1 Whaani yawele kota munhu yawele na luhala?

Whaani yalinguweza kutang'hula mbuli?

Luhala lwangukudita kumeho kwa munhu kusangalale.

2 Ndangulonga kota uhulichize ilajizo lya mndewa, kwa vila nawilaha kudita ahyo hali Nguluwi. 3 Uleche kuka himahima hali mndewa. Uleche kulewela mbuli yohambe ikundigwe, kwa vila mndewa kodita lyoneche yalinguligana. 4 Ulonzi wa mndewa ndo uwele na ludali lwa kuduma, whaani yoweza kumuuza, "Kwangudita choni?"

5 Yoneche yawele kohulichiza ilajizo lya heye holumizwa naye,

yawele na luhala kouzela mhela unojile wa kudita chinhu.

6 Ena, chila chinhu china mhela wake na nzila zake,

hanga munhu kangufichigwa na nongwa ng'hulu.

7 Haduhu hali hetwe yalinguzizela mbuli za mazuwa galinguya,

haduhu yoweza kutulonjela mbuli zilinguya.

8 Hatulizelele zuwa lya kubagama,

na haduhu wawele woweza kuligalula zuwa alyo.

Haduhu mwamizi yalingukundigwa kuka kuli ngondo mhela ngondo yangulutilila,

na mwihe howeza kuloholigwa kulawa kuli madito ga heye gehile.

9 Geng'ha aga nandigona lombele ndichijesa kuwala chila chinhu chilinguditigwa muisi. Hana mhela munhu kangiditaga mkulu mchanya mwa wanji, kwa kudita ahyo kanguwatunyaga wanhu. 10 Nandiwona wehile wotiligwa, wala wawele nawazowela kwinjila na kulawa honhu helile na kupegwa lutogo kuli muji uwele nawali waditile wihe. Ali nalyo ndo kota iyosi.

11 Hotuwona wehile wangudita wihe na hawalingugazigwa kwa chiwalo cha wihe wa hewo, mbuli ayo yangutudita tuwe na majesa ga kudita wihe. 12 Hanga mwihe kanguditaga wihe mala miya imwe na koweza kulutilila kikala lukami, ila ndangijesa kota fola kwa wanhu walingumhulichiza Nguluwi, wala walingumdumba Nguluwi. 13 Ila kwa vila wehile hawalingumdumba Nguluwi, mbuli za hewo haziweza kulutilila goya na hawochikala kwa mhela winji.

14 Hana mbuli iyage iwele ndo kota iyosi ilingulawila muisi. Watanganiche wangupegwa gala galinguganigwa kupegwa wehile na wehile wangupegwa galinguganigwa kupegwa watanganiche. Ndangulonga kota mbuli ayi kahi ndo kota iyosi. 15 Ahyo ndangulonga kota twanguganigwa kusangalala kwa chiwalo cha kikala, kwa vila haduhu mbuli inojile ng'hatu kwa munhu kusinda kulya na kunwa na kusangalala. Hamba kusangalala kowa hamwe na mijito jake kuli mazuwa geng'ha ga ukomu wa heye gawele nakapegwa na Nguluwi hano muisi. 16 Nanuwila kuwa munhu yawele na luhala na kupugajiza chila chinhu chiwele wanhu woweza kudita muisi, nandiwona wanhu wokola mijito jing'ang'ale nemisi na nechilo ne kuwasa. 17 Siwezile kuvizela choyalingudita Nguluwi. Hanga munhu kochikangaza kupala leka kuvizela, howeza. Hanga munhu yawele na luhala kangulonga kanguvizela, ndikomya halinguvizela.