutila kusini na kugaluchila kasikazini,

yanguhiluchilaga hihyo chila mhela,

mazuwa gose yanguhiluchila kuli nzila zake.

7 Nzanda zeng'ha zanguchililika kulutila mbahali, ila bahali hailingumema.

Honhu hozilingulawa nzanda, zanguhilukaga kukula kahi.

8 Vinhu avyo vyeng'ha vyangwambuza wanhu kutoka,

mzidi kusinda munhu vyoyoweza kulonga,

iziho halilingutoka kulola,

na ikutu halilingiguta kuhulika

na maya hagalingumala.

9 Chila chiwele baho, chowa baho kahi,

chila chiwele nachiditigwa, choditigwa kahi,

ahyo, haduhu chinhu chinyale ng'hatu muisi.

10 Hana choneche chiwele munhu koweza kulonga, "Ulole, chinhu achi ndo chinyale."

Ila nachali baho kulawa katali ng'hatu, nachali baho mhela wa hetwe louwele ung'hali.

11 Wanhu wa mhela awu, hawoweza kuzikumbuchila mbuli ziwele nazikoleka katali ng'hatu,

na wala wa mhela ulinguya, hawozikumbuchila mbuli zilingukoleka sambi.

12 Heni, Mdamla, nandali mndewa wa Isilaeli, ako Yelusalemu. 13 Kwa nhumbula ya heni yeng'ha nanuwila kilangusa luhala lweng'ha, gala geng'ha galingukoleka hasi ha ulanga. Nandilangusa kota Nguluwi nakawika itunyo likulu mchanya mwa munhu. 14 Nambona mbuli zeng'ha zilingukoleka muisi, ndo iyosi na ndo kota munhu yalingubilimisa mbeho hela. 15 Chila chibiniche hachiweza kugololwa, chila chiwele cha haduhu, huweza kuchiwaza. 16 Nandali ndichijesa nene baha, "Ulole, nandiwa mkulu na konjezeka kuli luhala kusinda yoneche yawele nakalongoza Yelusalemu lombele nding'hali kulongoza."

17 Ahyo, nanuwila kikangaza kuvizela kunoga kwa luhala kusinda upoka, ila nandilangusa kota mbaka ali nalyo ndo kota kubilimisa mbeho hela. 18 Kwa vila luhala lwinji lwangigalaga lunhwinhwi lukulu, kahi uwanzi houkonjezeka na masinzo gangonjezeka.