1 Mnyhulichize hemwe isi za kutali,

muwiche goya ikutu hemwe wanhu wa isi za kutali.

Mkulu Nguluwi nakanyhema lombele nding'hali kupondigwa,

nakalichema itagwa lya heni lombele kuli munda wa mayangu.

2 Nakaupa kung'hang'hala ulonzi wa heni kota ipanga linoleche ng'hatu,

nakavisa heni kuli lubehelo lwa moko wa heye,

nakandita ndiwe kota misale,

nakavisa heni kuli podo lya heye.

3 Nakandonjela, "Kowakolela mijito wanhu wa heni Waisilaeli,

na kowambuza wanhu wonhogole."

4 Ila nandonga,

"Nang'hola mijito ja hihi hela,

mong'ho wa heni naukoleka ne kupata chinhu.

Ila Mkulu Nguluwi komha heni hachi,

chonolo cha mijito ja heni cha ako kwa Nguluwi."

5 Ila Mkulu Nguluwi nakanyhema kulawa mmunda mwa mayangu

leka ndiwe chitumagwa wa heye,

ndiwahilule walelwa wa Yakobo kwa heye,

ndiwakungajize walelwa wa Isilaeli kwa heye.

Mkulu Nguluwi nakamha heni lutogo hali heye,

Nguluwi wa heni nakawa mong'ho wa heni.

6 Heye kangulonga, "Ndo mbuli ndodo ng'hatu kwa hegwe kuwa chitumagwa wa heni,

uyinule nhanzi ya Yakobo,

na kuwahilula wala Waisilaeli wasigale.

Ndokudita uwe lumuli lwa wanhu wa isi,

uwegalile ulohozi wanhu wa heni weng'ha muisi."

7 Mkulu Nguluwi, mgombozi na Yelile wa Isilaeli,

kangumlonjela yula yalingubezigwa ng'hatu,

yula yalinguzudilwa na wanhu wa isi,

na yawele chitumagwa wa vilongozi,

"Wandewa wokona hegwe na kwima,

ena, wakulu wofugama hali hegwe,

kwa chiwalo cha heni Mkulu Nguluwi ndilingutumbilwa,

kwa vila heni nda Yelile wa Isilaeli,

yondikuhagule hegwe."

8 Mkulu Nguluwi kangulonga hino,

"Kuli mhela wa heni unojile nandikwidichila kulanda kwa hegwe,

nandikutanza kuli mhela wa ulohozi.

Ndokupa ilagano lya heni kwa chiwalo cha wanhu wa isi zeng'ha,

leka kuiwika goya isi ya Isilaeli iwifigwe,

na kuwapa wanhu isi ayo,

na kuwagawila uhalizi,

9 kuwalonjela wanweng'hwa, ‘Mlawe amo mchinweng'ho,’

na wala wawele kuli jiza, ‘Muye kuli lumuli.’

Chila honhu howoluta wopata chilyo,

mbaka kuli vidunda vilihela chinhu wopata honhu ha kulya.

10 Hawokona nzala kahi ne ng'halu,

ne mbeho ya kugunuche ama isanya kuwalakaza.

Heni ndilinguwonele isungu ndowalongoza,

na kuwahilika kuli nzasa za mazi.

11 Vidunda vya heni vyeng'ha ndovidita kuwa nzila,

na nzila za heni ng'hulu ndozigongomanya kahi.

12 Wanhu wa heni wokuya kulawa kutali,

wanji kulawa kasikazini na kolizinjilaga isanya,

wanji kulawa isi ya Sinimu, iwele ubanzi wa kusini mwa isi ya Misili."

13 Wimbe kwa kusangalala, hegwe ulanga,

utowe luchenze gwa isi,

mtowe iyowe hemwe vidunda,

kwa vila Mkulu Nguluwi nakawahembuliza wanhu wa heye,

ena, kowa na isungu kwa wanhu wa heye walingugazika.

14 Hegwe muji wa Yelusalemu kwangulonga,

"Mkulu Nguluwi nakandeka,

ndikomya, Mkulu nakasemwa heni."

15 Ila Mkulu Nguluwi kanguwidichila muji wa Yelusalemu,

"Ndaze, mamo koweza kumsemwa mwanage yalingong'ha,

yaleche kumonela isungu mwana yawele nakamponda?

Hanga mamo koweza kumsemwa mwanage,

ila heni sikusemwa.

16 Lole, nanyandika itagwa lyako kuli viganza vya heni,

ndangijesa kuwala ng'hanzi za hegwe chila zuwa.

17 Wala wawele wokuzenga kahi wokola mijito himahima ng'hatu kusinda wala wawele nawakuwifya,

na wala wawele nawakuwifya wokuka.

18 Winule meho ga hegwe ulole banzi zeng'ha,

wanhu wa hegwe weng'ha wangikungajiza na kuya kwa hegwe.

Ndangilaha kota vyondilingikala heni Mkulu Nguluwi,

wanhu wa hegwe wowa kwa hegwe kota vinoligo,

nagwe kowavala hewo kota yalinguhesigwa.

19 "Hanga nakudumigwa na kuditigwa uwe mchiwa,

na isi ya hegwe kuwifigwa,

lelo isi ya hegwe yowa ndodo kwa chiwalo cha winji wa wanhu wa hegwe,

na wala wawele nawakudita uwe mahame wowa kutali.

20 Wana wa hegwe wapondigwe kuli isi za chijenzi,

wokung'ung'utila wolonga,

‘Isi ayi ndo ndodo lukami kwa chiwalo cha hetwe,

utupe honhu hakulu ha kikala.’

21 Aho ndo houchiuza gwegwe baho,

‘Whaani yawapondile wana weng'ha awa kwa chiwalo cha heni?

Nafililwa na wana wa heni ne kuwa na wanji.

Nandechigwa na kulemigwa,

lelo whaani yawalolele wana awa?

Nandechigwa ndiliyeka,

lelo awa nawalawa kohi?’ "

22 Mkulu Nguluwi kangulutilila kumlonjela Yelusalemu,

"Ndokwinula moko ga heni kwa wanhu wa isi,

ena, ndoyinula bendela ya heni leka kuwalongoza wanhu wa isi,

nawo wowegala wana wa hegwe,

na kuwapapa wahinza wa hegwe kuli mayega ga hewo.

23 Wandewa wowa wahaza wa wana wa hegwe wa kuwalolela,

na wache wa wandewa wowa wamamo wa wana wa hegwe wa kuwalolela.

Wofugama hali hegwe na kukuhulichiza,

na kumyanga nhimbwisi iwele kuli magulu ga hegwe.

Aho ndo kovizela kota heni ndo Mkulu Nguluwi,

weng'ha walingitumbila kwa heni, hawobasigwa soni."

24 Ndaze, vinhu vya yazidahe vyoweza kuholigwa kwa lupichi?

Ama wapogozi wa yawele na nhumbula ing'ang'ale, woweza kuloholigwa?

25 Mkulu Nguluwi kangwidichila,

"Ena! Wapogozi wa ngondo woweza kuholigwa kwa yazidahe,

na vinhu kulawa kuli ngondo vyoholigwa kulawa kwa munhu yang'ang'ale.

Ndochitwanza na wang'honyo wa hegwe,

ndowalohola wana wa hegwe.

26 Ndowadita walingukutunya wedakulye hewo wawo,

wogala kwa danda ya hewo kota ujimbi.

Aho wanhu weng'ha wovizela,

kota heni ndo Mkulu Nguluwi, mlohozi wa hegwe,

mgombozi wa hegwe, Mbele na Mong'ho kwa Yakobo."