1 Ugule na kuguza vinhu kuli isi ya chijenzi,

hanji hamba koweza kupata mzidi.

2 Wagawile honhu ha lufufu lwa hegwe wanhu saba, ena mbaka wanhu nane,

kwa vila haulinguvizela mbuli yachi yihile yolawila muisi.

3 Ng'hungugu yangigalaga nhonya,

na igodi lyangusigala bahala holigwile.

4 Wone kuna lunhwinhwi kuwala nhonya, haunyala nyhule,

kwa chiwalo acho, hauweza kubeta chinhu choneche.

5 Kota vila vyohambe uvizele nzila ya mbeho,

ama ndaze ukomu vyoulingwinjila kuli mizeje ja mwana mgati mwa munda mwa mamo,

hihyo du, huweza kujizela mijito ja Nguluwi, yavilumbile vinhu vyeng'ha.

6 Unyale nyhadikwa za hegwe mitondo na uleche kuleka kunyala matinazo,

kwa vila huvizelele nyhadikwa zachi zokota, za mitondo ama za matinazo,

ama zeng'ha zokota goya.

7 Lumuli lunoga,

na kulyona isanya kwanguganojeza meho.

8 Munhu hoyochikala kwa miyaka minji lukami,

kanguganigwa yasangalale kwa chiwalo cha ukomu awo.

Ila kahi yakumbuchile mazuwa ga jiza, kwa vila gowa menji.

Chila chinhu chilinguya ndo kota iyosi.

9 Gwa msongolo, usangalale kwa chiwalo cha usongolo wa hegwe,

nhumbula ya hegwe isangalale louwa ung'hali kuli usongolo.

Uwinze maya ga nhumbula ya hegwe,

na choneche chiwele meho ga hegwe ganguchona,

ila uvizele kota Nguluwi kokutagusa kwa chiwalo cha ago geng'ha.

10 Ahyo lelo, wuse lunhwinhwi mnhumbula mwa hegwe

na utoze kutali magazo ga lukuli lwa hegwe,

kwa vila mong'ho wa usongolo wangumala himahima kota iyosi.